វិធីសាមញ្ញៗ ជួយឲ្យឡានដែលទុកចោលយូរនៅតែមានគុណភាពល្អ

2016-04-20 13:15:58
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្តដែលទុកចោលដោយមិនប្រើប្រាស់រយៈពេលយូរ អាចធ្វើឲ្យកើតមានបញ្ហាមួយចំនួនទាំងលើគ្រឿងបន្លាស់ និងរូបរាងខាងក្រៅ ប្រសិនបើមិនបានរក្សាទុកតាមវិធីត្រឹមត្រូវទេនោះ។ តទៅនេះនឹងបង្ហាញវិធីសាមញ្ញៗមួយចំនួន ដែលជួយការពារកុំឲ្យឡានដែលទុកចោលយូរមានបញ្ហា៖

-ធ្វើយ៉ាងណាបិទបាំងឲ្យជិត

ការរក្សាទុករថយន្តនៅក្នុងការ៉ាសចតឡាន នៅផ្ទះជាជម្រើសដ៏ល្អបំផុត ដោយអាចការពាររថយន្តពីធូលីដី និងរក្សាតុល្យភាពនៃសីតុណ្ហភាពបានល្អ។ ប្រសិនបើដាក់រថយន្តចោលហាលវាល អ្នកគួរប្រើប្រាស់កៅស៊ូដើម្បីគ្របឡាន ដោយជួយការពាររថយន្តឲ្យនៅស្អាតល្អ។

-លាងសម្អាតឲ្យបានស្អាតមុនរក្សាទុក

ស្នាមទឹកបន្សល់ពីទឹកភ្លៀង ឬលាមកចាបដែលជាប់នឹងឡានរយៈពេលយូរពេក អាចបណ្ដាលឲ្យថ្នាំឡានខូច។ ដូចនេះត្រូវសម្អាតឡានឲ្យបានស្អាតគ្រប់កន្លុកកន្លៀតជាមុនសិន មុននឹងយករក្សាទុក។

-ប្ដូរប្រេងម៉ាស៊ីន

ប្រសិនបើមានគម្រោងថាទុករថយន្តចោលត្រឹម មួយឬពីរសប្ដាហ៍ អ្នកអាចរំលងដំណាក់កាលនេះបាន ប៉ុន្តែបើទុកចោលលើសពី៣០ថ្ងៃ ត្រូវតែប្ដូរប្រេងម៉ាស៊ីន។ នេះជាការណែនាំរបស់ក្រុមហ៊ុនរថយន្ត Ford ដោយលើកហេតុផលថាប្រេងម៉ាស៊ីនចាស់មានសារធាតុកខ្វក់ធ្វើឲ្យម៉ាស៊ីនខូច។

-ចាក់សាំងឲ្យពេញ

នេះជាគន្លឹះមួយទៀតសម្រាប់រថយន្តដែលទុកចោលយូរលើសពី៣០ថ្ងៃ។ ការធ្វើដូចនេះអាចទប់ស្កាត់កុំឲ្យមានសំណើមកើតមានក្នុងធុងសាំង និងកុំឲ្យបន្ទះបិទបើកធុងសាំងស្ងួត។

-អាគុយ

អាគុយដែលមិនប្រើក៏អាចបាត់បង់ថាមពលបានដែរ។ ដូចនេះរៀងរាល់ពីសប្ដាហ៍ម្ដងត្រូវបញ្ឆេះរថយន្ត រួចបើកបរឲ្យបានរយៈពេល១៥នាទី បើអាចទៅរួច។ ធ្វើដូចនេះដើម្បីរក្សាថាមពលរបស់អាគុយ កុំឲ្យអាគុយងាប់។ ប្រសិនបើមិនអាចអនុវត្តន៍បាន អាចសាកល្បងវិធីផ្សេងដោយដកខ្សែប៉ូលដកចេញពីអាគុយ។

-បិទរន្ធចេញចូលឲ្យជិត

ព្យាយាមបិទរន្ធទាំងឡាយណាដែលសត្វកណ្ដុរអាចចេញចូលបាន ដូចជារន្ធបំពង់ស៊ីមាំង ឬដាក់ថ្នាំបណ្ដេញកណ្ដុរនៅក្នុងឡានដើម្បីការពារបានកាន់តែខ្ពស់៕

ចុចអាន៖ មុនបញ្ឆេះឡានចេញដំណើរ ត្រូវធ្វើរឿងទាំងអស់នេះជាមុន

ប្រែសម្រួល៖ ហៃ សុខហេង ប្រភព៖ Edmunds