កៀកថ្ងៃសែន នំព្រះខែ និងចង្កៀងគោម លក់ដាច់ខ្លាំង
- 2016-09-15 00:37:42
- ចំនួនមតិ 0 | ចំនួនចែករំលែក 0
កៀកថ្ងៃសែន នំព្រះខែ និងចង្កៀងគោម លក់ដាច់ខ្លាំង
ចន្លោះមិនឃើញ
ថ្ងៃសែនព្រះខែនឹងមកដល់ស្អែកនេះហើយ យើងសង្កេតឃើញ អាជីវករកំពុងមមាញឹកយ៉ាងខ្លាំងក្នុងការលក់នំសែនព្រះខែ និងចង្កៀងគោមនៅតាមទីផ្សារ និងបណ្តាផ្លូវនានាក្នុងរាជធានីភ្នំពេញ។ តូបតូចធំដែលមានដាក់តាំងលក់នំសែនព្រះខែច្រើនមុខ និងចង្កៀងគោមព្រោងព្រាត អតិថិជនខ្មែរជាប់ស្រឡាយចិនប្រញ៉ាយទិញមិនដាច់។
ថ្លែងមកកាន់ Sabay ទាំងទឹកមុខញញឹមញញែម បងស្រី ម៉ី ដែលជាអាជីវករលក់នំសែនព្រះខែនៅតាមបណ្ដោយមហាវិថី ហ្សាដឺហ្គោល បានឲ្យដឹងថា ថ្ងៃនេះលក់ដាច់ច្រើនដោយសារវាជិតដល់ថ្ងៃសែនព្រះខែ។ អតិថិជនដែលមកទិញមានចម្រុះទាំងចិន ទាំងខ្មែរជាប់សែស្រឡាយចិន។ រៀងរាល់ឆ្នាំបងស្រីតែងតែបើកលក់១អាទិត្យមុនសែន ដោយមានលក់ទាំងនំ និងចង្កៀងគោមម៉ូដប្លែកៗ។ ស្រដៀងគ្នានេះដែរ បងប្រុស លាង ក៏បានលើកឡើងថា លោកតែងតែលក់នំមុនសែនព្រះខែ៣-៤ថ្ងៃ ហើយមានភ្ញៀវច្រើនគាត់តែងមករកជាវ ទាំងង៉ូវយីង ស្នូរដូង ត្រាវ និងសណ្ដែក តែភាគច្រើនពួកគាត់ចូលចិត្តនំរសជាតិដូង។ អាជីវករលក់នំព្រះខែនៅជិតផ្សារអូរឫស្សី រូបនេះក៏បានឲ្យដឹងដែរថា តម្លៃនំនៅហាងរបស់លោកមានចន្លោះពី ១០ ទៅ ១៥ដុល្លារ ទៅតាមប្រភេទ និងទំហំ។
ចំណែកកញ្ញា ពុទ្ធី បុគ្គលិករដ្ឋបាលនៅហាងនំបុ័ងបាយ័នសាខាពេទ្យចិន ក៏បានប្រាប់ Sabay ដែរថា ហាងនំបុ័ងបាយ័នមានភ្ញៀវមកច្រើន។ ចំពោះភ្ញៀវដែលគាត់មានលទ្ធភាព គាត់ទិញនំឈុតធំតែម្ដង គឺស្ដេចនំង៉ូវយីង ពងទា៨ មានលាយសម្បុកត្រចៀកកាំ និងយិនសិន ដែលមានតំលៃ៦៩ដុល្លារ ។ តែចំពោះអ្នកមានជីវភាពមធ្យម ភាគច្រើនទិញង៉ូវយីង ទំហំតូចល្មមដែលតម្លៃប្រហែល ៤ ទៅ ៥ដុល្លារ រសជាតិពេញនិយមគឺសណ្ដែក។ រីឯនំកោរនិងនំពារ រសជាតិទុរេន និងស្លឹកតយ ក៏មានអ្នកទិញច្រើនដែរ។ កញ្ញាក៏បានបន្ថែមថា «និយាយតាមត្រង់អូន ហាងបងដាច់ខ្លាំងរហូតលក់អត់ទាន់ ដោយសារយើងនំយើងមិនសូវផ្អែមពេកហើយ គ្រឿងផ្សំសុទ្ធតែនៅក្នុងស្រុក ដែលផលិតឡើងថ្មីៗស្រស់ៗ ហើយគ្មានដាក់សារធាតុឲ្យទុកបានយូរ»។
ចុះប្រិយមិត្តវិញ បានត្រៀមអ្វីខ្លះសម្រាប់ពិធីបុណ្យសែនព្រះខែស្អែកនេះ?
អត្ថបទៈ យ៉ារិទ្ធ
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
