Changjo របស់ក្រុម Teen Top បានតំណែងតួឯកក្នុងរឿងភាគដំបូង

2014-10-27 22:07:52
ចំនួនមតិ 0 | ចំនួនចែករំលែក 0

ចន្លោះមិនឃើញ

សមាជិក Changjo របស់ក្រុមចម្រៀងបុរសកូរ៉េខាងត្បូង Teen Top នឹងចាប់ផ្ដើមអាជីពសម្ដែងរបស់ខ្លួន ដោយសម្ដែងជាតួឯកក្នុងរឿងភាគថ្មីរបស់ទូរទស្សន៍ MBC មានចំណងជើងថា "Sweden Laundry”។ នេះបើតាមការបញ្ជាក់ពីក្រុមផលិតកររឿងនេះ កាលពីថ្ងៃទី២៧ ខែតុលា។

“Sweden Laundry” គឺជារឿងភាគបែបអភិនីហារអំពីនារីម្ចាស់ហាងបោកអ៊ុតម្នាក់ដែលមានសមត្ថភាពពិសេសអាចមើលឃើញពីទុក្ខព្រួយក្នុងខ្លួនរបស់មនុស្សបាន។ ក្នុងរឿងនេះ Changjo នឹងដើរតួឯកជាមួយ តារាសម្ដែងស្រី Song Ha Yoon។

អ្នកដឹកនាំរឿង Jung Hwan Seok បានបញ្ជាក់ថាលោកចង់បានតួថ្មីដែលអាចបញ្ចូលមនោសញ្ចេតនាជ្រៅត្រូវនឹងចរិតរបស់តួអង្គក្នុងរឿង។ លោកបាននិយាយថា លោកពេញចិត្ត និងចាប់អារម្មណ៍ការសម្ដែងរបស់ Changjo នៅពេលគេសម្ដែងសាកខ្លាំងណាស់។

សម្រាប់ការសម្ដែងលើកដំបូងនេះ តារាវ័យ ១៨ឆ្នាំ Changjo បានបង្ហាញចំណាប់អារម្មណ៍របស់ខ្លួនថា "នេះគឺជារឿងដំបូង ដូច្នេះហើយខ្ញុំមានអារម្មណ៍ថាភ័យមែនទែន ប៉ុន្តែក្រុមការងារតែងលើកទឹកចិត្ត និងយកចិត្តទុកដាក់ជួយខ្ញុំរហូត។ ខ្ញុំចង់បង្ហាញសមត្ថភាព និងខំប្រឹងឲ្យអស់ពីសមត្ថភាព"។

រឿង "Sweden Laudry” នឹងចាប់ផ្ដើមបញ្ចាំងនៅចុងខែវិច្ឆិកា ខាងមុខនេះ ៕