ទូច​ បញ្ចរ៉ុង​ គឺ​ជា​ខ្សែ​ការពារ​មួយ​រូប​ដែល​​មិន​អាច​ខ្វះ​បាន​សម្រាប់​​​ក្លិប​បាល់ទាត់​បឹង​កេត​អង្គរ និង​មិន​សូវ​បាត់​មុខ​ពី​​ក្រុម​ជម្រើស​ជាតិ​​​នា​​ពេល​​បច្ចុប្បន្ន។ ​​​ជា​រឿយ​ៗ អ្នក​គាំទ្រ​ឃើញ​តែ​កីឡាករ​រូប​នេះ​រារាំង​ ការពារ​ និង​​ហក់​ទៅ​ឈូស​បាល់​ពី​គូ​បដិបក្ខ​ ប៉ុន្តែ​ប្រហែល​ជា​មិន​ធ្លាប់​ដឹង​ពី​ប្រវត្តិ​របស់​គេ​ឡើយ។

ខ្សែ​ការពារ​រូប​នេះ​អាច​លេង​​ជា​ខ្សែ​ការពារ​កណ្ដាល ​ឆ្វេង និង​ ស្ដាំ​ ទៅ​តាម​​ការ​​​ចង់​បាន​របស់​គ្រូ​បង្វឹក​ទៀត​ផង។ ​បញ្ចរ៉ុង​ ​បាន​ជាប់​ជម្រើស​ជាតិ​តាំង​ពី​ឈុត​ U19 ​នៅ​ឆ្នាំ​២០០៩​ ហើយ ​​មាន​ឈ្មោះ​ទៅ​ប្រកួត​ កីឡា​ស៊ីហ្គេម​នៅ​​ឡាវ​តាំង​ពី​ឆ្នាំ​២០០៩​។ ​បន្ថែម​លើ​នេះ​​ បញ្ចរ៉ុង​ ​ជាប់​ជម្រើស​ជាតិ​តាំង​ពី​ការ​ប្រកួត​ ​ជម្រុះ ​​AFC Challenge Cup 2012 ​នា​ខែ​កុម្ភៈ​ ​ឆ្នាំ​២០១១ ​រហូត​ដល់​បច្ចុប្បន្ន។

ជីវិត​ផ្ទាល់​ខ្លួន ទូច បញ្ចរ៉ុង កើត​​នៅ​ឃុំ​ដងទង់ ​ស្រុក​ ស្មាច់​មាន​ជ័យ​ ខេត្ត​កោះកុង។ ​ក្នុង​គ្រួសារ​មួយ​ដែល​មាន​ឳ​ពុក​ឈ្មោះ​ ភី ហៃប៉េង និង ម្ដាយ​ឈ្មោះ​ ឥដ្ឋ ​ធីតា។ ​រស់​នៅ​ក្នុង​ក្រុម​គ្រួសារ​ដែល​មាន​ជីវភាព​​មធ្យម​នៅ​ឯខេត្ត​កោះកុង​ បញ្ចរ៉ុង មាន​បងប្អូន​បង្កើត​​៥​​នាក់​ដែល​ក្នុង​ ​ប្រុស​ពីរ​នាក់​ និង ស្រី​៣​នាក់​ ហើយ​ បញ្ចរ៉ុង​ ជា​កូន​ទី៣​នៅ​​ក្នុង​ក្រុម​គ្រួសារ។

បើ ​និយាយ​ពី​ការ​សិក្សា​វិញ​ ​បញ្ចរ៉ុង​ ​​​បាន​បញ្ចប់​ថ្នាក់​វិទ្យាល័យ​នៅ​ឆ្នាំ​ ២០០៧​ នៅ​សាលា​កោះកុង​ ​ហើយ​ អនុវិទ្យាល័យ​ក៏​រៀន​​នៅ​សាលា​ដដែល​នេះ​ដែរ​ពី​ឆ្នាំ​​២០០១-២០០៤។ ​

ចាប់​ផ្ដើម​លេង​បាល់ទាត់ ឪ​ពុក​ម្ដាយ​បាន​ហាមឃាត់​​មិន​ឲ្យ​លេង​បាល់ទាត់​ពី​ព្រោះ​បារម្ភ​ពី​រឿង​ របួស​នោះ​ បញ្ចរ៉ុង​ នៅ​តែ​​ចូល​ចិត្ត ​និង​ ​លេង​បាល់ទាត់​តាំង​​​ពី​នៅ​​អនុវិទ្យាល័យ​​ជា​មួយ​មិត្តភ័ក្តិ រហូត​ដល់​ វិទ្យាល័យ​​​ម៉្លេះ។ ​បន្ទាប់​មក ​​បញ្ចរ៉ុង​ ​បាន​ចូល​លេង​ឲ្យ​​ក្រុម​បាល់ទាត់​ខេត្ត​កោះកុង​ មុន​​ពេល​ផ្លាស់​មក​លេង​ឲ្យ​ក្រុម ​Dolphin​នៅ​ឆ្នាំ​២០០៨។ ​ក្រោយ​ពី​ដឹង​​ចំណង់​របស់​កូន ​អ្នក​មាន​គុណ​ទាំង​ពីរ​​ក៏​លែង​​ឃាត់ឃាំង​ទៀត​ដែរ​ ដោយ​ស្រប​តាម​ បញ្ចរ៉ុង​ រហូត​ដល់​សព្វថ្ងៃ។ ​តែ​លោក​ទាំង​ពីរ​នៅ​តែ​​បារម្ភ​ ពេល​មាន​របួស​ម្ដងៗ។ ​ទម្រង់​កាន់​តែ​ល្អ​ ​បាន​ធ្វើ​​ឲ្យ​ បញ្ចរ៉ុង ផ្លាស់​ប្ដូរ​ក្លិប​ជា​បន្តបន្ទាប់។ ​នៅ​ឆ្នាំ​​២០១០​ ​ទូច បញ្ចរ៉ុង ​បាន​លេង​ឲ្យ​ភ្នំពេញ​ក្រោន​ ​មុន​នឹង​ផ្លាស់​ទៅ​លេង​ឲ្យ​ក្លិប​ប៉ូលិស​ ​នៅ​ឆ្នាំ​២០១១។ ​​នៅ​ឆ្នាំ​២០១២​ នេះ​​​ បញ្ចរ៉ុង​ ​បាន​ផ្លាស់​ទៅ​លេង​នៅ​ក្លិប​អ្នក​មាន​ថ្មី​ បឹងកេត ដែល​មាន​មូលដ្ឋាន​នៅ​ខេត្ត​កំពង់​ចាម។

ជាប់​ជម្រើស​ជាតិ​​ U19 ទូច បញ្ចរ៉ុង​ ​បាន​ជាប់​ជម្រើស​​ក្នុង​ឈុត​ U19 ក្រោម​ការ​​គ្រប់គ្រង​របស់​គ្រូ​បង្វឹក​ប្រាក់​ សុវណ្ណារ៉ា។ ​បញ្ចរ៉ុង​ បាន​ចេញ​ទៅ​ប្រកួត​​នៅ​ក្នុង​ពាន​រង្វាន់​ AFF U19 Championship 2009 ​នៅ​ប្រទេស​វៀតណាម​ ​តែ​​ក្រុម​​ កម្ពុជា​ចាញ់​ទាំង​បី​ប្រកួត​ជាប់​គ្នា។ ​កម្ពុជា​ស្ថិត​នៅ​​ក្នុង​ពូល​A ជា​មួយ​ ថៃ អូស្ត្រាលី និង​ សិង្ហបុរី។ U19 កម្ពុជា​ចាញ់​ទាំង​បី​ប្រកួត​ គឺ​ចាញ់​​ថៃ ​៣-០ ចាញ់ ​សិង្ហបុរី​​​៣-១​ និង​ចាញ់ ​អូស្ត្រាលី​ ៣-០។ ​

ក្រោយ​មក​ ខ្សែ​ការពារ​រូប​នេះ​ក៏​ជា​សមាជិក​មួយ​រូប​ពេល​ក្រុម​ U23 កម្ពុជា​ទៅ​ប្រកួត​ កីឡា​ស៊ីហ្គេម​​នៅ​ប្រទេស​ឡាវ​​ឆ្នាំ​២០០៩​​ ក្រោម​ការ​គ្រប់​គ្រង​របស់​ គ្រូ​បង្វឹក​ Scott O’Donell ។ ​ក្រុម​ U23 ស្ថិត​នៅ​ក្រុម​ជា​មួយ​ វៀតណាម​ ម៉ាឡេស៊ី ថៃ និង ទីម័រខាងកើត។ ក្រុម​កម្ពុជា​ចាញ់ ​ថៃ ​០-៤​ ចាញ់ ​ម៉ាឡេស៊ី ​០-៤​ ​ចាញ់ វៀតណាម​​ ១-៦ តែ​ ឈ្នះ​ ទីម័រខាងកើត​ ​៤-១។

បន្ទាប់​ពី​ជាប់​ជម្រើស​ជាតិ​ U19 ​និង ​U23 ​ បញ្ចរ៉ុង ​ត្រូវ​បាន​កោះហៅ​​ និង ​ជាប់​ជម្រើស​ជាតិ​ក្នុង​នាម​ជា​​ខ្សែ​ការពារ​មិន​ខ្វះ​បាន​​​​ពេល​ដែល​ លោក​ Lee Tae Hoon​ មក​​កាន់​ក្រុម​ជម្រើស​ជាតិ​នៅ​​ខែ​ សីហា​ ឆ្នាំ​ ២០១០។ ​ខាង​ក្រោម​នេះ​ជា​​​កម្មវិធី​ដែល​ បញ្ចរ៉ុង បាន​ចូល​លេង​ឲ្យ​ក្រុម​ជម្រើស​ជាតិ។

AFC Challenge Cup 2012 បញ្ចរ៉ុង​ បាន​ជួយ​ឲ្យ​​កម្ពុជា​ឆ្លង​ដល់​​វគ្គ​​ចែក​ពូល​នៃ​ពាន​រង្វាន់ AFC Challeng Cup 2012​ ដែល​​ជា​ពាន​រង្វាន់​ប្រចាំ​ទ្វីប​អាស៊ី​ដែល​​មាន​​៤៦​ប្រទេស​ចូល​រួម​នា​ពេល​ បច្ចុប្បន្ន។ ក្រុម​កម្ពុជា​បាន​យក​ឈ្នះ​ ម៉ាកាវ​ ៣-១ ​​​តែ​ចាញ់​ ​២-៣​ នៅ​ក្រៅ​ដី។ ​សរុប​គ្រាប់​បាល់​ទាំង​ពីរ​ជើង​ ក្រុម​កម្ពុជា​ឈ្នះ​​៥-៤ ហើយ​ ​កម្ពុជា​មាន​សិទ្ធ​ទៅ​ប្រកួត​បន្ត។ ​វគ្គ​ចាប់​ពូល​​ក្នុង​ពាន​រង្វាន់​ដដែល​នេះ​ កម្ពុជា​ស្ថិត​នៅ​ជា​មួយ​ក្រុម​ តាហ្ស៊ីគីស្ថាន កៀរហ្សីគីស្ថាន ​និង​ ម៉ាល់ឌីវ។ ​​ក្នុង​វគ្គ​ចែក​ពូល​ កម្ពុជា​ចាញ់​ម្ចាស់​ផ្ទះ​ ម៉ាល់ឌីវ​ ០-៤ ចាញ់​​តាហ៊្សីគីស្ថាន ០-៣​ និង​ចាញ់​ កៀរហ្សីគីស្ថាន​ ៣-៤។​ ​បី​គ្រាប់​របស់​កម្ពុជា​បាន​​មក​ពី​ការ​ស៊ុត​២​​គ្រាប់​របស់​គួច សុកុម្ភៈ​ និង​ មួយ​គ្រាប់​របស់​ខ្សែ​ការពារ​សុក រិទ្ធី។

World Cup Qualifier 2014 នៅ ​ថ្ងៃ​ទី​ ២៩​ខែ​មិថុនា​ ឆ្នាំ​២០១១​ ក្រុម​កម្ពុជា​ឈ្នះ​ ឡាវ​​ ៤-២​ នៅ​ក្នុង​ទឹក​ដី​​កម្ពុជា​ តែ​​ចាញ់​ ឡាវ​ យ៉ាង​​ដំណំ​ ៦-២​ នៅ​ក្រៅ​ទឹក​ដី​នៅ​ថ្ងៃ​ទី​ ១​ កក្កដា​ឆ្នាំ​ដដែល។ ​​សរុប​គ្រាប់​បាល់​ កម្ពុជា​ចាញ់​ ឡាវ​ ៦-៨​ នៅ​ក្នុង​វគ្គ​ជម្រុះ​​​​ពាន​រង្វាន់​បាល់ទាត់​ពិភព​លោក​​ឆ្នាំ​២០១៤​ប្រចាំ ​ទ្វីប​អាស៊ី​​​ដោយ​មិន​បាន​ទៅ​ប្រកួត​បន្ត​ឡើយ។

BIDC CUP 2011 បញ្ចរ៉ុង​ ​​ក៏​ជា​កីឡាករ​មួយ​រូប​​ ​ដែល​លេង​ក្នុង​ពាន​រង្វាន់​ BIDC CUP 2011 ឬ​​ ហៅ​ថា​ ពាន​​រង្វាន់​បាល់ទាត់​យុវជន​មហា​អនុ​តំបន់​ទន្លេ​មេគង្គ​ក្រោម​ អាយុ​២១ ​ឆ្នាំ​កាល​ខែ​ តុលា ឆ្នាំ ​២០១១​ ​​និង ​បាន​ការ​ចូល​រួម​​ពី​បណ្ដា​ប្រទេស​ចំនួន​​៦​ មាន​ដូច​ជា​ U21កម្ពុជា​, U21ថៃ​, U21ឡាវ, U21មីយ៉ាន់ម៉ា,​U21 វៀតណាម,និង​ក្លិប​ Hong Xiang FC របស់​ចិន។ ​ក្រុម​កម្ពុជា​​ឈ្នះ​ឡាវ​ ២-០ ​ស្មើ ​​​​មីយ៉ាន់ម៉ា​ ២-២​ តែ​ចាញ់​ ថៃ​ក្នុង​វគ្គ​ពាក់​កណ្ដាល​ផ្ដាច់​ព្រ័ត្រ​​១-២។

SEA GAMES 2011 បញ្ចរ៉ុង​ ចូល​​លេង​ទាំង​​បួន​ប្រកួត​​នៅ​​ព្រឹត្តិការណ៍​កីឡា​ស៊ីហ្គេម​ តែ​ ក្រុម​ U23កម្ពុជា​ចាញ់​​ម្ចាស់​ផ្ទះ ឥណ្ឌូណេស៊ី ០-៦ ​នៅ​ក្នុង​ការ​ប្រកួត​បើក​ឆាក​ នៃ​ពូល​ A របស់​ខ្លួន​កាល​ថ្ងៃ​ទី០៧ វិច្ឆិកា ឆ្នាំ​២០១១។ កម្ពុជា​ចាញ់​ សិង្ហបុរី  ១-២ នៅ​ថ្ងៃ​ទី ០៩ ខែ​វិច្ឆិកា ឆ្នាំ ២០១១​ ។ ​មួយ​គ្រាប់​ របស់​​ កម្ពុជា​ គឺ​ជា​ការ​ស៊ុត​ដ៏​អស្ចារ្យ របស់​ ឈិន ឈឿន ដែល​គ្រាប់​បាល់​សឹង​តែ​អស់​មុំ​ទៅ​ហើយ​ពី​ស្លាប​ស្ដាំ និង​ ចូល​​មុំ​កែង​នៃ​សំណាញ់​ទី​យ៉ាង​ល្អ​នៅ​នាទីទី​៣៥។ កម្ពុជា​​បាន​​នាំ​មុខ​មុន ​តែ​ត្រូវ​​ក្រុម​ សិង្ហបុរី ​តាម ស្មើ និង​វាយ​បក​យក​ឈ្នះ​​ខ្មែរ​តែ​ម្ដង​នៅ​តង់​ទី២។ នៅ​ក្នុង​ការ​ប្រកួត​ទី៣​កម្ពុជា​ចាញ់​ក្រុម​​ ថៃ​រហូត​ដល់ ០-៤ នៅ​ថ្ងៃ​ទី១១ វិច្ឆិកា ២០១១។

ការ​ប្រកួត​​លើក​ទី៤ ដែល​ជា​ការ​ប្រកួត​ជម្រុះ​បញ្ចប់​នៅ​ក្នុង​ពូល A កម្ពុជា​ ចាញ់​ម្ចាស់​ការពារ​តំណែង​ជើង​ឯក​ចាស់ ​ម៉ាឡេស៊ី ១-៤ នៅ​ថ្ងៃ​ទី១១ ខែ​ វិច្ឆិកា ​ឆ្នាំ​ដដែល។ ​កីឡាករ​ដែល​ស៊ុត​ឲ្យ​កម្ពុជា​ គឺ​មនុស្ស​ដដែលៗ​ ​ពេល​ រក​គ្រាប់​បាល់​​ជា​មួយ​ សិង្ហបុរី។ ការ​ស៊ុត របស់ ឈិន ឈឿន គឺ​​បន្ទាប់​ពី​​ការ​បោះ​បាល់​យ៉ាង​ល្អ​ ពី​​ប្រធាន​ក្រុម​ ឃួន ឡាបូរ៉ាវី​ នៅ​​នាទីទី​៦១ នៃ​តង់​ទី២។

Hassanal Bolkiah Trophy(HBT) 2012 បញ្ចរ៉ុង​ អម​​ជា​មួយ​កីឡាករ​ U21កម្ពុជា​ផ្សេងទៀត​​ទៅ​ប្រកួត​ពាន​រង្វាន់HTB 2012 នៅ​ប្រ៊ុយណេ​ ចាប់​ពី​ថ្ងៃ​ទី ២៤ ដល់​ ​ថ្ងៃ​ទី​ ០៩ ខែ​ មីនា ឆ្នាំ​២០១២។  ក្រុម​U21កម្ពុជា​​ចាញ់ ម្ចាស់​ផ្ទះ ប៊្រុយណេ ២-៣ ​នៅ​ថ្ងៃ​ទី ២៥ កុម្ភៈ ចាញ់ វៀតណាម ​១-២ ​នៅ​ថ្ងៃ​ទី ២៧ កុម្ភៈ ចាញ់ ​ទីម័រខាងកើត ០-១ ​នៅ​ថ្ងៃ​ទី ២៩ កុម្ភៈ និង​ ចាញ់ ម៉ាឡេស៊ី  ១-៣ នៅ​​ថ្ងៃ​ទី ៥ មីនា។

ឆ្នាំ​​២០១២ នៅ ​ដើម​ឆ្នាំ​២០១២ នេះ​ពោល​ ​ចាប់​ពី​ថ្ងៃ​ទី​ ០៧ មករា ទូច បញ្ចរ៉ុង​ បាន​ផ្លាស់​ពី​ក្លិប​ប៉ូលិស​ទៅ​ចូល​រួម​​ក្លិប​អ្នក​មាន​ថ្មី​ ​ចម្ការកៅស៊ូបឹងកេត​ ដែល​មាន​មូលដ្ឋាន​នៅ​ខេត្ត​កំពង់​ចាម។ បច្ចុប្បន្ន​ ខ្សែ​ការពារ​រូប​នេះ​កំពុង​តែ​​បន្ត​លេង​ឲ្យ​ក្លិប​បឹងកេត​ នៅ​ក្នុង​ពាន​រង្វាន់​មិត្តហ្វូនខេមបូឌានលីក​ ឆ្នាំ​២០១២។ ​ជា​មួយ​គ្នា​នោះ​ដែរ​ បច្ចុប្បន្ន​ ​បញ្ចរ៉ុង​ ​ក៏​ជាប់​​​ជម្រើស​ជាតិ​ U22 ត្រៀម​​វគ្គ​ជម្រុះ​ AFC U22 Asian Cup ​​ ​នា​ខែ​មិថុនា ឆ្នាំ២០១២​​ ខាង​មុខ​នេះ​ដែរ។ ចាប់​ពី​ឆ្នាំ​២០១២​រហូត​ដល់​ឆ្នាំ​២០១៥​នេះ ទូច បញ្ចរ៉ុង​​បាន​ចូល​រួម​ជា​មួយ​ក្រុម​ជម្រើស​ជាតិ​កម្ពុជា​ទាំងក្រុម U23 និង​ក្រុម​ធំ​សម្រាប់​ការ​ប្រកួត​ក្នុង​ព្រឹត្តិការណ៍​កីឡា​ស៊ីហ្គេម ការ​ប្រកួត​ជម្រុះ​បាល់ទាត់​ពិភព​លោក​ប្រចាំ​តំបន់​អាស៊ី​ឆ្នាំ​២០១៨ និង​ការ​ប្រកួត​ជម្រុះ​ពាន​រង្វាន់​ AFC ជា​ដើម។

ស្នាដៃ​ទទួល​បាន -​​ ឆ្នាំ​ ២០១០​ ​ទូច បញ្ចរ៉ុង​ ក៏​ជា​សមាជិក​មួយ​រូប​​​​នៅ​​ភ្នំពេញ​ក្រោន​ ពេល​ក្រុម​ឈ្នះ​ ពាន​រង្វាន់​មិត្តហ្វូនខេមបូឌានលីក​​ឆ្នាំ​២០១០។

• ឆ្នាំ ២០១២ រូប​គេ​ក៏​បាន​ជួយ​ឲ្យ​ក្លិប​បឹងកេត​អង្គរ​ឈ្នះ​ជើង​ឯក​លីក​បាល់ទាត់​កម្ពុជា​មិត្ត​ហ្វូន​ខេមបូឌានលីក​ឆ្នាំ​២០១២។

ទោះ​ជា​​ បញ្ចរ៉ុង​ កំពុង​​តែ​​លេង​ល្អ​នៅ​ក្លិប​បឹងកេត និង ​មាន​ឈ្មោះ​មិន​ដែល​ដាច់​នៅ​ក្នុង​​ក្រុម​ជម្រើស​​ជាតិ ​​ប៉ុន្តែ​ ​​​ខ្សែ​ការពារ​​​​​​​រូប​នេះ​ ថា​នឹង​ទៅ​ប្រកប​​មុខ​របរ​ផ្សេង​​ក្រៅ​ពី​អាជីព​បាល់ទាត់​នា​​ថ្ងៃ​អនាគត។ ​ការ​​ទទួល​មុខរបរ​ថ្មី​បន្ទាប់​ពី​ការ​លេង​បាល់ទាត់​គឺ​ដោយ​សារ​មាន​បង​ ស្រី​នៅ​ឯ​ខេត្ត​ឧត្ដរមានជ័យ​​ជា​អ្នក​ជួយ​ផ្ចុងផ្ដើម៕

ប្រែ​សម្រួល៖ ជាន ចាន់រ៉ា