Sleeping Trees អារម្មណ៍ ថ្មីនៅពេលចូលនិន្ទ្រា នៅកោះរ៉ុង

2016-02-02 20:51:08
ចំនួនមតិ 0 | ចំនួនចែករំលែក 0

ចន្លោះមិនឃើញ

កោះរ៉ុងសន្លឹមមានកន្លែងស្នាក់នៅ ផ្ទះសំណាក់ និង បឹងកាឡូជាច្រើន ដែលមានរចនាបថ និងការចៃ្នប្រឌិតផ្សេងៗគ្នា រីឯសេវាកម្ម និងតម្លៃមានទៅតាមតម្រូវការភ្ញៀវទេសចរ។

ដោយឡែក គេឃើញរមណីយដ្ឋានមួយនៅកោះរ៉ុងសន្លឹម ដែលហៅថា “Sleeping Trees” ហាក់មានការច្នៃប្រឌិតបែបប្លែកពីគេ ដោយមានតង់ចងភ្ជាប់នឹងដើមឈើ សម្រាប់គេងនៅពេលយប់។ គួរឲ្យដឹងដែរថា តង់នីមួយៗ អាចផ្ទុកមនុស្សបាន ៣ នាក់ និងទ្រទម្ងន់បាន ៥០០គីឡូក្រាម ហើយគេចងភ្ជាប់នឹងដើមឈើក្នុងព្រៃលើដីកោះ។ នៅក្បែរតង់នោះផងដែរគេមានផ្ដល់ជូនខ្នើយ ភួយ កន្សែងពោះគោ ពិលបំភ្លឺនៅពេលយប់ និង ប្រអប់ដែកសម្រាប់ដាក់ឥវ៉ាន់ដោយមានសោរសុវត្ថិភាព។ ការជ្រើសរើសគេងនៅក្នុងតង់នោះមានតម្លៃ ៣០ដុល្លា ឬក្នុងម្នាក់ ១០ដុល្លា ក្នុងមួយយប់។

ប្រអប់ដែកសម្រាប់ដាក់ឥវ៉ាន់

ក្រៅពីតង់ចងភ្ជាប់នឹងដើមឈើ Sleeping Trees ក៏មានតង់បោះនៅលើឆ្នេរសមុទ្រ និងបឹងកាឡូផង។ សម្រាប់បឹងកាឡូមានគ្រែមួយសម្រាប់មនុស្សពីរនាក់ បន្ទប់ទឹកឯកជន និងសំយ៉ាបខាងមុខបែរមុខទៅរកសមុទ្រ ដែលមានតម្លៃ ៦០ ដុល្លា ក្នុងមួយយប់។

ដើម្បីទៅដល់ Sleeping Trees គេត្រូវធ្វើដំណើរតាមរយៈកាណូត ដោយចំណាយពេលប្រមាណជា ៤៥នាទីពីកំពង់ផែក្រុងព្រះសីហនុ ទៅកាន់កោះរ៉ុងសន្លឹម ក្នុងតម្លៃសំបុត្រក្នុងម្នាក់ ១៥ដុល្លា សម្រាប់ទៅនិងមក។ រួចគេត្រូវធ្វើដំណើរឆ្លងកាត់ព្រៃដោយថ្មើរជើងដោយប្រើរយៈពេលប្រមាណជា ៤០នាទីទៀត ដើម្បីទៅដល់រមណីយដ្ឋាននោះ។ ប្រសិនបើមិនចង់ដើរឆ្លងកាត់ព្រៃនោះទេ គេអាចធ្វើដំណើរបានដោយផ្ទាល់ពីកំពង់ផែក្រុងព្រះសីហនុ ទៅកាន់ Sleeping Trees តែម្តង តាមរយៈទូកឯកជនរបស់ The Dive Shop Cambodia ដែលសំបុត្រលក់ក្នុងតម្លៃ ២០ដុល្លា សម្រាប់អ្នកដំណើរម្នាក់ ទាំងទៅនិងមក៕