ទូរសព្ទបង្ខិតពិភពលោក តែបង្កើតភាពសោះកក្រោះសម្រាប់ការរស់នៅ
- 2016-02-03 16:53:06
- ចំនួនមតិ 0 | ចំនួនចែករំលែក 0
ទូរសព្ទបង្ខិតពិភពលោក តែបង្កើតភាពសោះកក្រោះសម្រាប់ការរស់នៅ
ចន្លោះមិនឃើញ
បច្ចេកវិទ្យាទូរសព្ទកំពុងតែរីកចម្រើនដល់កំពូលក្នុងពេលបច្ចុប្បន្ន។ ទូរសព្ទបានក្លាយជាឧបករណ៍ដ៏សំខាន់ដែលមនុស្សគ្រប់គ្នាប្រើប្រាស់ដើម្បីការកម្សាន្តនិងបម្រើក្នុងជីវភាពរស់នៅប្រចាំថ្ងៃ។ មានសំនួរសួរថា តើទូរសព្ទកំពុងផ្លាស់ប្តូរសង្គមរស់នៅដោយធ្វើឲ្យមនុស្សរស់នៅកាន់តែខិតជិតរកគ្នាឬធ្វើឲ្យទំនាក់ទំនងគ្នាកាន់តែឃ្លាតឆ្ងាយពីគ្នា?
មានការលើកឡើងខុសៗគ្នានិងក៏មានហេតុផលត្រឹមត្រូវដូចគ្នា។ បានជាគេថាទូរសព្ទធ្វើឲ្យសង្គមមនុស្សរស់នៅកាន់តែខិតជិតរកគ្នា ដោយសារទូរសព្ទបានប្រែក្លាយពិភពលោកដ៏ធំទូលាយដូចស្ថិតនៅក្នុងបាតដៃ។ គ្រប់ទីកន្លែងគ្រប់ពេលវេលា អ្នកអាចប្រើទូរសព្ទទំនាក់ទំនងគ្មានដែនកំណត់ ទោះបីស្ថិតនៅជ្រុងណាមួយនៃពិភពលោក។
គេប្រៀបធៀបទូរសព្ទដូចត្រចៀកទិព្វដែលអាចស្តាប់ឮដ៏សែនឆ្ងាយ ដែលមនុស្សសម័យបុរាណតែងតែស្រមៃថានឹងក្លាយជាការពិតនៅថ្ងៃណាមួយ។ ទូរសព្ទបានសម្រួលជីវភាពរស់នៅរបស់មនុស្សកាន់តែប្រសើរ នាំការអភិវឌ្ឍដល់សេដ្ឋកិច្ចឈានឆ្ពោះទៅរកភាពជឿនលឿន។
ប៉ុន្តែក៏មានការលើកឡើងដោយអំណះអំណាងត្រឹមត្រូវដែរថាដោយសារតែបច្ចេកវិទ្យាទូរសព្ទរីកចម្រើនខ្លាំងពេក បាននាមផលអវិជ្ជមានគឺពីមួយថ្ងៃទៅមួយថ្ងៃ ការទំនាក់ទំនងគ្នាកាន់តែលែងមានភាពស្និទ្ធស្នាល។
អង្គុយជិតគ្នា តែអារម្មណ៍បែរជាផ្ដោតទៅលើទូរសព្ទ។ គ្រួសារនៅជុំគ្នា តែបាត់អស់សំឡេងរីករាយ ដោយសារម្នាក់ៗរវល់ចុចទូរសព្ទរៀងៗខ្លួន។ ពីមុនការជួបជុំគ្នាម្តងៗតែងតែបង្កើតក្តីសប្បាយរីករាយការសំណេះសំណាលសួរសុខទុក្ខគ្នា ប៉ុន្តែនៅពេលដែលមានទូរសព្ទក្នុងដៃ ម្នាក់ៗហាក់បីដូចជាកំពុងស្ថិតនៅឆ្ងាយពីគ្នាបើទោះបីពួកស្ថិតនៅទល់មុខគ្នាក៏ដោយ។
ពីមុនមានពាក្យមួយគេនិយមហៅផលិតផលទូរសព្ទ Nokia គឺ Nokia Connecting People។ ប៉ុន្តែឈានដល់សម័យកាលថ្មីនៃការចាប់កំណើតនៃ Smartphone គេក៏បានបង្កើតពាក្យថ្មីមួយទៀតគឺ Smartphone Disconnect People។
ការបង្កើតពាក្យហៅថ្មី Smartphone Disconnect People ដោយសារគេមើលឃើញការទំនាក់ទំនងគ្នាមនុស្សម្នាក់ៗនៅក្នុងសង្គមកាន់តែឃ្លាតឆ្ងាយពីគ្នា ដោយសារតែភាពទំនើបនិងសំបូរបែបនៃ Smartphone។ ការនិយាយរកគ្នាហាក់លែងសូវមានភាពស្និទ្ធស្នាលដូចមុនដោយសារតែទូរសព្ទបានផ្លាស់ប្តូរទម្លាប់ការរស់នៅ ធ្វើឲ្យការជួបជុំគ្នាកាន់តែតិចជាងមុននិងការទំនាក់ទំនងកាន់តែសោះកក្រោះ។
តើយើងគួរតែមានការគ្រប់គ្រងការប្រើប្រាស់ទូរសព្ទយ៉ាងដូចម្ដេចទៅ? នេះជាបញ្ហាដែលត្រូវគិតពិចារណា។ តើយើងអាចរស់នៅដោយគ្មានទូរសព្ទដែលជាបណ្តាញតភ្ជាប់ដ៏ចាំបាច់សម្រាប់ការទំនាក់ទំនងក៏មិនអាចទៅរួចដែរ។ វិធីដ៏ប្រសើរបំផុតគឺការចេះគ្រប់គ្រងនិងការប្រើប្រាស់ឲ្យសមស្របតាមកាលៈទេសៈ ដើម្បីកុំឲ្យទូរសព្ទផ្លាស់ប្តូរទម្លាប់ល្អនិងធ្វើឲ្យជីវិតរស់នៅកាន់តែមានភាពរស់វើកឡើងវិញ។
ប៊ុណ្ណារ៉ា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
