ទស្សនាផ្ទះបុរាណខ្មែរអាយុជាង ១០០ ឆ្នាំ នៅភូមិវត្តគរ ក្រុងបាត់ដំបង

2016-09-14 17:11:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្ទះខ្មែរបុរាណមួយមានអាយុជាង ១០០ ឆ្នាំ ក្រោយពីទឹកដីនៃខេត្តបាត់ដំបង បានកាត់ចេញពីថៃមកឲ្យខ្មែរវិញ។ ផ្ទះបុរាណនេះ បានក្លាយទៅជាផ្ទះដែលមានអាយុកាលចាស់ជាងគេនៅភូមិវត្តគរ សង្កាត់គរ ក្រុងបាត់ដំបង ខេត្តបាត់ដំបង។ ទន្ទឹមនឹងនេះ វាបានក្លាយជាទីតាំងប្រវត្តិសាស្រ្តដ៏សំខាន់សម្រាប់អ្នកជំនាន់ក្រោយ បន្ទាប់ពីសម័យលោកម្ចាស់បានរលាយបាត់ទៅ។

តើចង់ដឹងថា ផ្ទះបុរាណនេះ មានប្រវត្តិ និង រឿងរ៉ាវដូចម្ដេចខ្លះ លោក ហួន ទីណារ័ត្ន ភ្នាក់ងារ Sabay ប្រចាំខេត្តបាត់ដំបង បានជួបលោក យាយ យៀង ជាម្ចាស់ផ្ទះជំនាន់ទីបី នៃផ្ទះបុរាណវ័យចំណាស់ជាប់ស្នាមប្រវត្តិសាស្រ្តនាសម័យលោកម្ចាស់ ហើយលោកយាយរៀបរាប់ប្រាប់ Sabay ដូចខាងក្រោម៖

ស្ថិតនៅក្នុងវ័យ ៧៧ ឆ្នាំ សក់សហើយខ្លីត្រឹមស្មា លោក យាយ យៀង បានរស់នៅក្នុងផ្ទះជាកេរ្តិ៍ដូនតា ដែលសល់តាំងពីសម័យលោកម្ចាស់ ដោយសារតែផ្ទះនេះមានវ័យចំណាស់ជាង ១០០ ឆ្នាំ និង ជាប់ទាក់ទងប្រវត្តិសាស្រ្ត ផ្ទះនេះក៏បានទាក់ទាញភ្ញៀវបរទេស និង ខ្មែរខ្លះ ចូលទស្សនា មិនលស់ថ្ងៃ។ លោកយាយ បានរៀបរាប់ថា អ្នកកសាងផ្ទះនេះ គឺជីដូនជីតារបស់គាត់ ដែលកាលណោះជាស្មៀនរបស់លោកម្ចាស់កថាថនឈុំ ស្ដេចត្រាញ់ចង្វាត់បាត់ដំបង (វាជាងារដែលស្ដេចថៃដាក់ឲ្យ) ។

លោកយាយ យៀង អ្នកជំនាន់ទី ៣ នៃផ្ទះបុរាណអាយុជាង ១០០ឆ្នាំ

“នៅឆ្នាំ ១៩០៧ ទឹកដីបាត់ដំបងត្រូវកាត់មកអោយខ្មែរយើងវិញ ហើយជីតាខ្ញុំជាស្មៀនលោកម្ចាស់ ដល់ពេលនោះលោកម្ចាស់ទៅស្រុកថៃក៏ហៅតាខ្ញុំទៅជាមួយ។ តាខ្ញុំមិនព្រមទៅ ក៏មកទិញដីមួយហិចតានៅទីនេះហើយសាងសង់ផ្ទះនេះឡើង។" លោកយាយ យៀង មានប្រសាសន៍។

“រចនាបថផ្ទះនេះស្ថិតក្នុងប្រភេទផ្ទះខសង ឬផ្ទះដំបូលពីរជាន់។ សសរវាធ្វើពីឈើផ្ចឹក រនាបក្ដារធ្វើពីឈើក្រាវ ហើយមានពិតានមានលក្ខណខុសប្លែកពីផ្ទះឯទៀតៗធ្វើពីគគីរ។ ដូច្នេះហើយបានជាផ្ទះនេះមានខ្យល់អាកាសត្រជាក់ស្រួលណាស់។ ចំណែកជញ្ជាំងវិញ គឺប្រើបាយអរដែលលាយតាមរូបមន្តពិសេសរបស់ខ្មែរពីបុរាណមាន កំបោរលាយខ្សាច់ ហើយខាងក្នុងមានឫស្សី និងស្ករក្រហម។ នៅតាមបង្អួច និងទ្វារសុទ្ធតែមានពាសដែកការពារមិនអោយចោរគាស់ចូលបាន។ នៅសម័យខ្មែរក្រហម កម្មាភិបាលខ្មែរក្រហមបានមកស្នាក់នៅផ្ទះនេះ តែខ្ញុំនៅតែឧស្សាហ៍មកមើលផ្ទះមួយឆ្នាំម្ដងជានិច្ច។ ខ្មែរក្រហមបម្រុងរុះរើផ្ទះនេះនៅខែចេត្រឆ្នាំ ១៩៧៩ តែពួកវៀតណាមវាយចូលមកខែមករា ក៏ខកខានមិនបានរើ ហើយខ្ញុំក៏មកនៅផ្ទះនេះវិញរហូតដល់សព្វថ្ងៃ”។ នេះបើតាមការរៀបរាប់របស់លោកយាយ។

មកទល់ពេលនេះ ផ្ទះនេះមានចំណាស់ ១០៩ ឆ្នាំហើយ ហើយដើមឈើដែលនៅជុំវិញផ្ទះគឺ លោកតាគាត់ជាអ្នកដាំដោយផ្ទាល់ហើយមានអាយុ ១០៧ឆ្នាំហើយ។ ទោះយ៉ាងណាផ្ទះបុរាណមួយនេះនៅតែមានភាពរឹងមាំដដែល និងមានការខូចខាតតិចតួចប៉ុណ្ណោះ។ ជារៀងរាល់ថ្ងៃ មានភ្ញៀវទេសចរជាតិ និងអន្តរជាតិបានមកចូលទស្សនាផ្ទះនេះមិនដាច់ថ្ងៃនោះទេ ហើយលោក យាយ យៀង នឹងស្វាគមន៍ហើយរៀបរាប់ពីប្រវត្ថិផ្ទះនេះដល់អ្នកដែលមកទស្សនា។