Volkswagen មិនញញើតការប្រកួតប្រជែងពីទីផ្សាររថយន្តងងឹត

2016-08-17 16:26:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុនVolkswagen នៅតែមានសុទិដ្ឋិនិយមសម្រាប់ការលក់រថយន្តរបស់ខ្លួននៅទីផ្សារកម្ពុជា បើទោះបីមានការហូរចូលរថយន្តលក់នៅខាងក្រៅយ៉ាងអនាធិបតេយ្យ ដែលធ្វើឲ្យប៉ះពាល់ទីផ្សារលក់រថយន្តនាំចូលផ្លូវការ។

លោក មិន សុផល អ្នកគ្រប់គ្រងជាន់ខ្ពស់របស់ក្រុមហ៊ុនហ៊ុង ហ៊ាប ជាក្រុមហ៊ុនដែលទទួលសិទ្ធនាំចូលរថយន្តប្រភេទ Volkswagen ពីប្រទេសអាល្លឺម៉ង់ឲ្យដឹងថា ការហូរចូលរថយន្តគ្មានប្រភពច្បាស់លាស់ តិចឬច្រើនបានធ្វើឲ្យប៉ះពាល់ដល់ទីផ្សារលក់រថយន្តរបស់ក្រុមហ៊ុននាំចូលស្របច្បាប់។ យ៉ាងណា លោកបញ្ជាក់ថា សម្រាប់ Volkswagen នៅតែមានសុទិដ្ឋិនិយម ហើយក៏មិនខ្លាចការប្រកួតប្រជែងដែរ។

លោកថា អតិថិជនមួយចំនួនគិតថា ទិញរថយន្តពីខាងក្រៅមានតម្លៃថោកជាង ប៉ុន្តែពួកគេក៏ត្រូវដឹងពីប្រភពរថយន្តដែលត្រូវបានគេនាំចូល ដែលមិនអាចឆ្លើយតបតម្រូវការប្រើប្រាស់និងនាំហានិភ័យខ្ពស់។

លោកបញ្ជាក់ថា រថយន្តដែលលក់ក្នុងទីផ្សារងងឹត ត្រូវបានគេនាំចូលពីប្រភពមិនច្បាស់លាស់ ដោយរថយន្តខ្លះត្រូវបានគេកែច្នៃខុសបច្ចេកទេសដើមពីរោងចក្រ ដែលអាចនាំបញ្ហាក្នុងការប្រើប្រាស់។

ទោះបីបែបនេះលោកថា ពលរដ្ឋបច្ចុប្បន្នចាប់ផ្ដើមយល់ដឹងច្រើនពីការជ្រើសរើសរថយន្ត បើទោះបីមួយចំនួននៅតែស្ទាក់ស្ទើរពីការចំណាយខ្ពស់សម្រាប់ទិញរថយន្តនាំចូលផ្លូវការ។ លោកថា ការទិញរថយន្តពីក្រុមហ៊ុនដែលមានការទទួលស្គាល់ ផ្តល់ទំនុកចិត្តនិងសុវត្ថិភាពសម្រាប់បើកបរ។ ជាមួយនេះ អតិថិជនក៏ទទួលការផ្តល់ការធានាលើការថែទាំ និងសេវាជួសជុលប្រកបដោយស្តង់ដា។

Volkswagen បានបង្ហាញវត្តមានលើទីផ្សារកម្ពុជាក្នុងឆ្នាំ ២០១៣។ ការនាំយីហោរថយន្តលំដាប់ពិភពលោកនេះ ក៏ប្រឈមមុខការប្រកួតប្រជែងជាមួយម៉ាករថយន្តជាច្រើនទៀត ជាពិសេសក្នុងទីផ្សារដែលពលរដ្ឋ ៩០ ភាគរយ នៅតែទំនោរពេញនិយមរថយន្តមួយទឹកជាងរថយន្តថ្មីដែលនាំចូលផ្លូវការ។

តាមក្រុមហ៊ុនហ៊ុន ហ៊ាប បានឲ្យដឹងថា ក្នុងរយៈពេល ៦ ខែដើមឆ្នាំ ក្រុមហ៊ុនលក់រថយន្តបានជាង ៦០ គ្រឿងនិងរំពឹងលក់ឲ្យបាន ១០០ គ្រឿងសម្រាប់ឆ្នាំ ២០១៦៕

ចុចអាន៖ Volkswagen ពិនិត្យលទ្ធភាពសាងសង់រោងចក្រដំឡើងរថយន្តដំបូងនៅកម្ពុជា

អត្ថបទ៖ ប៊ុណ្ណារ៉ា