សុខ ដែន ទម្លាយតម្លៃខ្លួនថតរឿង“ហ្លួងព្រះស្ដេចកន ”

2016-02-25 16:37:58
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងតិចបំផុតទឹកប្រាក់ជិត៤០០០ដុល្លារ ត្រូវបានតារាសម្ដែងល្បីខាងក្បាច់គុន លោក សុខ ដែន ទទួលពីការថតខ្សែភាពយន្តរឿង “ហ្លួងព្រះស្ដេចកន ” នេះបើតាមការបញ្ជាក់ឲ្យដឹងពីសាមីខ្លួនប្រាប់ Sabay ព្រឹកនេះ។

នៅក្នុងខ្សែភាពយន្តប្រវត្តិសាស្ត្រដែលល្បីថា គ្រោងចំណាយរហូតដល់ខ្ទង់លានដុល្លារនេះ លោក សុខ ដែន គឺជាតួរង ដោយតួអង្គលោកសម្ដែងនោះមានឈ្មោះថា វៀង មានតួនាទីជាដៃស្ដាំរបស់ស្ដេចកន។ តារាដែលធ្លាប់មានប្រវត្តិស្នាក់នៅវត្តម្នាក់នេះ សូមមិនពន្យល់លំអិតពីសាច់រឿងទាំងមូលឡើយ ដោយគ្រាន់តែប្រាប់ថា ប្លង់របស់ខ្លួនមានច្រើនថ្ងៃ ពោលគឺតាំងពីចំណុចចាប់ផ្ដើមនៃសាច់រឿងរហូតដល់វគ្គបញ្ចប់តែម្ដង។

"ដំបូងឡើយគេគិតឲ្យខ្ញុំ១រឿងនេះ ២៨០០ ដុល្លារតែ ខ្ញុំទារគាត់៣ពាន់ ហើយក្រោយមក គេក៏គិត តាមថ្ងៃឲ្យខ្ញុំវិញ បើគិតទៅទម្រាំដល់ចប់ខ្ញុំអាចបានជិត៤ពាន់អីដែរ" លោក សុខ ដែន ថ្លែង។

តារាក្បាច់គុនម្នាក់នេះ បានបន្ថែមទៀតថា ជាទូទៅប្រសិនបើខ្សែភាពយន្តថតតិចថ្ងៃ លោកគិតក្នុង១ថ្ងៃ១៥០ ដុល្លារ ហើយបើរឿងខ្នាតធំលោកយក១៥០០ដុល្លារក្នុងមួយរឿង ប៉ុន្តែដោយខ្សែភាពយន្តរឿង "ហ្លួងព្រះស្ដេចកន " ជារឿងប្រវត្តិសាស្ត្រ ហើយថតច្រើនថ្ងៃ លោកបានចុះមកត្រឹមតែ៦០ ដុល្លារប៉ុណ្ណោះក្នុងមួយថ្ងៃ។

តាមការលើកឡើងរបស់ សុខ ដែន ខ្សែភាពយន្តប្រវត្តិសាស្ត្រដែលវិនិយោគថវិកាដោយស្ថាបនិកទូរទស្សន៍ PNN មួយនេះ បានថត២០ទៅ៣០ ភាគរយហើយ ដោយនៅក្នុងនោះ ប្លង់របស់លោកថតបានជាង១០ថ្ងៃ។ តាមផែនការខ្សែភាពយន្តខាងលើ គ្រោងថតចំនួន៤ខែ ទើបបញ្ចប់៕