ធី ណាតា ខ្សឹបប្រាប់ Sabay ទាំងសើចថាចង់បានប្ដីឆាប់ៗ
- 2015-12-25 18:29:50
- ចំនួនមតិ 0 | ចំនួនចែករំលែក 0
ធី ណាតា ខ្សឹបប្រាប់ Sabay ទាំងសើចថាចង់បានប្ដីឆាប់ៗ
ចន្លោះមិនឃើញ
“ខ្ញុំចង់រៀបការនៅឆ្នាំ ២០១៦ ឆាប់ៗនេះ បើមិនរៀបការទេខ្លាចអត់ប្ដីណាស់ (សើច)" ។ នេះជាការលើកឡើងរបស់តារាចម្រៀង ធី ណាតា មកកាន់ Sabay ។ នាងអះអាងថា បានត្រៀមរួចរាល់ហើយ ដើម្បីរៀបចំពិធីភ្ជាប់ពាក្យតាមប្រពៃណីជាមួយបុរសពោះម៉ាយវ័យ ៤២ ឆ្នាំ ដោយគ្រោងចំណាយប្រហែល ៧ ០០០ ដុល្លារ ឬ ៨ ០០០ ដុល្លារ។
តារាចម្រៀងរូបនេះបន្ថែមថា តាមពិតទៅ គ្រូហោរាបានគន់គូរតម្រូវឱ្យពួកគេរៀបការនៅខែមករាដើមឆ្នាំ ២០១៦តែម្ដង។ ប៉ុន្តែអ្នកទាំងពីរបដិសេធ ព្រោះរៀបចំខ្លួនមិនទាន់ ហើយត្រូវពន្យារហូតដល់ចុងឆ្នាំវិញ។ ទោះបីជាយ៉ាងនេះក្ដីតារាចម្រៀងដដែលអះអាងថា នាងមិនបានទាមទារថ្លៃបណ្ណាការពីមន្ត្រីក្រសួងមហាផ្ទៃរូបនោះទេ ហើយបន្ទាប់ពីភ្ជាប់ពាក្យពួកគេ នឹងបើកកន្លែងរកស៊ីចូលគ្នាតែម្ដង។
ជាមួយគ្នានោះ ប្អូនស្រីជីដូនមួយរបស់នាង ឆៃលី ដាឡែន ខាងលើ បានរំលឹកថា អ្នកទាំងពីរទើបបានស្គាល់គ្នាបាន ៤- ៥ខែកន្លងមក ហើយបានចាប់ផ្ដើមស្រឡាញ់គ្នាមួយរយៈចុងក្រោយ។ តារាស្រីវ័យ ២៨ ឆ្នាំដដែលបានបញ្ជាក់ថា ការសម្រេចចិត្តភ្ជាប់ពាក្យឆាប់ៗដូច្នេះ ក៏ព្រោះតែស្គាល់ចិត្តគ្នាទៅវិញទៅមកច្បាស់លាស់អស់ហើយ។ តារាចម្រៀងរូបនេះអះអាងថា ម្ចាស់ស្នេហ៍របស់នាងជាមនុស្សល្អ ហើយមិនគិតពីអតីតកាលរបស់នាង ដែលធ្លាប់មានសង្សារពីមុនមកទេ។
តារាចម្រៀងដដែលអះអាងម្យ៉ាងទៀតថា បុរសម្ចាស់ស្នេហ៍ ដែលទើបស្គាល់គ្នាខាងលើ ក៏បានលែងលះជាមួយអតីតភរិយាដាច់ស្រេចហើយដែរ ក្រោមអំណាចសាលក្រមតុលាការ។ នេះ ក៏ជាមូលហេតុមួយ ដែលពួកគេយល់ព្រមបង្កាត់ភ្លើងស្នេហ៍ជាមួយគ្នារហូតរៀបចំគម្រោងធ្វើពិធីភ្ជាប់ពាក្យ ខណៈសមាជិកក្នុងក្រុមគ្រួសារទាំងអស់ ក៏ពេញចិត្តអនាគតគូដណ្ដឹងរបស់នាងដែរ៕
អត្ថបទ៖ទ្រី រ៉ាវី