ប៊ុត សារ៉ាវុទ្ធ មិនគិតគូររឿងលុយកាក់ជាធំ

2016-07-08 17:07:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៊ុត សារ៉ាវុទ្ធ ដែលជាតារាសម្ដែង និងបង្ហាញម៉ូដប្រុសជំនាន់ថ្មីនោះ ពេលក្ដោបបានតំណែងសំខាន់ក្នុងរឿង "ទឹកចិត្តម្ដាយសម័យថ្មី” របស់អ្នកស្រី ពាន់ ភួងបុប្ផា បាននិយាយរឿងតម្លៃខ្លួនថា លោកមិនបានគិតពីលុយកាក់ជាធំឡើយ។

“ចំពោះតម្លៃខ្លួនរឿងនេះ ខ្ញុំមិនទាន់បាននិយាយគ្នាជាមួយក្រុមការងារឡើយ ព្រោះចាំនិយាយគ្នាពេលក្រុងពាលីហើយ”។ ចំពោះបញ្ហានេះ លោកបញ្ជាក់ពីហេតុផល ២ ចំណុចថា ទី១ ព្រោះតារាវ័យ ២៧ ឆ្នាំរូបនេះគិតថារឿង "ទឹកចិត្តម្ដាយសម័យថ្មី” លោកជាតួអង្គកូនប្រុសរបស់តួអង្គឯកធំអ្នកស្រី អម្ពរ ទេវី។

ចំណែកមូលហេតុមួយទៀត គឺ "ខ្ញុំគិតថា ទោះពួកខ្ញុំមិនបាននិយាយគ្នាមុនក៏ដោយ ក៏ខ្ញុំគិតថា ខាងក្រុមការងារនឹងរៀបចំឲ្យខ្ញុំបានសមរម្យដែរ ព្រោះពួកគាត់សុទ្ធតែជាអ្នកធ្វើការនៅក្នុងផ្នែកភាពយន្តនេះយូរហើយ គាត់ប្រាកដជាយល់ដឹងពីតួអង្គនីមួយៗថាសក្ដិសមបានប៉ុន្មាន។”

តែលោកបានបញ្ជាក់ជាចុងក្រោយថា ចំពោះភាពយន្តដទៃទៀត មុនពេលទទួលថត ត្រូវពិភាក្សាពីតម្លៃខ្លួនជាមុនសិន តែរឿងដែលមានការចូលរួមពីសំណាក់តារាបួនជំនាន់នេះ ទោះជាម្ចាស់ផលិតកម្មឲ្យប៉ុន្មាន ក៏ទទួលយកដែរ៕

អត្ថបទ៖ទ្រី រ៉ាវី