រមណីយដ្ឋានទេសចរណ៍វប្បធម៌ភ្នំឈ្ងោក

2016-01-30 12:36:33
ចំនួនមតិ 0 | ចំនួនចែករំលែក 0

ចន្លោះមិនឃើញ

មើលពីចម្ងាយភ្នំឈ្ងោកប្រៀបបានដូចទៅដុំថ្មដ៏ធំមួយ ព្រោះបើយើងបានទៅដល់ជិត យើងនឹងសង្កេតឃើញភ្នំនេះសុទ្ធតែថ្មទាំងអស់ សឹងមិនមានដីសោះ និងម៉្យាងទៀតវាមិនមានជម្រាលជើងភ្នំធម្មតានោះទេ គឺមានថ្មដុះឡើងពីដីតែម្តង។

មានផ្លូវច្រើនដែលអាចចូលទៅដល់រមណីយ៍ដ្ឋានភ្នំឈ្ងោក។

-ទីមួយតាមផ្លូវជាតិលេខ ៣ ត្រង់គីឡូម៉ែត្រទី ១៣៣ មានប្រឡាយមួយ គឺអ្នកទេសចរណ៍ចូលតាមមាត់ប្រឡាយខាងលិច។ ផ្លូវទី១ នេះមានប្រវែងប្រមាណជា៣គីឡូម៉ែត្រ អ្នកនឹងឃើញស្លាកសំគាល់ភ្នំឈ្ងោក រួចបត់មកតាមមាត់ប្រឡាយខាងកើតវិញ ដោយធ្វើដំណើរ១គីឡូម៉ែត្រទៀតទើបដល់។ -ផ្លូវទី២ ចូលតាមខ្លោងទ្វារវត្តកំពូលមាស ហួសផ្លូវចូលរោងចក្រស៊ីម៉ងត៍ចក្រីទីង ប្រមាណជា១០០ម៉ែត្រ (ទិសដៅពីភ្នំពេញ) ទៅត្រង់ប្រមាណជា ៣គីឡូម៉ែត្រ ដល់ផ្លូវបំបែកជា ៤ អ្នកនឹងឃើញស្លាកសញ្ញា រមណីយ៍ដ្ឋានភ្នំឈ្ងោក។ -ទី៣ មកពីស្រុកកំពត ប្រវែង ១២គីឡូម៉ែត្រ និងទី៤ តាមផ្លូវទៅខេត្តកែប ស្រុកដំណាក់ចង្អើរ។

បើតាមសម្តីរបស់លោក តន់ សុខុន ជាមន្ត្រីក្រសួងវប្បធម៌ប្រចាំភ្នំឈ្ងោកបានឲ្យដឹងថា ភ្នំឈ្ងោកត្រូវបានរៀបចំអភិវឌ្ឍន៍តាំងពីឆ្នាំ ២ ០០០ មក ហើយបច្ចុប្បន្នភ្នំឈ្ងោកបាននឹងកំពុងទទួលអ្នកទេសចរទាំងជាតិ និងអន្តរជាតិមកទស្សនាកម្សាន្តឥតដាច់។

លោកបាននិយាយថា ជារៀងរាល់ថ្ងៃមានភ្ញៀវទេសចរបរទេសមកលេងរាល់ថ្ងៃមិនដែលដាច់នោះទេ ដោយឡែកភ្ញៀវជាតិច្រើនមកលេងនៅរដូវបុណ្យដូចជាបុណ្យចូលឆ្នាំ បុណ្យភ្ជុំជាដើម ឯថ្ងៃធម្មតាមិនសូវមានទេ។ ក្នុងការទស្សនាភ្នំនេះ ភ្ញៀវជាតិមិនតម្រូវឲ្យបង់ប្រាក់ទេ ខណៈភ្ញៀវអន្តរជាតិត្រូវចំណាយប្រាក់ ១ដុល្លារ សម្រាប់ការទស្សនា។

តើភ្នំឈ្ងោកមានអ្វីពិសេស ដែលធ្វើឲ្យភ្ញៀវបរទេសមកទស្សនាមិនដាច់សោះយ៉ាងនេះ?

លោក តន់ សុខុន បានប្រាប់ថា ពីលក្ខណៈពិសេសរបស់ភ្នំឈ្ងោកដូចជា

-ប្រាសាទភ្នំឈ្ងោក៖ នៅលើភ្នំមានរូងថ្មដ៏ធំមួយ ដែលក្នុងនោះមានប្រាសាទមួយសង់ពីឥដ្ឋ ដែលមានទទឹងប្រមាណជា ៣ម៉ែត្រ និង កម្ពស់ប្រមាណជា ៤ម៉ែត្រ។ ប្រាសាទនេះមិនសូវជាមានក្បាច់រចនាច្រើននោះទេ តែគេអាចឃើញមានក្បាច់សល់ប្រហែល ១ភាគ លើផ្តែរនៃប្រាសាទ។ ប្រាសាទនេះ ត្រូវបានសាងសង់ឡើងក្នុងសតវត្យទី ៦។ -ថ្មមានរាងជាសត្វ៖ ថ្មក្នុងរូងភ្នំជាថ្មធម្មជាតិ តែវាមានរាងជាសត្វក្រពើ ដំរី (មេ និង កូនដំរី) និងបក្សី។ -កន្លែងសត្វប្រចៀវដេក៖ ចូលតាមរូងថ្មដែលនៅជើងភ្នំដែលភ្ជាប់ដោយស្ពាន (សសរ) ទៅមើលកន្លែងប្រចៀវដេក -ថ្មចាំង៖ តាមផ្លូវជាមួយគ្នានឹងកន្លែងប្រចៀវ អ្នកនឹងទៅដល់កន្លែងមួយដែលហៅថា ថ្មពេជ្រ នៅពេលបញ្ចាំងភ្លើង អ្នកនឹងឃើញមានពន្លឺចាំងផ្លេកៗដូចពេជ្រ។