សាលាអន្តរជាតិ Learning Jungle សម្ពោធសាខាថ្មីនៅទួលសង្កែ

2016-07-01 16:47:03
ចំនួនមតិ 0 | ចំនួនចែករំលែក 0

ចន្លោះមិនឃើញ

សាលាអន្តរជាតិ លើននីងចាំងហ្គល (Learning Jungle International School) ដែលជាសាលាទទួលបានសិទ្ធិហ្រេ្វនឆាយពីកាណាដាតែមួយគត់នៅកម្ពុជា ក្នុងការផ្ដល់ជូននូវការអប់រំកម្រិតស្តង់ដារខ្ពស់បំផុត បានប្រារព្ធពិធីសម្ពោធសាលាបឋមសិក្សាថ្មីរបស់ខ្លួន និងប្រារព្ធទិវាបុណ្យជាតិកាណាដាខួបលើកទី១៤៩ ក្នុងថ្ងៃតែមួយ កាលពីថ្ងៃទី២៥-មិថុនា កន្លងទៅនេះ។

សាខាថ្មីនេះមានទីតាំងនៅ អគារលេខ ២៥៦ ផ្លូវលេខ៥៩៨ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ដែលមាន២កម្រិត គឺមត្តេយ្យ និងបឋមសិក្សា។

កម្មវិធីនេះ ប្រព្រឹត្តទៅក្រោមអធិបតីភាពរបស់ឯកឧត្ដមបណ្ឌិត ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា អមដំណើរដោយលោក ហ្វ្រង់ស៊ីសហួត ប្រធានការិយាល័យ និងកុងស៊ុលរបស់ស្ថានទូតកាណាដា ប្រចាំកម្ពុជា, ឯកឧត្តម និល ណុន អនុប្រធានតុលាការកំពូល និងប្រធានអង្គជំនុំជម្រះវិសាមញ្ញក្នុងតុលាការកម្ពុជា, លោក នែលស្មីតឈីងគាន់កូ នាយកប្រតិបត្តិនៃសាលាលើននីងចាំងហ្គល នៅប្រទេសកាណាដា, លោក លី វីរៈ ប្រធានក្រុមប្រឹក្សាភិបាលរបស់សាលាអន្តរជាតិលើននីងចាំងហ្គល និង លោក ដេវីដ សុខ ដារ៉ា ម៉ាសល ប្រធានក្រុមប្រឹក្សាភិបាលរបស់សភាពាណិជ្ជកម្មកាណាដាប្រចាំកម្ពុជា។

លោក លី វីរៈ ដែលជាស្ថាបនិកសាលាអន្តរជាតិលើននីងចាំងហ្គលផងដែរនោះ បានថ្លែងថា "កម្មវិធីភាសាខ្មែរត្រូវបានដាក់បញ្ចូលទៅក្នុងកម្មវិធីសិក្សា ប្រចាំថ្ងៃដើម្បីធានាថាសិស្សរបស់យើងមានការប្រកួតប្រជែងទាំង ក្នុងស្រុក និងក្រៅស្រុកនាពេលអនាគត។ សាលាមានឆន្ទៈយ៉ាងមុតមាំក្នុងការផ្ដល់ជូននូវការអប់រំកម្រិតស្តង់ដារអន្តរជាតិពិតប្រាកដជូនដល់សិស្សានុសិស្សខ្មែរ និងអាចឲ្យពួកគាត់រក្សាបាននូវអត្ដសញ្ញាណជាតិខ្មែរ ដែលនេះជាមូលហេតុចម្បងដែលខ្ញុំបានសម្រេចចិត្តវិនិយោគនៅក្នុងវិស័យអប់រំនៅកម្ពុជា"។

នៅពិធីនេះ ក៏មានការប្រគល់សញ្ញាបត្រជូនសិស្សានុសិស្សដែលបានបញ្ចប់ថ្នាក់ មតេ្តយ្យសិក្សា និងការសម្ដែងរបស់សិស្សានុសិស្ស ដើម្បីបង្ហាញពីសមត្ថភាពផ្នែកភាសាអង់គ្លេស សិល្បៈ និងតន្ត្រី។

អគារបឋមសិក្សាថ្មីនេះរួមមានបណ្ណាល័យ និងបន្ទប់កុំព្យូទ័រ បន្ទប់តន្ត្រី បន្ទប់ពិសោធន៍ អាងហែលទឹកចំនួន ២ អាហារដ្ឋានដែលមានទំហំធំ បន្ទប់ថ្នាក់រៀនទំនើបៗ សាលលេងកីឡា និងសន្និសីទដែលអាចឲ្យសិស្សានុសិស្សលេងកីឡាហ្វុតសាល កីឡាបាល់បោះ និងកីឡាបាល់ទះ។ សម្ភារៈបរិក្ខារទំនើបៗនៅក្នុងបរិវេណសាខាថ្មីនេះបានលើកតម្កើង សាលាអន្តរជាតិលើននីងចាំងហ្គលឱ្យមានភាពលេចធ្លោក្នុងចំណោមសាលា អន្តរជាតិកំពូលៗនៅកម្ពុជា។

បច្ចុប្បន្ន សាលាអន្តរជាតិ លើននីងចាំងហ្គល ផ្ដល់នូវការអប់រំពីកម្រិតថ្នាក់មត្តេយ្យដល់ថ្នាក់ទី៦។ ក្រៅពីគ្រូមានគរុកោសល្យវិជ្ជាជីវៈខ្ពស់ក្នុងការបង្រៀនទៅតាមកម្មវិធីសិក្សាកម្រិតស្តង់ដារខ្ពស់ពីកាណាដា រួមទាំងបរិស្ថានសិក្សា និងសេវាកម្មល្អ សាលាអន្តរជាតិ លើននីងចាំងហ្គល មានភាពខុសប្លែកគ្នាពីសាលាដទៃទៀត ដោយសាលាបានផ្តល់នូវបទពិសោធន៍ពិសេសជូនដល់មាតាបិតាក្នុងការតាមដានពីការសិក្សារបស់កូនៗ និងផ្តល់ជូននូវការធានានិងទំនុកចិត្តថាកូនៗរបស់ពួកគាត់ត្រូវបានថែទាំបានយ៉ាងល្អបំផុត។

កម្មវិធីសិក្សាភាសាខ្មែរ របស់សាលាអន្តរជាតិ លើននីងចាំងហ្គល ត្រូវបានទទួលស្គាល់ដោយក្រសួងអប់រំ យុវជន និងកីឡាកម្ពុជា។ រីឯសញ្ញាប័ត្រទទួលស្គាល់ដោយសាលា លើននីងចាំងហ្គល ប្រទេសកាណាដា និងក្រសួងអប់រំ យុវជន និងកីឡាកម្ពុជា។

រីកចម្រើនជាមួយនឹងគុណភាពអប់រំស្តង់ដារកាណាដាដែលរក្សានូវអត្ដសញ្ញាណខ្មែរ!