នេះនែ! ខ្លឹមសារសង្ខេបរឿង "ប៉ុបពីទៅហូលីវូដ"

2016-05-03 18:40:53
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿង "ប៉ុបពីទៅហូលីវូដ" រៀបរាប់ពីសាច់រឿងរបស់បុរសវ័យក្មេងម្នាក់ឈ្មោះ មុន្នី ដែលជីវិតពេញដោយបាបកម្ម ការកុហក និងការបោកប្រាស់។ ដោយសារជំពាក់បំណុលគេច្រើន ហើយជីវិតកាន់តែទាល់ច្រក មុន្នី បានសុំជំនួយពីបងប្រុសតែមួយគត់របស់ខ្លួន។ បញ្ហាត្រង់ថា បងប្រុសរបស់មុន្នី ឈ្មោះ លែនណា បែរជាបុរសកែភេទ ធ្វើការជាអ្នករាំនៅក្នុងបាមួយ ក្នុងទីក្រុងភ្នំពេញទៅវិញ ។

ដោយត្រូវសងបំណុលដល់ថៅកែក្លឹបវិញ មុន្នី បង្ខំចិត្តធ្វើការជាបុគ្គលិកអនាម័យនៅក្លឹបនោះ រហូតអាចសងបំណុលទាំងអស់ ។ មុន្នី ឆ្លងកាត់ពេលវេលាដ៏សែនពិបាក ព្រោះគេស្អប់ក្រុមមនុស្សស្រលាញ់ភេទដូចគ្នា និងក្រុមមនុស្សកែភេទ។ យប់មួយ ពេលដែលកំពុងយកសំរាមទៅចោលនៅខាងក្រោយក្លឹប មុន្នី បានឃើញគេសម្លាប់ភ្ញៀវក្លឹបម្នាក់។

បន្តពីនោះ បេសកកម្មតាមសម្លាប់បំបិទមាត់របស់ក្រុមសង្គមងងឹត លើ មុន្នី ដែលបានឃើញហេតុការណ៍នោះ ក៏ចាប់ផ្ដើម។ ដោយសារភ័យខ្លាចស្លាប់ និងមិនដឹងថាត្រូវទីណានោះ មុន្នី បានគេចខ្លួនពីមួយកន្លែងទៅមួយកន្លែង ចុងក្រោយបានទៅដល់ខេត្តព្រះវិហារ ហើយដើម្បីកុំឲ្យគេរកឃើញ មុន្នី ត្រូវគេតែងខ្លួនឲ្យក្លែងធ្វើជាបុរសភេទទី៣។ ដំណើររឿងយ៉ាងណាទៀត បញ្ចប់ទៅដោយរបៀបណា សូមរង់ចាំតាមដានទស្សនាទាំងអស់គ្នានាថ្ងៃទី ០៥ ឧសភា ខានស្អែកនេះ...!!!

ខ្សែភាពយន្តរឿង "ប៉ុបពីទៅហូលីវូដ" និពន្ធដោយលោក MICHAEL HODGSON និងលោក RICHARD FINN JOHNSTON ជាជនបរទេសរស់នៅក្នុងកម្ពុជាអស់រយៈពេលជិត១០ឆ្នាំមកហើយ។

ខ្សែភាពយន្តខ្នាតធំខាងលើ និងបើកសម្ពោធនៅថ្ងៃទី៤ ឧសភា ស្អែកនេះ នេះនៅជាន់ផ្ទាល់ដីនៃ ផ្សារទំនើបអ៊ីអន ដោយក្នុងកម្មវិធីនោះ តារាសម្ដែងដែលចូលរួចសម្ដែងក្នុងខ្សែភាពយន្តមួយនេះនឹងមានវត្តមានទាំងអស់។ បទ "ចាស់ជូរអែម” របស់រាជនីសំឡេងមាស រស់ សិរីសិទ្ធា និងបទ "រៀបការនឹងបងបានទេ” មេឡូឌីថ្មី ក៏ត្រូវយកមកច្រៀង ក្នុងថ្ងៃបើកសម្ពោធនេះផងដែរ។

រឿង "ប៉ុបពីទៅហូលីវូដ" ផលិតឡើង ក្រោមការសហការគ្នា រវាងក្រុមហ៊ុន ៣ មាន ផលិតកម្ម 802AD ផលិតកម្ម Rock និងក្រុមហ៊ុន Sabay MVP។ ខ្សែភាពយន្តខ្នាតធំមួយនេះប្រើពេលផលិតជិត១ឆ្នាំមកហើយ ដោយការចំណាយ ទាំងការធ្វើទីផ្សារផងនោះ អស់ខ្ទង់ជិត១០ម៉ឺនដុល្លារ។

បន្ទាប់ពីបើកសម្ពោធ រឿង "ប៉ុបពីទៅហូលីវូដ" នឹងបើកឲ្យទស្សនិកជនចូលទស្សនាចាប់ពីថ្ងៃទី៥ ខែ ឧសភា នេះតទៅ នៅគ្រប់រោងភាពយន្តទំនើបទាំងអស់ក្នុង ប្រទេសកម្ពុជា ឡាវ និងឥណ្ឌូណេស៊ី ក្នុងថ្ងៃតែមួយតែម្ដង។ បន្ថែមលើនេះ ប្រទេស វៀតណាម មីយ៉ាន់ម៉ា និង ទីម័រខាងកើត ក៏គ្រោងទទួលភាពយន្តមួយនេះចាក់បញ្ចាំងផងដែរ។ ការនាំយកភាពយន្តខ្មែរទៅចាក់បញ្ចាំងនៅក្រៅប្រទេសនេះ គឺមានការសម្របសម្រួលដោយក្រុមហ៊ុន PUPRUM ENTETANMENT៕