កម្ពុជាទទួលបានមេដាយ៤៦គ្រឿងពីការប្រកួតអន្តរជាតិឆ្នាំ២០១៤-២០១៥

2016-03-29 20:31:28
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមការបូកសរុបការងាររបស់ក្រសួងអប់រំ យុវជន និងកីឡា នៅឆ្នាំ២០១៤-២០១៥ កន្លងទៅបង្ហាញថា កម្ពុជាទទួលបានមេដាយសរុបចំនួន៤៦គ្រឿង ក្នុងនោះមាស ៩គ្រឿង ប្រាក់ ១១គ្រឿង និងសំរឹទ្ធ ២៦គ្រឿង។

ឯកឧត្ដមបណ្ឌិត ហង់ ជួន ណារ៉ុន

នៅព្រឹកថ្ងៃទី២៩ ខែមីនា ឆ្នាំ២០១៦នេះ ក្រសួងអប់រំ យុវជន និងកីឡា បានធ្វើពិធីបើកសន្និបាតបូកសរុបការងារអប់រំ យុវជន និងកីឡា ឆ្នាំ ២០១៤-២០១៥ កន្លងទៅ និងទិសដៅឆ្នាំ២០១៥-២០១៦ នេះនៅវិទ្យាស្ថានបច្ចេកវិទ្យាកម្ពុជា។ ក្នុងឱកាសនេះដែរ ឯកឧត្ដមបណ្ឌិត ហង់ ជួនណារ៉ុន បានបញ្ជាក់ឱ្យដឹងថាវិស័យកីឡានៅកម្ពុជាកំពុងតែមានការរីកចម្រើនច្រើន ដោយក្រសួងបានបញ្ជូនប្រតិភូកីឡា ទៅចូលរួមប្រកួតកីឡាជាលក្ខណៈអន្តរជាតិដូចជា ប៉េតង់ជើងឯកពិភពលោក និងអាស៊ីអាគ្នេយ៍ ដែលកម្ពុជាទទួលបានមេដាយមាស៥ ប្រាក់ ៦ និងសំរឹទ្ធ១០ ។

បញ្ជូនកីឡាករទៅប្រកួតកីឡាស៊ីហ្គេមលើកទី២៨ កម្ពុជាទទួលបានមេដាយមាស១ ប្រាក់៥ និងសំរឹទ្ធ៩។ ការប្រកួតកីឡាវូវីណាមជើងឯកពិភពលោកលើកទី៤ កម្ពុជាទទួលបានមេដាយមាស២ និងសំរឹទ្ធ១។ ជារួម កម្ពុជាទទួលបានមេដាយមាសពីការប្រកួតលក្ខណៈអន្តរជាតិចំនួន ៤៦គ្រឿង មាស ៩គ្រឿង ប្រាក់ ១១គ្រឿង និងសំរឹទ្ធ២៦គ្រឿង។

ទន្ទឹមនឹងនេះដែរ ឯកឧត្ដមបណ្ឌិត ហង់ ជួន ណារ៉ុន បានបញ្ជាក់ទៀតថា ក្រសួងបានធ្វើទំនើបកម្មទីលានបាល់ទាត់នៅពហុកីឡដ្ឋានជាតិ និងអភិវឌ្ឍហេដ្ឋារចនាសម្ព័ន្ធ កីឡានៅតាមរាជធានី ខេត្ត និងគ្រឹះស្ថានសិក្សានានា ក្នុងគោលបំណងអភិវឌ្ឍកីឡានៅកម្ពុជា៕

អត្ថបទ៖ មុន្នី រម្យ