ភឿន ស្រីពៅ កំពុងស្មូតឲ្យនិស្សិតអាមេរិកស្ដាប់រាប់ពាន់នាក់
- 2015-11-13 13:12:49
- ចំនួនមតិ 0 | ចំនួនចែករំលែក 0
ភឿន ស្រីពៅ កំពុងស្មូតឲ្យនិស្សិតអាមេរិកស្ដាប់រាប់ពាន់នាក់
ចន្លោះមិនឃើញ
អតីតពិធីការិនីកម្មវិធីព្រះពុទ្ធសាសនារបស់ទូរទស្សន៍ CTN និង My TV កញ្ញា ភឿន ស្រីពៅ បានប្រាប់ ថា បច្ចុប្បន្ននាងកំពុងតែបំពេញបេសកកម្មស្មូតឲ្យ សាកលវិទ្យាល័យជាច្រើននៅ សហរដ្ឋអាមេរិក ដោយការស្មូតម្ដងៗមាននិស្សិតចូលរួមស្ដាប់ រហូតដល់ទៅរាប់ពាន់នាក់ឯណោះ។
ឆ្លើយឆ្លងជាមួយ Sabay តាមរយៈបណ្ដាញទំនាក់ទំនងសង្គម កញ្ញា ភឿន ស្រីពៅ បានប្រាប់ថា នាងបានមកសហរដ្ឋអាមេរិក កាលពីដើមខែ វិច្ឆិកានេះ ក្រោមការធានាពីសាកលវិទ្យាល័យ University of California, Berkeley ។ រយៈពេលនៃដំណើរមកផ្សព្វផ្សាយធម៌ស្មូតរបស់ព្រះពុទ្ធសាសនានេះ មានរយៈពេល២សប្ដាហ ហើយនៅថ្ងៃ១៧ ខែ វិច្ឆិកា ខាងមុខនេះ នាងនឹងត្រឡប់មកស្រុកកំណើតវិញ។
អតីតពិធីការិនីដែលល្បីខាងស្មូតមានសំឡេងពីរោះម្នាក់នេះ បានឲ្យដឹងបន្ថែមទៀតថា ជាង១សប្ដាហ៍ដែលនាងបានមកស្មូត មានការចូលរួមស្ដាប់ជាច្រើនពីសិស្សនិស្សិត ដែលការស្មូតម្ដងៗមានអ្នកចូលរួមរាប់ពាន់នាក់ឯណោះ ។ ការស្មូត ស្រីពៅ បានធ្វើឡើង ជាភាសាខ្មែរនឹងមានការបកប្រែជាភាសាអង់គ្លេស។ គ្រប់ខ្លឹមសារនៃធម៌ស្មូត គឺក្នុងន័យអប់រំផ្លូវចិត្ត ដែលអាចផ្ដល់សន្តិភាពផ្លូវចិត្ត នឹងសេចក្ដីសង្ឃឹមជាដើម ដល់មនុស្សគ្រប់រូប។
កញ្ញា ភឿន ស្រីពៅ បានលើកឡើងថា សកម្មភាពចេញផ្សាយនៅលើពិភពលោកនេះ គឺជាបំណងប្រាថ្នារបស់នាងធំបំផុត ក្នុងនាមជាអ្នកកាន់ព្រះពុទ្ធសាសនា ហើយនាងប្ដេជ្ញាចិត្តថា នឹងខំប្រឹងបន្ថែមទៀត ដើម្បីឲ្យការងារនេះ ដំណើរការបានល្អ។
នេះមិនមែនជាលើកទី១ទេ ដែលស្រីពៅ បានមកស្មូតនៅសហរដ្ឋអាមេរិក តាមការរៀបរាប់ គឺជាលើកទី៧ហើយ។ ជាមួយគ្នានេះដែរ អូស្ត្រាលី ឥណ្ឌា នេប៉ាល់ តៃវ៉ាន់ ថៃ ជាដើម ក៏នាងធ្លាប់បានទៅជាច្រើនលើកមកហើយ។
កញ្ញា ភឿន ស្រីពៅ បច្ចុប្បន្នមានវ័យ២៥ឆ្នាំ នាងបានឈប់ពីកម្មវិធីព្រះពុទ្ធសាសនារបស់ CTN និង My TV ជិត១ឆ្នាំមកហើយ ។ ក្រៅពីការស្មូតនាង គឺជាម្ចាស់ហាងលក់ សម្ភារៈបុណ្យទានល្បីឈ្មោះមួយដែលមានយីហោ “ស្រីពៅស្មូត” ៕
អត្ថបទ៖ ខុត សីហា