អេឡិច ហ្សូរ៉ា ឈឺក្បាលរឿងគេបង្អាប់

2016-09-14 17:02:34
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងចម្រៀង អេឡិច ហ្សូរ៉ា បានពោលពាក្យត្អូញត្អែរថា ពិតជាឈឺក្បាលនឹងពាក្យសម្ដីរបស់អ្នកបង្អាប់លោកខ្លាំងណាស់។

រូបភាព អេឡិច ហ្សូរ៉ា ថតនៅប្រទេសប៉ូឡូញ

“ម្សិលមិញ គឺថាខាងក្រុមការងារគាត់បានបង្ហោះ Trailer រឿង "ទេសចរណ៍ឋាននរក” ហើយក៏មានអ្នកខ្លះ comment ថា ឲ្យបងថា ម៉េចក៏តួឯកប្រុសនោះមាត់ធំម៉េស? ដូចខ្វះតួប្រុសអីជាដើម ឃើញចឹងបងឈឺក្បាលហ្មង"។ តារាវ័យ ២៨ ឆ្នាំខាងលើបានបញ្ជាក់ទៀតថា មានការមិនសប្បាយចិត្តតិចតួច ចំពោះការបង្អាប់ទាំងនោះ។ ប៉ុន្តែលោកមិនតបតអ្វីឡើយ គ្រាន់តែចង់ឲ្យប្រិយមិត្តបើកចិត្តឲ្យទូលាយបន្តិចប៉ុណ្ណោះ។

ហ្សូរ៉ា បន្តថា ទោះជាមានអ្នកមិនពេញចិត្តខ្លះមែន តែក៏មានគាំទ្រការសម្ដែងលោកច្រើនដែរ និងព្យាយាមលើកទឹកចិត្តដល់រូបលោកគ្រប់ពេល។ "តាមពិតពួកគាត់មិនទាន់យល់ច្បាស់ពីចារឹករបស់តួសម្ដែងនីមួយៗ។ ចំពោះរឿងនេះគេជ្រើសរើសបង ព្រោះជាប្រភេទរឿងកំប្លែងៗ ចឹងហើយគេមិនចាំបាច់យកតួណាដែលសង្ហាពេក។ តែក៏អរគុណពួកគាត់ដែរ ដែលបានតាមដានរឿងរបស់ខ្ញុំ”។

តារានិយមការហាត់ប្រាណក្បាច់យូហ្គាខាងលើបានបញ្ជាក់ទៀតថា ដ្បិតមានការរិះគន់លើរូបលោកក៏ពិតមែន តែមិនបានរិះគន់លើសាច់រឿងឡើយ ដែលចំណុចនេះ លោកអាចបញ្ជាក់ថា នោះជាជំហានជោគជ័យបណ្ដើរៗហើយ។ រឿង "ទេសចរណ៍ឋាននរក” ជាភាពយន្តបែបកំប្លែងរបស់ផលិតកម្ម Vcine ដែលនឹងត្រៀមចាក់បញ្ចាំងនៅថ្ងៃ ២៩ ខែកញ្ញានេះគ្រប់រោងកុនទាំងអស់៕

អត្ថបទ៖ទ្រី រ៉ាវី