តម្លៃជួលបន្ទប់សណ្ឋាគារ និងផ្ទះសំណាក់នៅកំពតឡើងថ្លៃតែគេកក់ជិតអស់

2015-12-10 17:38:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈដែលខេត្តកំពតនឹងត្រូវរៀបចំពិធីបុណ្យសមុទ្រដ៏ទាក់ទាញមួយដែលផ្តល់ភាពសប្បាយរីករាយដល់ភ្ញៀវទេសចរដែលនឹងប្រព្រឹត្តទៅរយៈពេល៣ថ្ងៃ នៅក្នុងសប្តាហ៍នេះកន្លែងស្នាក់នៅដូចជាផ្ទះសំណាក់ និងសណ្ឋាគារ នៅក្នុងខេត្តនេះត្រូវបានកក់ស្ទើរតែអស់ហើយ បើគិត ត្រឹមថ្ងៃម្សិលមិញ។

ព្រឹត្តិការណ៍ប្រចាំឆ្នាំដែលធ្វើឡើងក្នុងគោលបំណងលើកកម្ពស់ឧស្សាហកម្មទេសចរណ៍តំបន់ឆ្នេរមួយនេះនឹងមានយៈពេល៣ថ្ងៃ គឺចាប់ពីថ្ងៃទី១១ដល់ថ្ងៃទី១៣ ខែធ្នូ ឆ្នាំ២០១៥។

លោក សយ ស៊ីណុល ប្រធានមន្ទីរទេសចរណ៍ខេត្តកំពតបានមានប្រសាសន៍ថា ពិធីបុណ្យសមុទ្រឆ្នាំនេះរំពឹងថានឹង ទទួលបានភ្ញៀវទេសចរជាតិ និងអន្តរជាតិរាប់ម៉ឺននាក់មិនចាញ់ការរៀប ចំព្រឹត្តិការណ៍ មុនៗនៅបណ្តាខេត្តផ្សេងឡើយ។

លោកថាគិតត្រឹមថ្ងៃម្សិលមិញនេះចំនួនបន្ទប់ផ្ទះសំណាក់ និងសណ្ឋាគារនៅខេត្ត កំពតត្រូវបានភ្ញៀវកក់ស្ទើរតែអស់ទៅហើយ ដែលនៅសេសសល់មិនដល់ ១៥ភាគរយ ឡើយហើយចំនួនភ្ញៀវបានបន្តកើនឡើងជាបន្តបន្ទាប់។

លោកបញ្ជាក់ថា ចំពោះតម្លៃបន្ទប់បានហក់ឡើងចន្លោះពី ១៥ទៅ ៣០ភាគរយ លើសថ្ងៃធម្មតាដែលតម្លៃនេះមិនកើនឡើងហួសហេតុពេកនោះទេ ប៉ុន្តែយ៉ាងណាក៏ ដោយក៏មានផ្ទះសំណាក់ និងសណ្ឋាគារមួយចំនួនតូចបានបង្កើនតម្លៃខ្ពស់ជ្រុលផងដែរ។

បច្ចុប្បន្នសណ្ឋាគារនៅខេត្តកំពតមានចំនួន៨ និងផ្ទះសំណាក់ចំនួន១១០កន្លែង ដែលមាន ជាង ២០០០បន្ទប់។ លោក ស៊ីណុល បានឲ្យដឹងទៀតថា ក្រៅពីខេត្តកំពតភ្ញៀវក៏អាចទៅស្នាក់នៅខេត្តកែប ដែលនៅក្បែរគ្នានេះ និងកន្លែងស្នាក់នៅ ជាង១០០០បន្ទប់បន្ថែមទៀត។

កញ្ញា យ៉ន មីនា ជាបុគ្គលិកបម្រើការនៅផ្ទះសំណាក់យីហោ ហង្សមាន ខេត្ត កំពតបានឲ្យដឹងថា មកទល់នឹងថ្ងៃម្សិលមិញផ្ទះសំណាក់របស់នាងត្រូវបានភ្ញៀវកក់បន្ទប់អស់ទៅហើយសម្រាប់ការស្នាក់នៅថ្ងៃទី១២ ធ្នូ ប៉ុន្តែចំពោះថ្ងៃទី១១ និងថ្ងៃទី ១៣ ត្រូវបានកក់ស្ទើរតែអស់ហើយដែរ។

កញ្ញាបញ្ជាក់ថា តម្លៃជួលបន្ទប់បាន ហក់ឡើងដល់ទៅ ២០ទៅ ២៥ដុល្លារក្នុង មួយបន្ទប់ដែលតម្លៃនេះគឺខ្ពស់ជាងថ្ងៃធម្មតាពី៧ ទៅ ១៥ដុល្លារ។ កញ្ញានិយាយ ថា ទោះបីតម្លៃបន្ទប់ហក់ឡើងខ្ពស់បន្តិចក្តី ប៉ុន្តែពុំមានការត្អួញត្អែរពីភ្ញៀវនោះទេ។

ចំណែកតម្លៃម្ហូបអាហារវិញលោក សយ ស៊ីណុល បានឲ្យដឹងថា មន្ទីរទេសចរណ៍ និងអាជ្ញាធរខេត្តបានធ្វើការណែនាំឲ្យអាជីវករលក់ម្ហូបអាហារក្នុងខេត្តលក់ក្នុងតម្លៃសមរម្យដើម្បីចៀសវាង ប៉ះពាល់ដល់ អារម្មណ៍អ្នកទេសចរមកទស្សនាព្រឹត្តិការណ៍បុណ្យសមុទ្រនេះ។ លោកបន្ថែមថា បុណ្យសមុទ្រឆ្នាំនេះនឹងមានរៀបចំនូវព្រឹត្តិការណ៍ជាច្រើនដូចជា ការសម្តែង សិល្បៈ ការប្រកួតកីឡា និង ការតាំងបង្ហាញផលិតផល និងម្ហូបអាហារ ដែលមានការចូលរួមពីប្រទេសថៃ និង វៀតណាមផងដែរ។

តាមលោក ថោង ខុន រដ្ឋមន្ត្រីក្រសួងទេសចរណ៍បានអះអាងនាពេលកន្លងមកថា ព្រឹត្តិការណ៍បុណ្យសមុទ្រនៅខេត្តកំពតឆ្នាំ ២០១៥នេះនឹងទាក់ទាញអ្នកចូលរួមមិន តិចជាង ៣០ទៅ ៤០ ម៉ឺននាក់ឡើយ។

កាលពីឆ្នាំ ២០១៤កន្លងទៅ ពិធីបុណ្យសមុទ្រនៅក្នុងខេត្តកោះកុងទទួលបានភ្ញៀវមកទស្សនាប្រមាណ ១០ម៉ឺននាក់ ប៉ុណ្ណោះដែលទាបជាងការរំពឹងទុក៕

អត្ថបទ៖ ភិរុណ ប្រភព៖ thekhmerdaily