ផល ពៅវីរ័ត្ន ថារូបរាងមិនទាន់ឥតខ្ចោះ អត់ចេញទៅបរទេស

2016-02-18 18:12:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ទស្សនិកជនប្រាកដជាបានស្គាល់រួចមកហើយថា ផល ពៅវីរ័ត្ន គឺជាតារាម៉ូដែលរូបរាងស្រស់សង្ហា តែសម្រាប់សាមីខ្លួនវិញបែរជានិយាយថារូបរាងលោកប៉ុណ្ណេះមិនទាន់សង្ហាគ្រប់គ្រាន់ និងល្អឥតខ្ចោះ សម្រាប់ចេញទៅដើរម៉ូដនៅបរទេសឡើយ។

និស្សិតសាកលវិទ្យាល័យជាតិគ្រប់គ្រងខាងលើថ្លែងប្រាប់បែបនេះ ក្រោយមានភ្នាក់ងារទាក់ទងតារានៅប្រទេសថៃ ធ្លាប់មកទាក់ទងរូបលោកឲ្យទៅដើរម៉ូដនៅទីនោះដែរ។ តែ រ័ត្ន បែរជាបដិសេធ និងបានបញ្ជាក់ហេតុផលថា "ធម្មតាទេអូន ពេលមានគេទាក់ទងឲ្យទៅដើរ Show នៅក្រៅប្រទេសចឹងសប្បាយចិត្តខ្លាំងណាស់ តែបងមិនទៅទេ ព្រោះបងគិតថារូបរាងបងមិនទាន់ល្អឥតខ្ចោះដូចតារាម៉ូដែលរបស់គេឡើយ។”

តារាមានស្រុកកំណើតនៅរាជធានីភ្នំពេញរូបនេះ បន្តទៀតថា បើចេញទៅដើរម៉ូដនៅក្រៅមែន ទាល់តាលោកមានរូបរាងសង្ហាជាងនេះ ជាពិសេសគឺសាច់ដុំពោះត្រូវតែមាន Six pack ទើបមើលទៅមានលក្ខណៈគ្រប់គ្រាន់ដើម្បីប្រកួតប្រជែងជាមួយបរទេស។ តែបើទៅពេលនេះ គឺមានតែនាំឲ្យបាក់មុខប្រទេសកំណើតទេ។ "ខ្ញុំចង់ចេញទៅ ហើយឲ្យបរទេសកោតសរសើរខ្មែរយើងថា មានទាំងសមត្ថភាព និងរូបសម្បត្តិគ្រប់គ្រាន់មិនចង់ចេញទៅឲ្យនិយាយថាខ្មែរអន់ទេ។” ផល ពៅវីរ័ត្ន បន្ថែម។

ផល ពៅវីរ័ត្ន បានរៀបរាប់លក្ខណៈសម្បត្តិខ្លះៗថា ខ្លួនមានកម្ពស់ ១,៨០ ម៉ែត្រ ទម្ងន់ ៧០ គីឡូក្រាម និងមានសាច់ដុំពោះ Four pack ហើយលោកកំពុងតែព្យាយាមហាត់ប្រាណ២ម៉ោងក្នុងមួយថ្ងៃដើម្បីបាន Six pack ដើម្បីឲ្យមានរូបរាងត្រូវស្តង់ដារ៕