សិល្បៈតន្ត្រីខ្មែរប្ដូរពីចម្លងបទភ្លេង មកចម្លងក្បាច់រាំពីគេ?

2016-04-12 21:58:27
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីបានឆ្លងកាត់សម័យកាលដែលទទួលរងការរិះគន់ដូចព្យុះរឿងចម្លងបទបរទេស ដោយផលិតកម្មនានាងាកមកប្រឹងនិពន្ធបទ Original Song វិញនោះ មហាជន ចាប់ផ្ដើមសម្គាល់ថា បទចម្រៀងខ្មែរមួយចំនួនបានប្ដូរមកចម្លងចង្វាក់រាំ ជំនួសបទភ្លេងវិញ។ តើពិតជាអីចឹងមែន?

ចង្វាក់រាំ ដែលប្រិយមិត្តដក់ចិត្តថា ផលិតកម្មចម្រៀងក្នុងស្រុកនានា បានចម្លងតាមប្រទេសជិតខាងនោះ គឺរបៀបរាំដែលមានកាយវិការគ្រវីគ្រវាត់ ច្រងេងច្រងាងដែលគេឃើញមានក្នុងបទចម្រៀងប្រភេទបទញាក់ភាគច្រើន សម្រាប់រាំលេងក្នុងឱកាសចូលឆ្នាំខ្មែរនេះ ដែលចេញដោយផលិតកម្មក្នុងស្រុកនានា។ផ្នែកខ្លះនៃក្បាច់រាំដែលជាប់មន្ទិលនេះ មានក្នុងបទមួយចំនួនដូចជា "បែកស្លុយ" របស់សាន់ដេ "មិនមែនក្រទេណា" របស់ថោន និង "ក្បាច់រាំបែកស្លុយ" របស់ហង្សមាសជាដើម។

កាយវិការរាំក្នុងបទ "ឡូយកប់លូ" របស់ ពេជ្រ សោភា

ជាអ្នកនិយមស្ដាប់ចម្រៀង និងវីដេអូចម្រៀងក្នុងស្រុកកន្លងមក ប៉ាន់ សុធី វ័យ ២១ប្រាប់ថា លោកសម្គាល់ឃើញថា ការរាំក្នុងបទចម្រៀងខារ៉ាអូខេនៅឆ្នាំនេះ រាំប្លែកៗ។ សុធី ថ្លែង “ពីមុនមកឃើញមានដែរ គេរាំសប្បាយរបៀបយើងធម្មតាៗ តែឆ្នាំហ្នឹងដូចជាប្លែកបន្តិច ដូចច្រងេងច្រងាងជាងមុន ហើយតាមខ្ញុំគិត គឺដូចនឹងក្បាច់រាំដែលខ្ញុំឃើញពួកថៃគេថតបង្ហោះក្នុង Facebook"។

“មើលទៅ ដូចក្បាច់របស់គេមែនតើ តែខ្ញុំក៏មិនច្បាស់ដែរថា យើងចម្លងគេ ឬគេចម្លងយើង។" រតនៈ អ្នកបញ្ចូលបទភ្លេងនៅម្ដុំលូទឹកស្អុយ ថ្លែង។ បុរសវ័យ ២៤ បន្តថា ចំណុចមួយទៀតដែលលោក មិនហ៊ាន និងពិបាកកំណត់ ថាអ្នកណាចម្លងអ្នកណា គឺក្បាច់រាំបទញាក់ ដូចជាគ្មានក្បួនខ្នាតច្បាស់លាស់ផង។ "មិនដឹងកំណត់ម៉េច បើញាក់ គឺម្នាក់ៗ ទាំងយើងទាំងគេ ចាក់ក្បាច់រៀងតែខ្លួន ពេលខ្លះយើងដូចគេ ពេលខ្លះ គេដូចយើងដែរហ្នឹង!”។

ទោះយ៉ាងនេះក្ដី ផាន សុផនរ៉ាឌី បុគ្គលិកស្ថាប័នមីក្រូហិរញ្ញវត្ថុក្នុងស្រុកមួយ បញ្ចេញទស្សនៈថា ក្បាច់រាំទាំងនោះ គឺពិតជាមានចំណែកចម្លងពីគេពិតមែន។ រ៉ាឌី ថ្លែងថា "តិចច្រើន គឺចម្លងពីគេមែនហ្នឹង វាមិនជួនពេកទេ បន្ទាប់ពីគេរាំអីចឹង យើងក៏រាំអីចឹងដែរ។ បានជាខ្ញុំថាអីចឹង ព្រោះផលិតកម្មទាំងអស់ ចាំតែមើលអីល្បីលើ Facebook គេធ្វើភ្លាម ព្រោះគេគិតថា បទរបស់គេនឹងល្បីដេរ"។

កាយវិការរាំក្នុងបទ "មិនមែនក្រទេណា" របស់ ថេរ៉ាយុ

ចំពោះបញ្ហានេះ លោក ប៊ុន រតនា ហៅ សេម អ្នកដឹកនាំសម្ដែងនៅផលិតកម្មថោន ថ្លែងថា ផលិតកម្មរបស់លោក គ្មានគោលការណ៍ចម្លងបទរាំពីប្រទេសជិតខាងឡើយ អ្វីដែលទស្សនិកជនលើកឡើងចំពោះបទ "មិនមែនក្រទេ" គឺនោះ គ្រាន់តែជាឈុតក្រៅផ្លូវការមួយប៉ុណ្ណោះ។ "ចំពោះបទ មិនមែនក្រទេ ដែលចេញមុននោះ គ្រាន់តែជា Cover តើ...បទផ្លូវការអត់មានរាំអីចឹងទេ។ ក្រុមហ៊ុនគ្មានគោលការណ៍ ចម្លងក្បាច់រាំតាមប្រទេសណាទេ មានតែខំបង្កើតថ្មី"។

ទោះយ៉ាងណា លោក ទទួលស្គាល់ដែរ ថាអាចមានចន្លោះប្រហោងខ្លះ សម្រាប់ការថតបទញាក់ ដោយសារតែតួសម្ដែង រាំតាម Style ផ្ទាល់ខ្លួនរបស់ពួកគេ ដែលពេលខ្លះ ពិបាកនឹងគ្រប់គ្រង។

ងាកមកលោក កៅ សីហា អ្នកដឹកនាំសម្ដែងរបស់ផលិតកម្មរស្មីហង្សមាសវិញ បានប្រាប់ស្រដៀងគ្នាដែរថា ពួកលោកក៏គ្មានគោលការណ៍បែបនោះដែរ។ លោកថា "ចំពោះក្បាច់រាំ គឺយើងព្យាយាមបង្កើតថ្មីៗ ទាំងតារាចម្រៀង អ្នករាំអម ឬតួ Background អីក៏ដូចគ្នាដែរ បើមានតួណារាំខុសពីក្បាច់យើង ឬដូចថៃ យើងប្រាប់ឲ្យដូរភ្លាម មិនអីចឹងទេ ក៏យើងកាត់ចោលដែរ ឧទាហរណ៍ដូចក្បាច់រាំបទរាំញីកែងជើងអីចឹង បើទាំងអស់គ្នារាំញីកែងជើងបានយើងយក បើអត់កាត់ចោល"។

កាយវិការរាំក្នុងបទ "បែកស្លុយ" របស់នាយចើម

មិនខុសគ្នាដែរ អ្នកដឹកនាំសម្ដែងផលិតកម្មសាន់ដេ លោក មករា ខូល ប្រាប់ថា អ្វីដែលផលិតកម្មបានធ្វើ គឺបត់បែនទៅតាមសម័យកាល និងតម្រូវតាមចិត្តទស្សនិកជនដែលចង់បានចង្វាក់រាំលេងសប្បាយក្នុងឱកាសពិសេសដូចបុណ្យចូលឆ្នាំខ្មែរ។ ចំពោះក្បាច់រាំញាក់នោះ លោកថា ផ្អែកទៅលើចរិតរបស់បទភ្លេងដែរ ហើយបទភ្លេងនេះទៀតសោត ទាំងខ្មែរទាំងថៃ គឺមានសភាពដូចគ្នា។

“យើងអាចនិយាយបានថា ដូចញុំាបាយអីចឹង ញុំាបាយ គឺដាក់ចូលក្នុងមាត់ហើយ ដល់ចរិតបទភ្លេងក៏អីចឹង គឺពេលខ្លះដូចៗគ្នា និងត្រូវរាំអីចឹង យើងក៏មាន ថៃក៏មាន ស្រដៀងៗគ្នា មិនអាចកំណត់ថា អ្នកណាចម្លងអ្នកណាទេ"។

យ៉ាងណាក្ដី លោកទទួលស្គាល់ថា ពេលខ្លះមិនអាចគ្រប់គ្រង១០០%ដែរ ចំពោះការរាំក្បាច់ញាក់ ពិសេសកាលៈទេសៈ ដែលចាំបាច់ត្រូវការចូលរួមគំនិត(បង្កើតក្បាច់រាំ)របស់អ្នកសម្ដែងនោះ ព្រោះថា លោកម្នាក់ឯងក៏នឹកមិនឃើញអស់ក្បាច់ដែរ ជាហេតុធ្វើឲ្យការរាំ មានច្រើន Style ច្រើនក្បាច់ ហើយពេលខ្លះក៏ដូចគេខ្លះៗដូច្នេះ៕

ចុះប្រិយមិត្តវិញ យល់យ៉ាងណា?

អត្ថបទ៖ ទារិកា