ថ្ងៃសែនព្រះខែគេនិយមធ្វើអ្វី?
- 2016-09-07 16:16:29
- ចំនួនមតិ 0 | ចំនួនចែករំលែក 0
ថ្ងៃសែនព្រះខែគេនិយមធ្វើអ្វី?
ចន្លោះមិនឃើញ
នៅសល់ពេលមិនដល់១០ថ្ងៃទៀតទេ បុណ្យសែនព្រះខែនឹងឈានចូលមកដល់ហើយ គឺនៅថ្ងៃ ទី១៥ ខែកញ្ញាខាងមុខនេះ។ សែនព្រះខែ គឺជាពេលជួបជុំដ៏រីករាយរបស់សមាជិកគ្រួសារដើម្បីបង្ហាញក្ដីស្រឡាញ់ និងការនឹករលឹកគ្នា។ មានកម្មវិធីជាច្រើនដែលប្រជាជនចិនតែងនិយមធ្វើក្នុងពិធីនេះដូចជា៖
១.សម្លឹងមើលព្រះចន្ទជាមួយគ្នា សម្រាប់អ្នកដែលចូលរួមប្រារព្ធពិធីបុណ្យសែនព្រះខែ ការសម្លឹងមើលព្រះចន្ទពេញវង់ជាមួយគ្នា គឺជាផ្នែកមួយដ៏សំខាន់ ព្រោះថាពេលនេះជាពេលដែលព្រះចន្ទស្អាតបំផុត ភ្លឺបំផុតប្រចាំឆ្នាំ។ ក្នុងអំឡុងពេលដែលប្រជាជនបួងសួងដល់ព្រះចន្ទនេះ ពួកគេក៏រៀបចំផ្លែឈើ និងនំនែកមួយចំនួនទៀត ដោយមានជំនឿថា គេនឹងទទួលបានក្ដីសុខ ជួបតែសំណាងល្អ។ នៅក្នុងប្រទេសចិន អ្នកទេសចរណ៍មួយចំនួនគេនិយមទៅគយគន់ព្រះចន្ទនៅតាមតំបន់ទន្លេ ភ្នំ ឬបឹងល្បីៗមួយចំនួនដូចជា ភ្នំ Lu ភ្នំ Huang ទន្លេ Yangtze បឹង Dongting ជាដើម ដែលធ្វើឲ្យបរិយាកាសកាន់តែរ៉ូមែនទិក។
២.ការបរិភោគនំសែនព្រះខែ នំសែនព្រះខែគឺពិតជាសំខាន់មិនអាចខ្វះបានសម្រាប់ពិធីបុណ្យសែនព្រះខែ។ នំដែលមានរាងមូលសម្រាប់សែននោះ គឺជាដំណាងឲ្យការជួបជុំគ្នានៃសមាជិកគ្រួសារ។ នំសម្រាប់ថ្វាយព្រះចន្ទជាទូទៅមានគ្រឿងផ្សំជាច្រើនដូចជា គ្រាប់ផ្កាឈូករ័ត្ន ល្ង ស៊ុត សណ្ដែកដី អាល់ម៉ុង និងគ្រឿងឆ្ងាញ់ៗមួយចំនួនទៀត។ សម្រាប់ជនជាតិចិន ពួកគេមិនត្រឹមតែញុំានំនេះក្នុងអំឡុងពេលសែនព្រះខែប៉ុណ្ណោះទេ តែគេក៏ឲ្យនំនេះជាអំណោយដល់បងប្អូនមិត្តភក្ដិ ដើម្បីបង្ហាញការយកចិត្តទុកដាក់របស់ពួកគេផងដែរ។
៣.ការជួបជុំគ្នាញុំាអាហារពេលល្ងាចដ៏រីករាយ ការអង្គុយតុជុំគ្នាញាំអាហារពេលល្ងាចគឺជាសកម្មភាពដ៏សំខាន់ក្នុងថ្ងៃសែនព្រះខែ។ សមាជិកគ្រួសារមិនថាជិត ឬឆ្ងាយ ត្រូវមកជួបជុំញាំអាហារពេលល្ងាចជាមួយគ្នាដើម្បីបង្ហាញពីក្ដីស្រលាញ់ និងការយកចិត្តទុកដាក់។ នេះគឺជាហេតុផលដ៏សំខាន់មួយដែលប្រជាជនប្រារព្ធពិធីបុណ្យសែនព្រះខែ។
៤.អុជចង្កៀងគោម ក្មេងៗនៅក្នុងប្រទេសចិននិយមលេងចង្កៀងគោមដោយធ្វើចេញពីក្រដាស និងដាក់ទៀននៅខាងក្នុង។ចង្កៀងគោមក៏មានដាក់លក់ផងដែរនៅតាមទីផ្សារដោយមានរចនាជារូបប្លែកជាច្រើន។ ចង្កៀងគោមរាប់រយត្រូវបានដាក់នៅតាមផ្លូវនានាយ៉ាងស្អាត។ នៅតំបន់ខ្លះប្រជាជននាំគ្នាបង្ហោះគោមដើម្បីសុំក្ដីសុខទៀតផង។
៥.ទស្សនាការសម្ដែងរបាំនាគភ្លើង ពិធីនេះត្រូវបានធ្វើឡើងនៅប្រទេសចិន ជាពិសេសនៅក្រុងហុងកុង ដែលមានរយៈពេលបីយប់។ នៅទីក្រុងហុងកុង មានអ្នកចូលរួមសម្ដែងក្នុងពិធីដ៏ធំនេះជាង ៣០០០០នាក់ជារៀងរាល់ឆ្នាំដោយពួកគេផ្លាស់ប្ដូរវេនគ្នាសម្ដែង។ ពួកគេជឿថាការធ្វើដូចនេះនឹងនាំឲ្យមានសំណាងល្អ៕
អត្ថបទៈ យ៉ារិទ្ធ
ប្រភពៈ www.chinatravel.com
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
