ក្រសួងមហាផ្ទៃ តាំងចិត្តលើកពានបាល់ទះ Leo Cup រាល់ឆ្នាំ

2016-06-21 16:14:25
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ប៉ោ សារ៉ាក់ ប្រតិភូដឹកនាំក្រុមបាល់ទះក្រសួងមហាផ្ទៃបានតាំងចិត្តយ៉ាងមុតមាំថា ក្រុមរបស់លោក នឹងបន្តប្រឹងប្រែងហ្វឹកហាត់ ដើម្បីគ្រងជើងឯកពានរង្វាន់បាល់ទះ Leo Cup ឲ្យបានរាល់ឆ្នាំ បន្ទាប់ពីឈ្នះជើងឯក Division A ឆ្នាំ២០១៦ កាលពីពេលថ្មីៗនេះ។

លោក ប៉ោ សារ៉ាក់ បានឲ្យដឹងថា លោកពិតជាគាំទ្រពេញទំហឹងក្រុមហ៊ុន Leo ដែលបង្កើតឲ្យមានការប្រកួតកីឡាបាល់ទះថ្នាក់ជាតិដ៏ធំនេះឡើង។ ក្រុមរបស់លោក នឹងប្រឹងប្រែងហ្វឹកហាត់ ដើម្បីលើកពានឲ្យបានរាល់ឆ្នាំតែម្ដង ប្រសិនបើក្រុមហ៊ុននៅតែបន្តបង្កើតព្រឹត្តិការណ៍នេះរហូតតទៅ។

ប្រតិភូរូបនេះបន្តថា គ្រប់ប្រភេទកីឡា នឹងមានការរីកចំរើន ប្រសិនបើបណ្ដាក្រុមហ៊ុនក្នុងប្រទេសកម្ពុជា មានគំនិតបង្កើតឲ្យមានការប្រកួតកីឡាថ្នាក់ជាតិ។ ការរៀបចំឲ្យមាន ព្រឹត្តិការណ៍កីឡាបែបនេះ អាចនាំជាប្រយោជន៍ជូនសង្គម ក្នុងការគៀងគរយុវជនជៀសផុតពីអំពើអបាយមុខផ្សេងៗ។

ក្រុមកីឡាបាល់ទះក្រសួងមហាផ្ទៃបានគ្រងជើងឯក Leo Cup Division A ចំនួន ៣លើករួចមកហើយ គឺនៅឆ្នាំ២០១២ ឆ្នាំ២០១៣ និងឆ្នាំ២០១៦ កាលពីពេលថ្មីៗនេះ៕