អាថ៌កំបាំងនៃនំសែនព្រះខែ ដែលមានរសជាតិផ្អែមឈ្ងុយឆ្ងាញ់

2016-09-07 22:11:32
ចំនួនមតិ 0 | ចំនួនចែករំលែក 0

ចន្លោះមិនឃើញ

នំសែនព្រះខែជានំមិនអាចខ្វះបាន ដែលប្រជាជនចិន ឬអ្នកជាប់សែស្រឡាយចិនប្រើប្រាស់សម្រាប់សែន និងបរិភោគក្នុងអំឡុងពេលបុណ្យសែនព្រះខែ។ នៅក្នុងវប្បធម៌ចិន វាត្រូវបានប្រើជាតំណាងនៃការជួបជុំរបស់គ្រួសារ ថែមទាំងក៏ជាទីពេញនិយមក្នុងការធ្វើជាអំណោយសម្រាប់ជូនមិត្តភក្ដិ ឬក្រុមគ្រួសារផងដែរ។

ជាទូទៅនំសែនព្រះខែគឺមានរាងមូល ទំហំប្រហែល១០សង់ទីម៉ែត្រ និងកម្រាស់ប្រហែល៣-៤សង់ទីម៉ែត្រ។ នំព្រះខែតែងត្រូវបានតុបតែង រចនាអក្សរយ៉ាងស្រស់ស្អាត និងមានរសជាតិផ្អែម។

គ្រឿងផ្សំជាច្រើនត្រូវបានគេដាក់បញ្ចូលគ្នាដូចជា សណ្ដែកក្រហម ល្ង សណ្ដែកដី គ្រាប់ផ្កាឈូករត្ន អាល់ម៉ុង ស៊ុតលឿងទាំងមូលយកចេញពីពងទាប្រៃដែលតំណាងឲ្យព្រះចន្ទពេញវង់ និងគ្រឿងផ្សំមួយចំនួនទៀត។ ដើម្បីបន្ថែមរសជាតិអ្នកអាចញ៉ាំនំព្រះខែជាមួយទឹកតែបាន។

នំព្រះខែមានច្រើនរសជាតិនិងច្រើនសណ្ឋានអាស្រ័យទៅតាមចំណូលចិត្តរបស់ប្រជាជននៅតាមតំបន់នីមួយៗ។ ឧទាហរណ៍ដូចជានៅទីក្រុងប៉េកាំង ឬនៅភាគខាងជើងប្រទេសចិន គេនិយមប្រើប្រេងល្ងច្រើនក្នុងការធ្វើនំ សម្បកក្រៅផុយ ស្នូលខាងក្នុងទន់ និងរសជាតិមិនសូវផ្អែមទេ។

ចំណែកភាគខាងកើតប្រទេសចិនវិញគឺនៅតំបន់ Suzhou គេនិយមនំដែលមានសំបកស្ដើងទន់ ប្រើប្រេងនិងខ្លាញ់ ហើយមានរសជាតិផ្អែម។

បច្ចុប្បន្នដោយសារការរស់នៅរបស់ប្រជាជន កាន់តែមានភាពទាន់សម័យ អ្នកធ្វើនំសែនព្រះសែនបានច្នៃប្រឌិត ផលិត នំសែនព្រះខែប្លែកៗ ដោយច្នៃឲ្យមានភាពទាក់ទាញទាំងលើរសជាតិ និងប្រភេទនំ៕