រឿង “វិស្សមកាលមរណៈ” យ៉ាដាវ ថតបាន៥ថ្ងៃឈប់ថត

2015-11-30 17:19:02
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង កញ្ញា អេន យ៉ាដាវ ដែលធ្លាប់អះអាងថា ទើបហាត់ចេះក្បាច់គុនខ្មែរចេះជាង១០ក្បាច់ ដើម្បីថតខ្សែភាពយន្តរឿង“វិស្សមកាលមរណៈ” នោះ បានប្រាប់ Sabay វិញថា នាងឈប់ថតរឿងមួយនេះហើយ ក្រោយថតបាន៥ថ្ងៃ។

មូលហេតុដែលនាំឲ្យ អេន យ៉ាដាវ សម្រេចឈប់ថតត្រូវបាននាងប្រាប់ថា មកពីធ្វើការមិនចុះសម្រុងគ្នា។ យ៉ាដាវ មិនបានបញ្ចេញឈ្មោះក្រុមការងារដែលធ្វើការមិនចុះសម្រុងគ្នានោះឡើយ ប៉ុន្តែនាងលើកឡើងថា ស្ដាយដែលបានខំប្រឹងចំណាយពេលជាច្រើន ទាំងការហាត់ក្បាច់គុនក៏ដូចជាការថត ដោយមិនខ្លាចនឿយហត់ ខាតពេលរកស៊ី ប៉ុន្តែចុងក្រោយ បែរជាមិនបានដូចចិត្ត។

"ខ្ញុំអត់ចង់និយាយច្រើនទេ ខ្ញុំប្រឹងខ្លាំងណាស់ ពិសេសរឿងហាត់ក្បាច់គុនហ្នឹង តែខ្ញុំធ្វើអីក៏ខុសៗ គេចេះតែមើលបំណាំខ្ញុំរហូត" អេន យ៉ាដាវ ថ្លែង។តាមការអះអាងរបស់យ៉ាដាវ ការសម្រេចចិត្តឈប់ថតទាំងដើមទីនេះ គឺស្ថិតតាមការយល់ព្រមទាំងសងខាង ហើយការទូទាត់តម្លៃខ្លួននៃការថត ក៏បានទូទាត់រួចគ្នាហើយផងដែរ។

ផ្ទុយពីការអះអាងខាងលើ អ្នកស្រី ថុង ស៊ីវទៀង ម្ចាស់ផលិតកម្មចក្រវាឡពេជ្រភាពយន្ត បញ្ជាក់ថា មូលហេតុដែលនាំឲ្យផលិតកម្មសម្រេចចិត្តជ្រើសតួថ្មីជំនួស ក៏ព្រោះតែ យ៉ាដាវ សម្ដែងមិនទាន់ដល់នូវអ្វីដែលផលិតកម្មចង់បាន ហើយម្យ៉ាងទៀត តារាស្រីម្នាក់នេះជាប់រវល់ការរកស៊ីច្រើន មិនសូវមានពេលគ្រប់គ្រាន់ក្នុងការថតផង។

"ខ្ញុំធ្វើកុនជាង២០ឆ្នាំហើយរឿងអីខ្ញុំមិនដឹង សម្ដែងមិនទាន់ដល់ទេ ខ្លាចសង្សារប្រចណ្ឌ ព្រោះគាត់យកសង្សារទៅរហូត ហើយមួយទៀត គាត់រវល់រឿងរកស៊ីច្រើន ខ្ញុំចង់ធ្វើរឿងនេះឲ្យបានល្អ ចឹងសម្រួលគ្នាដាក់តួថ្មីទៅ តែខ្ញុំបាននិយាយជាមួយគ្នាហើយ រឿងក្រោយៗខ្ញុំយកគាត់វិញ "។អ្នកស្រី ថុង ស៊ីវទៀង ថ្លែងបញ្ជាក់។

តាមការអះអាងរបស់ អ្នកស្រី ថុង ស៊ីវទៀង តារាស្រីដែល មកជំនួសតំណែង អេន យ៉ាដាវនោះ មានឈ្មោះថា សូណា ហើយប្លង់ដែលបានថតទាំង៥ថ្ងៃកន្លងមក គឺត្រូវថតសារឡើងវិញទាំងអស់។ ទោះជាបែបនេះក្ដី ម្ចាស់ផលិតកម្មរូបនេះ មិនបានស្ដាយពេលវេលា និងថវិកាដែលបានចំណាយទៅឡើយ អ្វីដែលផលិតកម្មចង់បាននោះ គឺគុណភាព។

បច្ចុប្បន្នខ្សែភាពយន្តរឿង “វិស្សមកាលមរណៈ” ដែលបានក្រុងពាលីរហូតដល់ទៅ២លើកនេះ បានដំណើរការថតប្រមាណជា៦០ភាគរយមកហើយ ។ ខ្សែភាពយន្តមួយនេះ គ្រោងចំណាយ ជាង៣ ម៉ឺនដុល្លារ ហើយក្រោយពីថតចប់ នឹងធ្វើការចាក់បញ្ចាំងនៅតាមរោងភាពយន្តទាំងអស់ក្នុងប្រទេសកម្ពុជា។ អ្នកស្រី ថុង ស៊ីវទៀង បានសម្ដែង សុទិដ្ឋិនិយមថា រឿង “វិស្សមកាលមរណៈ” នឹងទទួលបានការគាំទ្រខ្លាំងជាក់ជាមិនខាង ត្បិតអីតារាសម្ដែង ក៏ដូចជាអ្នកដឹកនាំសម្ដែងនៅក្នុងរឿងនេះ អ្នកស្រីបានជ្រើសរើសសុទ្ធតែជា អ្នកដែលមានសមត្ថភាពខ្លាំងទាំងអស់៕

អត្ថបទ៖ ខុត សីហា