ស្ថាប័នកីឡាកម្ពុជាកំពូលរៀបចំពិធីសូត្រមន្តដើម្បីសិរីសួស្តីឆ្នាំថ្មី

2016-04-07 23:45:11
ចំនួនមតិ 0 | ចំនួនចែករំលែក 0

ចន្លោះមិនឃើញ

គណៈកម្មាធិការជាតិអូឡាំពិកកម្ពុជានៅរសៀលថ្ងៃព្រហស្បតិ៍នេះបានរៀបចំពិធីសូត្រមន្តនៅទីស្នាក់ការបស់ខ្លួនដើម្បីសិរីសួស្តីជយមង្គលសម្រាប់ឆ្នាំថ្មីវ័ក អដ្ឋស័ក ពុទ្ធសករាជ២៥៦០ដែលនឹងចូលមកដល់នាពេលខាងមុខនេះ។

ពិធីសូត្រមន្ត

ក្នុងពិធីសូត្រមន្តនេះមាននិមន្តព្រះសង្ឃចំនួន៧អង្គ និងចូលរួមដោយឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិក និងមន្ត្រីក្រោមឱវាទ ព្រមទាំងអ្នកសារព័ត៌មានកីឡា។

ពិធីសូត្រមន្ត

ពិធីសូត្រមន្តនេះរៀបចំឡើងដើម្បីសិរីសួស្តីជយមង្គលវិបុលសុខគ្រប់ប្រការក្នុងឱកាសបុណ្យចូលឆ្នាំថ្មីប្រពៃណីជាតិខ្មែរដល់ថ្នាក់ដឹកនាំនៃគណៈកម្មាធិការជាតិអូឡាំពិកកម្ពុជា ថ្នាក់ដឹកនាំសហព័ន្ធកីឡា កីឡាករ កីឡាការិនី អ្នកសារព័ត៌មានកីឡា ព្រមទាំងអ្នកគាំទ្រវិស័យកីឡាទាំងអស់។ នាល្ងាចថ្ងៃដដែលនេះ នឹងមានពិធីជប់លៀង និងរាំកម្សាន្តថែមទៀតផង។

គណៈកម្មាធិការជាតិអូឡាំពិកកម្ពុជាតែងតែរៀបចំពិធីសូត្រមន្តជារៀងរាល់ឆ្នាំសម្រាប់ឱកាសបុណ្យចូលឆ្នាំថ្មីប្រពៃណីជាតិខ្មែរ៕

អត្ថបទ៖ ជាន ចាន់រ៉ា