ស៊ីម៉ាក់មានទំនុកចិត្តអាចទុក គួច ដានី ឱ្យនៅបន្តបាន

2016-04-18 17:22:07
ចំនួនមតិ 0 | ចំនួនចែករំលែក 0

ចន្លោះមិនឃើញ

គួច ដានី ដែលកំពុងផ្ញើខ្លួនលេងឱ្យក្លឹបស៊ីម៉ាក់បណ្ដោះអាសន្ន ធ្លាប់បាននិយាយថារូបគេអាចនឹងចាកចេញនៅពាក់កណ្ដាលរដូវកាលនេះឬរដូវកាលក្រោយ ដោយអាចនឹងស្វែងរកក្លឹបនៅកម្ពុជាឬត្រូវទៅប្រទេសថៃ។ ទន្ទឹមនឹងនេះដែរ លោក កែវ ណារិន គ្រូជំនួយក្រុមស៊ីម៉ាក់ឆ្លើយតបនឹងការអះអាងនេះថា លោកមានវិធីដើម្បីរក្សាកីឡាករល្អម្នាក់នេះឱ្យនៅជាមួយលោកបានក្នុងរដូវកាលក្រោយ។

គួច ដានី

លោក កែវ ណារិន បានបង្ហាញហេតុផលថា លោកមានទំនាក់ទំនងល្អជាមួយ ដានី ហើយរូបគេក៏តែងតែធ្វើតាមអ្វីដែលលោកបានស្នើសុំដែរ។ ត្បិតតែស៊ីម៉ាក់មិនបានផ្ដល់អ្វីច្រើនដល់រូបគេ (ប្រាក់ឈ្នួល) ប៉ុន្តែលោក ណារិន មានទំនុកចិត្តថា មនោសញ្ចេតនា ការផ្ដល់តម្លៃឱ្យគ្នាទៅវិញទៅមក អាចជាកត្តាធំ ជំរុញចិត្តរបស់អតីតខ្សែបម្រើភ្នំពេញក្រោននេះឱ្យនៅជាមួយស៊ីម៉ាក់បន្តបាន។

គួច ដានី ក្រោយពីក្រោនមិនបន្តកុងត្រាឱ្យកាលពីរដូវកាលមុន បានចាកចេញទៅធ្វើតេស្ដនៅប្រទេសថៃជាមួយក្លឹបនៅទីនោះមួយរយៈ ប៉ុន្តែរូបគេមិនបានជាប់ចូលលេងនៅក្លឹបណាមួយនោះទេ ដោយត្រូវត្រលប់មកកម្ពុជា ហើយផ្ញើខ្លួនជាមួយក្រុមស៊ីម៉ាក់ ដោយមានលោក កែវ ណារិន ជាអ្នកទទួលយករូបគេ។

ចូលលេងឱ្យស៊ីម៉ាក់បានប៉ុន្មានប្រកួតមកនេះ ដានី មានទម្រង់លេងល្អទាក់ចិត្តគ្រូបង្វឹក ហើយក៏សហការគ្នាបានល្អផងដែរជាមួយសមាជិកដទៃទៀត ដែលធ្វើឱ្យមានការសរសើរជាច្រើនពីសំណាក់អ្នកគាំទ្រក្រុមដែលទើបបង្កើតឡើងមួយនេះ ដោយរំពឹងថារូបគេនឹងជួយក្រុមបានច្រើន៕

អត្ថបទ៖ មុន្នី រម្យ