2NE1 ត្រូវក្រុមចម្រៀងជំនាន់ក្រោយបំបែកកំណត់ត្រាបាន

2016-03-01 17:53:19
ចំនួនមតិ 0 | ចំនួនចែករំលែក 0

ចន្លោះមិនឃើញ

មុននេះតែប៉ុន្មានថ្ងៃ កំណត់ត្រាវីដេអូចម្រៀងបទដំបូងដែលមានចំនួនអ្នកមើលច្រើនបំផុតគឺស្ថិតនៅក្នុងដៃក្រុមចម្រៀងនារី 2NE1 នៅឡើយ តែពេលនេះ ក្រុមចម្រៀង TWICE ដែលជាក្រុមចម្រៀងនារីថ្មីរបស់ JYP បានដណ្ដើមកំណត់ត្រានេះបាត់ហើយ។

2NE1 ក្រុមចម្រៀងសមាជិក ៤រូបរបស់ផលិតកម្មចម្រៀង YG Entertainment គឺជាក្រុមចម្រៀងលំដាប់ជួរមុខមួយរបស់វិស័យចម្រៀង K-Pop។ គេនៅចាំបានថានៅពេលតារាចម្រៀង៤រូបនេះបង្ហាញមុខដំបូង អ្នកគាំទ្រចម្រៀងកូរ៉េបានស្រលាញ់ចូលចិត្តពួកគេភ្លាមៗព្រោះពេញចិត្តចម្រៀងរបស់ស្រីស្អាតទាំង៤គឺខុសដាច់ស្រឡះពីក្រុមចម្រៀងនារីដទៃទៀត។ ជាមួយគ្នាផងដែរបទ "Fire” ដែលជាបទដំបូងរបស់ក្រុមនេះក៏បានធ្វើឲ្យ 2NE1 ទទួលបានការគាំទ្រយ៉ាងច្រើនលើសលុបពីសំណាក់មិត្តយុវវ័យផងដែរ។ ជាក់ស្ដែង មុននេះបន្តិច MV "Fire” គឺជាវីដេអូចម្រៀងបទដំបូងដែលមានចំនួនអ្នកទស្សនាច្រើនបំផុតនៅលើ Youtube ដោយមានចំនួន view រហូតដល់ ៤១,៤ លានដង។

យ៉ាងណាមិញ ពាក្យចាស់ថា "រលកក្រោយច្រានរលកមុខ" និង "ទំពាំងស្នងឫស្សី"។ មកដល់ពេលនេះ កំណត់ត្រាដែលធ្លាប់ស្ថិតក្នុងដៃក្រុមចម្រៀងរបស់ YG Entertainment រាប់ឆ្នាំហើយនោះ ត្រូវបានក្រុមចម្រៀងនារីផ្សេងបំបែកបានហើយ។ ក្រុមចម្រៀងដែលឆក់បានកំណត់ត្រារបស់ 2NE1 នោះគឺ TWICE ដែលជាក្រុមចម្រៀងនារីសមាជិក ៩ រូបថ្មីរបស់ផលិតកម្ម JYP។ ទើបតែបង្ហាញមុខដំបូងនៅចុងឆ្នាំ ២០១៥ តែប៉ុណ្ណោះតែ TWICE ទទួលបានការគាំទ្រលើសពីការរំពឹងទុក។

ជាក់ស្ដែងវីដេអូចម្រៀង "Fire” របស់ 2NE1 ដែលត្រូវចំណាយពេលរហូតដល់ទៅជាង ៦ ឆ្នាំទើបមានចំនូនអ្នកចូលមើល៤១,៤លានដងនោះ ត្រូវក្រុមចម្រៀងស្រករក្រោយនេះវ៉ាមុខយ៉ាងរំភើយនៅពេលវីដេអូចម្រៀង "Like OOH AHH” ដែលទើបតែចេញបានរយៈពេលតែប៉ុន្មានខែសោះ បែរជាមានចំនួនអ្នកចូលមើលរហូតដល់ទៅ ៤១,៥ លានដង។ ជាមួយនឹងប្រជាប្រិយភាពដ៏ធំបែបនេះគេរំពឹងថា MV “Like OOH AHH” នឹងក្លាយជាវីដេអូចម្រៀងបង្ហាញមុខមានអ្នកមើលច្រើនជាងគេនៅពេលអនាគតដោយអាចវ៉ាមុខ MV បង្ហាញមុខរបស់ក្រុមចម្រៀងបុរស NU'EST “FACE” ដែលមានចំនួនអ្នកទស្សនា ៤៦ លានដងនៅលើ Youtube៕