ធ្វើដូចម្តេចដើម្បីបង្កើនភាពស្និទ្ធស្នាលរវាងឪពុកនិងកូន?

2016-06-15 17:10:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងគ្រួសារភាគច្រើន កូនរមែងស្និទ្ធស្នាលជាមួយម្តាយច្រើនជាងឪពុក ពិសេសពេលកូនធំពេញវ័យ គម្លាតនៃទំនាក់ទំនងជាមួយឪពុកកាន់តែធំ។ គន្លាតនៃភាពស្និទ្ធស្នាលនេះធ្វើឲ្យ ឪពុកបាត់បង់ឱកាសការពារកូនជាទីស្រលាញ់ពេលជួបបញ្ហា។

អញ្ចឹងតើត្រូវធ្វើយ៉ាងណាដើម្បីឲ្យឪពុក និងកូនៗ អាចបង្កើតភាពស្និទ្ធស្នាលឡើងវិញដោយមិនឆ្គាំឆ្គង? តាមដានកិច្ចសម្ភាសរវាងអ្នកនាងលីដា និងកញ្ញា នាង សុវ៉ាតនា ហៅ ណាណា អ្នកជំនាញប្រឹក្សាយោបល់បញ្ហាជីវិតនៃកម្មវិធីវិទ្យុដ៏ពេញនិយមមួយៈ

សំណួរ៖ តើកញ្ញាយល់ថាយ៉ាងណាពីទំនាក់ទំនងឪពុក និងកូនក្នុងសង្គមខ្មែរ? ចម្លើយ៖ ភាពស្និទ្ធស្នាលរវាងឪពុកនិងកូន ចាំបាច់មិនអាចខ្វះបានឡើយក្នុងគ្រួសារ។ ក្នុងសង្គមខ្មែរភាគច្រើនឪពុកមិនសូវស្និទ្ធស្នាលជាមួយកូនទេ ព្រោះលោកច្រើនស្រលាញ់កូនមិនឲ្យដឹងចិត្ត ដូច្នេះទោះជាបារម្ភ យកចិត្តទុកដាក់ចំពោះកូនយ៉ាងណាក៏ដោយក៏មិនសូវបង្ហាញចេញឲ្យកូនដឹងដែរ។ ម្យ៉ាងទៀតជាទម្លាប់ទៅហើយដែលឪពុកត្រូវគេចាត់ទុកជាតួកាចក្នុងគ្រួសារ បើមិនដូច្នេះទេប្រដៅកូនមិនស្តាប់ឡើយ។

សំណួរ៖ តើការបង្កើតភាពស្និទ្ធស្នាលរវាងឪពុកនិងកូនពិបាកមែនទេ? ចម្លើយ៖ វាអាចជារឿងពិបាកសម្រាប់គ្រួសារខ្លះដែលឪពុកនិងកូនមិនទម្លាប់ស្និទ្ធស្នាលគ្នាកន្លងមក ហើយសុខៗមកនិយាយផ្អែមល្ហែម គឺអាចមានអារម្មណ៍ថាឆ្គង តែយ៉ាងណាក៏ដោយខ្ញុំសង្ឃឹមថាកូនៗគួរចាប់ផ្តើមមុនទោះបន្តិចបន្តួចក្តី ធ្វើរហូតដល់ក្លាយជាទម្លាប់ ព្រោះលោកឪពុកចេះតែចម្រើនវ័យទៅហើយ ជៀសវាងលោកចាកឆ្ងាយធ្វើឲ្យកូនស្តាយក្រោយ។

សំណួរ៖ តើគួរធ្វើយ៉ាងណាដើម្បីឲ្យឪពុកនិងកូនបង្កើតភាពស្និទ្ធស្នាលបាន ? ចម្លើយ៖ គ្រួសារនីមួយៗមិនដូចគ្នាទេ ទាំងស្ថានភាព និងចរិតសមាជិកក្នុងគ្រួសារ តែមានលក្ខណៈរួមមួយចំនួនដែលឪពុក និងកូនអាចចាប់ផ្តើមធ្វើបានដើម្បីឲ្យទំនាក់ទំនងរវាងអ្នកទាំងពីរបានល្អប្រសើរឡើង។

សកម្មភាពដែលឪពុកគួរធ្វើ៖ -ត្រូវបើកទូលាយចិត្ត ឲ្យកូនអាចដឹងអ្វីដែលលោកកំពុងគិត និង ចង់បាន ដោយការចំណាយពេលនិយាយជាមួយកូនឲ្យបានច្រើន -គួរស្តាប់ការយល់ឃើញរបស់កូនទោះនោះជាគំនិតក្មេងខ្ចីក៏ដោយ -គួរបញ្ឈប់ទម្លាប់ស្តីបន្ទោសកូនពេលគេធ្វើខុស -ពេលទំនេរពីការងារ ឪពុកគួរស្ម័គ្រចិត្តធ្វើសកម្មភាពមួយចំនួនជាមួយកូន ដូចជាលេងកីឡា ដើរកម្សាន្តជុំគ្នា ដើរទិញអីវ៉ាន់ ឬកំដរកូនមើលកុន ជាដើម។

សកម្មភាពដែលកូនគួរធ្វើ ៖ -ត្រូវជឿជាក់ថាឪពុកជាមនុស្សដែលស្រលាញ់ខ្លួនជាទីបំផុត ដូច្នេះរាល់ទង្វើដែលគាត់ធ្វើ ឬនិយាយគឺដើម្បីឲ្យកូនល្អ -ត្រូវជាអ្នកចាប់ផ្តើមសកម្មភាពមុន ដូចជាបបួលលោកដើរកម្សាន្តជុំគ្នា ចាប់ដៃលោកមុន ញញឹម និងនិយាយទៅកាន់លោកមុន -ជូនអំណោយឪពុក រាល់កម្មវិធីពិសេសផ្សេងៗ អាចជាថ្ងៃខួបកំណើតលោក រដូវបុណ្យទានផ្សេងៗ ឬថ្ងៃទិវារំលឹកគុណឪពុក។

ខ្ញុំសង្ឃឹមថាអ្នកដែលកើតក្នុងគ្រួសារក្រលំបាក សូមកុំមើលងាយឪពុកខ្លួនគេ ព្រោះ «មនុស្សមិនអាចរើសកំណើតខ្លួនបាន តែអាចធ្វើឲ្យខ្លួនមានកំណើតបាន» កូនត្រូវគិតថាការដែលគាត់បានផ្តល់កំណើតឲ្យខ្លួនមើលឃើញពិភពលោកនេះជាគុណបំណាច់មួយធំធេងណាស់ទៅហើយ៕

អត្ថបទៈ លីដា រូបថតៈ ផ្តល់ឲ្យ