U-14 កម្ពុជា លត់ U-14 ទីម័រខាងកើត ១១-០ នៅប្រ៊ុយណេ

2016-07-27 17:48:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ U14 កម្ពុជាបានយកឈ្នះក្រុមបាល់ទាត់ U14 ទីម័រខាងកើត ដោយលទ្ធផលចាស់ដៃ១១-០ កាលពីព្រឹកមិញនេះ សម្រាប់ការប្រកួតកម្មវិធី AFC U14 Regional Festival of Football 2016 នៅប្រទេសប្រ៊ុយណេ។

តាមការឲ្យដឹងពី Page ផ្លូវការរបស់សហព័ន្ធបាល់ទាត់កម្ពុជាបានបង្ហាញថា ក្រុមយុវជនថ្នាលកម្ពុជាអាយុ១៤ឆ្នាំទទួលបានជ័យជម្នះលើក្រុមយុវជនថ្នាលទីម័រខាងកើតអាយុក្រោម១៤ឆ្នាំដោយលទ្ធផលមិនអាចតដៃរួចគឺ ១១-០ សម្រាប់ការប្រកួតទាំងពីរតង់ត្រឹមតែ៦០នាទី។ គ្រាប់បាល់ទាំង១១របស់យុវជនកម្ពុជារកបានកីឡាករលេខ២៥ គី រីណា ៥គ្រាប់ម្នាក់ឯង(នាទី ២៣ ២៩ ៣៩ ៥៥ និង៦១) កីឡាករលេខ១០ ប៊ុនធឿន ប៊ុនណារ៉ុងរកបាន២គ្រាប់ (នាទី២១ និង៤៦) កីឡាករលេខ១២ រី លាភផេងរកបាន២គ្រាប់(នាទី៥ និង៣១) កីឡាករលេខ១៤ ផៃ ម៉េងឆ័យរកបាន១គ្រាប់នៅនាទី២៥ និងកីឡាករលេខ១៥ ជា សុខម៉េង រកបាន១គ្រាប់នៅនាទីទី៩។

នេះជាជ័យជម្នះលើកទីពីរសម្រាប់ក្រុមយុវជនកម្ពុជា បន្ទាប់ពីបានយកឈ្នះក្រុមយុវជនហ្វីលីពីនដោយលទ្ធផល ៣-១ កាលពីព្រឹកម្សិលមិញ។ ប្រកួតបន្ទាប់របស់ U14 កម្ពុជាក្នុងកម្មវិធី AFC U14 Regional Festival of Football 2016 នឹងប៉ះ U14 ប្រទេសម៉ាឡេស៊ី វេលាម៉ោង ៧:៣០នាទីនាថ្ងៃទី២៩ ខែកក្កដា ឆ្នាំ២០១៦។ នេះជាកម្មវិធីសម្រាប់យុវជនចូលរួមប្រកូតបង្ហាញសមត្ថភាព និងបទពិសោធន៍ ក៏ដូចជាទទួលបានសញ្ញាបត្រតែប៉ុណ្ណោះ ពោលគឺមិនមែនជាការដណ្តើមពានរង្វាន់ឡើយ៕

អត្ថបទ៖ ស្រី សុវណ្ណដារ៉ា រូបថត៖ សហព័ន្ធបាល់ទាត់កម្ពុជា