ទស្សនិកជនថា បើទិញសំបុត្រមើលរឿង “ប៉ុបពីទៅហូលីវូដ” មិនស្ដាយលុយទេ!

2016-05-05 16:39:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តខ្នាតធំរឿង “ប៉ុបពីទៅហូលីវូដ” បានបើកសម្ពោធរួចហើយកាល ពីល្ងាចម្សិលមិញនៅនៅរោងភាពយន្តទំនើប Major Cineplex by Cellcard ផ្សារទំនើប AEON Mall អ្នកទស្សនាបានសរសេរគ្រប់ៗគ្នាថា ពិតជាល្អមើលមិនស្ដាយប្រាក់ក្នុងការទិញសំបុត្រឡើយ។

លោក ឯម រាម បណ្ឌិតច្នៃម៉ូដល្បីឈ្មោះម្នាក់ក្នុងប្រទេសកម្ពុជា ត្រូវបានអ្នករៀបចំអញ្ជើញមកទស្សនានៃការចាក់បញ្ចាំង Premiere រឿង “ប៉ុបពីទៅហូលីវូដ” នេះ បន្ទាប់ពីបានទស្សនារួច បាននិយាយប្រាប់សប្បាយថា ខ្សែភាពយន្តមួយនេះពិតជាល្អមើល ហើយមានគុណភាពខ្លាំង បើប្រៀបធៀបទៅលើ ខ្សែភាពយន្តខ្មែរដែលលោក ធ្លាប់ទស្សនាកន្លងមក។

លោកថា ខ្លឹមសារនៃសាច់រឿងគឺមានភាពទាក់ទាញ ហើយការសម្ដែងរបស់តួអង្គក៏ល្អខ្លាំង ដែលធ្វើឲ្យអ្នកទស្សនា ទប់សំណើចមិនបាន គឺសើចតាំងពីដើមទី រហូតដល់ទីបញ្ចប់។ "វាជា Concept ថ្មី ជ្រុងបែបហ្នឹងអត់ទាន់អ្នកធ្វើទេ វាជារបត់ថ្មីមួយ ក្នុងវិស័យភាពយន្តខ្មែរ ខ្ញុំគាំទ្រ អ្នកដឹកយើងក៏ពូកែរើសតួដាក់ទៀត" បណ្ឌិតច្នៃម៉ូដលើកឡើង។

ស្រដៀងគ្នានេះកញ្ញា ស្រីណែត បុគ្គលិកមកពីក្រុមហ៊ុនឯកជនមួយ ត្រូវបានក្រុមការងារនៃរឿងខាងលើអញ្ជើញមកទស្សនានៃការចាក់បញ្ចាំង Premiere បានលើកឡើងដែរថា កញ្ញា ស្រលាញ់ប្លង់២ខ្លាំងជាងគេ គឺ ត្រង់ Peypey Dy ឌឺដងតួឯកប្រុស លោក អ៊ិន សិទ្ធា រហូតដល់ទីបញ្ចប់ ដោយហៅ "អា" ពេញៗមាត់ និងត្រង់ចំណុច លោក អ៊ិន សិទ្ធា តែងខ្លួនជាស្រី ចូលគេងជាមួយ កញ្ញា ឌុច លីដា យកពិលដល់ពី២ ដាក់តាមខ្លួន។ ស្រីណែត សើចហើយនិយាយថា "រឿងហ្នឹង អ្នកទិញសំបុត្រមើល ដឹងថា មិនស្ដាយលុយទេសើចរហូត "។

លោក សុធី ដែលជាអ្នកថតរូបម្នាក់ មកទស្សនាការដាក់បញ្ចាំង Premiere នៃខ្សែភាពយន្តខាងលើផងដែរនោះ បានលើកឡើងថារឿង “ប៉ុបពីទៅហូលីវូដ” ពិតជាល្អអាចទទួលយកបាន បើប្រៀបធៀប ខ្សែភាពយន្តខ្មែរមួយចំនួនផ្សេងទៀត។ លោកថា កន្លងមករឿងខ្មែរមួយចំនួន ទស្សនិកជនមកទស្សនា តែងរអ៊ូថា មិនល្អមើល ហើយស្ដាយពេលវេលា និងលុយក្នុងការទិញសំបុត្រ តែបើរឿង “ប៉ុបពីទៅហូលីវូដ” លោកបានវាយតម្លៃថា អ្នកចូលមកទស្សនា ច្បាស់ជាមិនស្ដាយប្រាក់នោះឡើយ។

រឿង “ប៉ុបពីទៅហូលីវូដ” គឺជាខ្សែភាពយន្តមួយ និយាយពីមនុស្សភេទទី៣មួយក្រុម តស៊ូជាមួយនឹងការរើសអើងពីសង្គមរើសអើងរហូតទទួលបានជោគជ័យ លាយឡំដោយឈុតឆាកកំប្លែង និងមនោសញ្ចេតនាស្នេហា។

ផ្នែកសំខាន់នៃសាច់រឿង "ប៉ុបពីទៅហូលីវូដ" បានជូនជាគំនិតដល់អ្នកទស្សនាឲ្យដឹងច្រើនថែមទៀតពីអ្វីដែល សហគមន៍ LGBT (នារីភេទទី៣ បុរសភេទទី៣ មនុស្សភេទពីរ និងមនុស្សកែភេទ) ដែលកម្ពុជាកំពុងជួបប្រទះ និងចង់ឲ្យអ្នកទស្សនាយល់ថា អ្នកទាំងនោះ គឺមនុស្សធម្មតាដែលកើតមកមានចរិតធម្មជាតិរបស់ពួកគេ ហើយមិនអាចផ្លាស់ប្ដូរបាន។ ក្នុងនោះដែរ សាច់រឿង ក៏បានបង្ហាញពីការលើកកម្ពស់តម្លៃស្ត្រី និងសមភាពយេនឌ័រទៀតផង។

តារាដែលចូលរួមសម្ដែងក្នុងរឿងនេះមាន ឌុច លីដា អ៊ុន សិទ្ធា ប៉ុបពី ប៉ីប៉ីឌី នាយ សានម៉ៅ លោក ភីម៉ៃ នាយ ស្រុញ និងតារាកិត្តិយសជាច្រើននាក់ទៀត។ កញ្ញា ឌុច លីដា និង លោក អ៊ុន សិទ្ធា គឺជាតួឯកក្នុងខ្សែភាពយន្តខាងលើនេះ។

ចាប់ពីថ្ងៃនេះតទៅ ទស្សនិកជនអាចអញ្ជើញទិញសំបុត្រចូលទស្សនាបាន នៅគ្រប់រោងភាពយន្តទំនើបៗនៅរាជធានី ទន្ទឹមគ្នានោះដែរ នៅប្រទេស ឡាវ និងឥណ្ឌូណេស៊ី ក៏បានចាក់បញ្ចាំងក្នុងថ្ងៃតែមួយផងដែរ។ បន្ថែមលើនេះ ប្រទេស វៀតណាម មីយ៉ាន់ម៉ា និង ទីម័រខាងកើត ក៏គ្រោងទទួលភាពយន្តមួយនេះចាក់បញ្ចាំងដូចគ្នា ក្រោមការសម្របសម្រួលដោយក្រុមហ៊ុន PUPRUM ENTETANMENT។

រឿង “ប៉ុបពីទៅហូលីវូដ” ផលិតឡើង ក្រោមការសហការគ្នា រវាងក្រុមហ៊ុន ៣ មាន ផលិតកម្ម 802AD ផលិតកម្ម Rock និងក្រុមហ៊ុន Sabay MVP៕