តារាក្បាច់គុន សុខ ដែន បើកក្លឹបសិល្បៈ ត្រៀមថតរឿងធំ

2016-06-03 14:11:00
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក សុខ ដែន តារាល្បីខាងក្បាច់គុន រួមជាមួយតារាសម្ដែងជើងចាស់ គន្ធ តារាវណ្ណ និងអ្នកដឹកនាំរឿង ពិន ណារិន្ទ បានសហការបើកសាលាបង្រៀនសិល្បៈមួយ ដើម្បីបណ្ដុះបណ្ដាលដល់យុវវ័យមានបំណងចង់ក្លាយជាអ្នកសិល្បៈអាជីព។

ការសម្រេចចិត្ត បើកសាលាបង្រៀនសម្ដែងខាងលើ លោក សុខ ដែន បានប្រាប់ថា គោលដៅសំខាន់ គឺដើម្បីស្វែងរកអ្នកដែលមានសមត្ថភាពចូលរួមសម្ដែងខ្សែភាពយន្តមួយ ដោយគ្រោងថតក្នុងដើមខែ កក្កដា ខាងមុខនេះ។ "ខ្ញុំជាមួយ លោកគ្រូ គន្ធ តារាវណ្ណ និង លោកគ្រូ ពិន ណារិន្ទ គ្រោងថតរឿងមួយឈ្មោះថា "លត់ដែកថែប" យើងសង្ឃឹមថា នឹងរកអ្នកដែលមានសមត្ថភាពចូលរួមសម្ដែងជាមួយ "លោក សុខ ដែន លើកឡើង។ តារាសម្ដែងរូបនេះបានបន្តឲ្យដឹងថា រឿង "លត់ដែកថែប" ដែលខ្លួនសាកល្បងផលិតឡើងនេះ ជាប្រភេទរឿង វ៉ៃទាត់ធាក់ ដែលភាគច្រើន បង្ហាញពីក្បាច់គុនខ្មែរ ហើយបច្ចុប្បន្ននៅមិនទាន់ជ្រើសរើសតារាសម្ដែងបាននៅឡើយទេ។ លោក រំពឹងថា តាមរយៈការបើកក្លឹបសិល្បៈនេះ នឹងជ្រើសរើសបានតារាសម្ដែងថ្មីៗជាច្រើននាក់ថែមទៀត។

ជំនាញដែល "ក្លឹបសិល្បៈ សុខ ដែន" បង្រៀនមាន ដូចជា ការសម្ដែង រាំ ភ្លេង បញ្ចូលសំឡេង និងក្បាច់គុនជាដើម ពោលគឺអត់តែការច្រៀងមួយមុខប៉ុណ្ណោះ ដោយក្លឹបមួយនេះ មានទីតាំងជិតរង្វង់មូលកាំកូស៊ីធី។ តារាសម្ដែងជើង ចាស់ គន្ធ តារាវណ្ណ និង លោកគ្រូ ពិន ណារិន្ទ គឺជាគ្រូបង្គោលនៃក្លឹបសិល្បៈមួយនេះ។

ជុំវិញការមកបង្រៀនដល់ក្មេងជំនាន់ក្រោយនេះ ត្រូវបានតារាសម្ដែងជើងចាស់ គន្ធ តារាវណ្ណ បញ្ជាក់ថា ក៏ព្រោះតែលោកចង់ចែករំលែកបទពិសោធន៍ដែលខ្លួនមានជាច្រើនឆ្នាំដល់ក្មេងជំនាន់ក្រោយ។ " តាំងពីដើមទីមក ខ្ញុំអត់ដែលបង្រៀនឲ្យក្លឹបសិល្បៈណាមួយឡើយ នេះជាលើកទី១ ខ្ញុំចង់ចែករំលែកបទពិសោធន៍ជាង៣០ឆ្នាំ ដែលខ្លួនមានដល់ក្មេងៗ ព្រោះអីយើងចាស់ណាស់ហើយ " លោក គន្ធ តារាវណ្ណ លើកឡើង។

លោក គន្ធ តារាវណ្ណ ក៏ដូចជា លោក ពិន ណារិន្ទ សង្ឃឹមថា ក្លឹបដែលសហការបង្កើតមួយនេះ នឹងជួយបន្ថែមទៀត ដល់សិល្បៈខ្មែរជាពិសេស លើតារាសម្ដែងតែម្ដង ស្របពេលដែលវិស័យភាពយន្តខ្មែរចាប់ផ្ដើមងើបឡើងវិញ។

លោក សុខ ដែន ដែលជាម្ចាស់ក្លឹប បានបញ្ជាក់ថា ប្រសិនបើអ្នកដែលបានចូលមករៀនក្នុង "ក្លឹបសិល្បៈសុខ ដែន" លោកធានាថា នឹងរកទីផ្សារឲ្យបានចូលសម្ដែង ត្បិតអីក្រៅពី ខ្សែភាពយន្តរឿង "លត់ដែកថែប" ដែលលោកគ្រោងថត ទៅថ្ងៃអនាគត តារារូបនេះគ្រោងបង្កើតផលិតកម្មផ្ទាល់ខ្លួនតែម្ដង។ ជាមួយគ្នានោះ មុនសម្រេចចិត្តបើកក្លឹបសិល្បៈខាងលើ ខាងអ្នកដឹកនាំសម្ដែង គ្រប់ផលិតកម្ម ធំៗទាំងអស់ក្នុងប្រទេសកម្ពុជា បានសន្យាថា នឹងយកកូនសិស្សចេញពីក្លឹបរបស់លោក ចូលសម្ដែងទាំងអស់ សំខាន់ឲ្យតែមានសមត្ថភាព៕