បើកពិធីក្រុងពាលីរឿង "ជំនួញអាគម"

2016-02-04 22:21:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តខ្នាតធំថ្មីមួយទៀតរបស់ផលិតកម្ម Rock មានចំណងជើងថា "ជំនួញអាគម" បានធ្វើពិធីក្រុងពាលីកាលព្រឹកមិញ ដោយខ្សែភាពយន្តនេះជាស្នាដៃនិពន្ធលើកដំបូង របស់លោក ព្រំ ស្រស់ អ្នកមើលការងារទូទៅនៃផលិតកម្មមួយនេះតែម្ដង។

លោក ព្រំ ស្រស់ បានឲ្យដឹងថា រឿង "ជំនួញអាគម" ជាខ្សែភាពយន្តមួយដែលនិយាយ ពីអ្នកលេងល្បែងម្នាក់ ជឿទៅលើមន្តអាគមអូមអាម ហើយបានពឹងគ្រូអាគមអូមអាមជួយ។ វាជារឿង បែបកំប្លែង ភ័យរន្ធត់ មានបង្កប់ខ្លឹមសារអប់រំ ច្រើនផងដែរ ។

អ្នកមើលការងារទូទៅរូបនេះបានលើកឡើងឲ្យដឹងទៀតថា ខ្សែភាពយន្តមួយនេះ លោកបាននិពន្ធ១ឆ្នាំមកហើយ ទើបតែសម្រេចដាក់ឲ្យលោក យឹម សុសត្យា អ្នកគ្រប់គ្រងការផលិតរបស់ផលិតកម្ម Rock ពិនិត្យសម្រេច។ ដោយមើលឃើញថា សាច់រឿងមួយនេះ មានភាពទាក់ទាញទើប ផលិតកម្មបានសម្រេច ថតយកតែម្ដងទៅ។

តារាសម្ដែងនៃខ្សែភាពយន្តមួយនេះភាគច្រើនជាតារាកំប្លែងល្បីក្នុងនោះមានដូចជា នាយគ្រឿន នាយក្រូច នាយហុងដា នាយតេឡេ នាយ តាក់ស៊ី នាយសេត នាយសានម៉ៃ នាង ភីម អ្នកនាយ កាឆយ អ្នកនាង ម៉ៅ ស៊ីណាត កញ្ញា គង់ ចាន់រដ្ឋ និង តារាកិត្តិយស ជាច្រើនទៀត។ តាមការលើកឡើងរបស់លោក ព្រំ ស្រស់ តូអង្គដែលសម្ដែងនៅក្នុងខ្សែភាពយន្តមួយនេះសុទ្ធតែជាតួសំខាន់ៗទាំងអស់ ព្រោះម្នាក់ៗមានប្លង់ថតច្រើនដូចគ្នា ។

លោក ព្រំ ស្រស់

រឿង"ជំនួញអាគម" គ្រោងចេញថតក្រោយពីចូលឆ្នាំចិនរួច ដោយពេលវេលានៃ ការថត គឺមានរយៈពេលតែ១៩ថ្ងៃប៉ុណ្ណោះ ដោយទីតាំងនៃការថត មាននៅ ភ្នំពេញ ភ្នំបាសិត និង ខេត្ត កពត។ ការចំណាយនៃការផលិតខ្សែភាពយន្តមួយនេះ យឹម សុសត្យា អ្នកគ្រប់គ្រងការផលិតនៅ Rock បានប្រាប់ថា អស់ប្រមាណជា៧ម៉ឺនដុល្លារ៕