ស៊ីម៉ាក់ មានដី២កន្លែងសម្រាប់កសាងកីឡដ្ឋាន ខ្វះតែដៃគូសហការ

2015-12-30 16:29:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លិបបាល់ទាត់មជ្ឈមណ្ឌលកម្ចាត់មីនកម្ពុជា( ស៊ីម៉ាក់) មានដី២កន្លែងដែលមានទំហំ ៤ទៅ៥ហិតានៅខេត្តត្បូងឃ្មុំ និងកំពង់ឆ្នាំង ដើម្បីត្រៀមសាងសង់កីឡដ្ឋានបាល់ទាត់ផ្ទាល់ខ្លួន ប៉ុន្តែអ្វីដែលជាឧបសគ្គសម្រាប់ក្រុមមួយនេះគឺខ្វះដៃគូសហការ។

លោក មួន វាសនា អគ្គលេខាធិការក្លិបបាល់ទាត់ស៊ីម៉ាក់បានបញ្ជាក់ឱ្យដឹងថា ក្រុមហ៊ុនជប៉ុនដែលជាដៃគូសហការលើកមុននោះ គឺពួកគេគ្រាន់តែអាចជួយក្រុមបង្កើតជាកន្លែងតូចៗសម្រាប់កុមារហាត់បាល់ទាត់ប៉ុណ្ណោះ ដោយពួកគេមិនអាចជួយដល់ការសាងសង់កីឡដ្ឋានលក្ខណៈស្តង់ដារបានឡើយ។ ដោយបច្ចុប្បន្នក្លិបត្រូវស្វែងរកដៃគូសហការដទៃទៀត ដើម្បីសម្រេចការសាងសង់កីឡដ្ឋានផ្ទាល់ខ្លួនបាន។

លោក វាសនា បានបន្តទៀតថា បច្ចុប្បន្ននេះក្លិបមានកន្លែង២ ដែលមានទំហំផ្ទៃដីពី ៤ទៅ៥ហិតា ពោលគឺអាចសាងសង់កីឡដ្ឋានបានយ៉ាងស្អាត ដោយត្រូវការតែអ្នកជួយជ្រោមជ្រែងផ្ដល់ជាថវិកាបន្ថែមទៀតតែប៉ុណ្ណោះ។ បុរសរូបនេះបានបង្ហើបទៀតថា ដី២កន្លែងនោះនៅត្បូងឃ្មុំ ម្ដុំថ្នល់ទទឹងមួយកន្លែង និងមួយកន្លែងទៀតនៅខេត្តកំពង់ឆ្នាំង ម្ដុំវាលវង់ព្រលានយន្តហោះខេត្តកំពង់ឆ្នាំតែម្ដង។

ក្លិបស៊ីម៉ាក់មានគ្រឿងចក្រខ្លួនឯង បានឈូសឆាយដីទាំងពីរកន្លែងខាងលើរាបស្មើរួចអស់ទៅហើយ ដោយបច្ចុប្បន្នមានប្រជាជន ក៏ដូចជាយុវជនជាច្រើនតែងតែយកកន្លែងនេះដើម្បីលេងបាល់ទាត់ លក្ខណៈតាមភូមិ។ ដូច្នេះ លោក មួន វាសនា បានបញ្ជាក់ថា ក្លិបត្រូវការតែដៃគូសហការបន្ថែមទៀតប៉ុណ្ណោះគឺអាចដំណើរការសាងសង់កីឡដ្ឋានមួយបានទៅហើយ (តាមគម្រោងអាចអស់ពី៣ម៉ឺនទៅ៥ម៉ឺនដុល្លារ)។

ដូច្នេះប្រសិនបើប្រិយមិត្តណា ចង់ជួយក្លិបដែលទើបតែបានឡើងមកលេងនៅលីគកំពូលកម្ពុជារដូវកាលមុននេះ អាចទំនាក់ទំនងទៅលោក ហាន ស៊ីភូ ជំនួយការក្លិបផ្ទាល់តាមលេខទូរសព្ទ ០៧៧ ៧៧៧ ៩១៩ ៕

អត្ថបទ៖ មុន្នី រម្យ