កុក បុរិសថា ភ្នំពេញក្រោនចាញ់ AEU យប់មិញបណ្តាលមកពីកំហុសរបស់គេ

2016-05-23 21:56:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ខែ្សការពារក្រុមជើងឯកលីគកំពូលកម្ពុជា៦សម័យភ្នំពេញក្រោន កីឡាករ កុក បុរិស បានទម្លាក់កំហុសមកលើខ្លួនឯងជុំវិញការប្រកួតដែលភ្នំពេញក្រោនចាញ់ក្រុមបាតតារាងអាស៊ីអឺរ៉ុប២-០ នៃការប្រកួតលីគកំពូលកម្ពុជា សប្ដាហ៍ទី៨កាលពីម្សិលមិញ។

ខ្សែការពារកូនកាត់ខ្មែរ-បារំាង កុក បុរិស សរសេរលើFacebook របស់ខ្លួនថា បរាជ័យកាលពីយប់មិញ គឺមិនសំដៅលើក្រុមទេ គឺសំដៅមកលើរូបលោកតែម្នាក់គត់។ ចាប់តាំងពីរូបគេប្រកបអាជីពបាល់ទាត់នៅប្រទេសកម្ពុជា ការប្រកួតនេះគឺជាការប្រកួតដែលរូបគេបង្ហាញទម្រង់លេងដ៏អន់បំផុត មិនធ្លាប់មានកន្លងមក។

«ប្អូនៗរបស់ខ្ញុំ បានប្រឹងប្រែងលេងអស់ពីសមត្ថភាពរបស់ពួកគេ តែខ្ញុំធ្វេសប្រហែស ដែលបណ្ដាលឲ្យក្រុមគេទាត់ចូលទីបាន២គ្រាប់ ហើយនេះពិតជាធ្វើឲ្យខ្ញុំមានការអាម៉ាស់ខ្លាំង»។ ប្រធានក្រុមរូបនេះបានសរសេរ និងបញ្ជាក់ថា រយះពេល៣ឆ្នាំកន្លះ ក្នុងនាមជាកីឡាករ ក៏ដូចជាប្រធានក្រុមរបស់ក្លឹបភ្នំពេញក្រោន រូបគេមិនអាចបង្កកំហុសបានទៀតឡើយ ហើយថែមទាំងប្ដេជ្ញាដឹកនាំក្រុមបង្ហាញទម្រង់លេងឲ្យបានល្អប្រសើរគ្រប់ការប្រកួត ពីព្រោះនេះជាមេរៀនដែលរូបគេត្រូវរៀនសូត្រ។

«ប្រកួតនេះមិនត្រឹមតែជាការចាញ់ប៉ុណ្ណោះទេ ប៉ុន្តែគឺជាការបង្ហាញទម្រង់លេងជាចម្បង ហើយខ្ញុំនឹងទទួលយកការរិះគន់ និងរ៉ាប់រងនៅរដូវកាលមិនល្អរបស់យើងនេះ» ។ កុក បូរីស និយាយ ។

ក្រុមបាល់ទាត់អាស៊ីអឺរ៉ុបយូណាយធីត បានស្គាល់រសជាតិឈ្នះជាលើកដំបូងក្នុងពានរង្វាន់លីគកំពូលកម្ពុជា រដូវកាល២០១៦ ក្រោយដំណើរការត្រឹម៨សប្ដាហ៍មកនេះ ពោលគឺក្រោយយកឈ្នះម្ចាស់ជើងឯកឆ្នាំចាស់ និងជាម្ចាស់ផ្ទះភ្នំពេញក្រោន ២-០ នៅល្ងាចថ្ងៃអាទិត្យទី ២២ ខែឧសភា ឆ្នាំ២០១៦ លើទីលានកីឡដ្ឋាន RSN។ កីឡាករ Afanwi បានរកគ្រាប់បាល់ទាំង២គ្រាប់ឱ្យអាស៊ីអឺរ៉ុប៕

អត្ថបទ៖ មួន សុគន្ធតារា