បន្ទាប់ពីធ្លាក់ ស្រីខួច-សុវណ្ណបញ្ញា និង ស៊ីនឿន ឡើងទៅវគ្គផ្ដាច់ព្រ័ត្រវិញ

2016-10-04 17:43:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះកម្មវិធី I Am a Singer Cambodia បានផ្សាយផ្ទាល់សប្ដាហ៍ទី១១របស់ខ្លួនដែលត្រូវជាវគ្គពាក់កណ្ដាលផ្ដាច់ព្រ័ត្រ និងបានរកឃើញតារាចម្រៀងអាជីព៣រូបដែលធ្លាប់បានចាកចេញពីកម្មវិធីម្ដងហើយ គឺ ផន ស្រីខួច ឈិត សុវណ្ណបញ្ញា និង នៅ ស៊ីនឿន ត្រូវឡើងបន្តទៅវគ្គផ្ដាច់ព្រ័ត្រវិញ បន្ទាប់ពីបានយកឈ្នះតារាអាជីព៤រូបផ្សេងទៀត។

ជាការពិត តារាចម្រៀងអាជីព៣រូបខាងលើ គឺបានចាកចេញពីកម្មវិធីម្ដងរួចមកហើយ ដោយសារពួកគេទទួលបានសារគាំទ្រតិច។ ប៉ុន្តែតាមលក្ខខណ្ឌកម្មវិធី សម្រាប់វគ្គពាក់កណ្ដាលផ្ដាច់ព្រ័ត្រនេះ តារាចម្រៀងអាជីពដែលបានធ្លាក់ពីកម្មវិធីទាំង៧រូបមានដូចជា ផន ស្រីខួច ឈិត សុវណ្ណបញ្ញា នៅ ស៊ីនឿន ទេព បូព្រឹក្ស ហ្សូណូ ម៉ាទីន និង អាន វិសាល ត្រូវប្រជែងគ្នាម្ដងទៀត ដើម្បីដណ្ដើមឱកាស វិលទៅកម្មវិធីវិញ ដោយឡើងទៅវគ្គផ្ដាច់ព្រ័ត្រតែម្ដង។

ក្រោយប្រជែងគ្នា កាលពីសប្ដាហ៍មុននេះ នៅ ស៊ីនឿន ផន ស្រីខួច និង ឈិត សុវណ្ណបញ្ញា ទទួលបានការផ្ញើសារគាំទ្រច្រើនជាងគេ។ ដូច្នេះ ពួកគេនឹងត្រូវចូលក្នុងកម្មវិធីវិញ ត្រៀមប្រកួតជាបេក្ខភាពដែលនៅសល់ក្នុងកម្មវិធីបន្តទៀត ដែលមានយក់ ដួងតារា ដួង វីរៈសិទ្ធ វី ឌីណែត សួស វីហ្សា និងពួកគេទាំង៣។

ចំពោះលក្ខខណ្ឌជម្រុះ សម្រាប់សប្ដាហ៍ទី១២នេះ ផលិតករកម្មវិធីដែលមានប្រភពមកពីប្រទេសកូរ៉េមួយនេះ សុំរក្សាសិទ្ធិមិនបញ្ចេញនៅឡើយ ព្រោះវាជាគោលការណ៍របស់កម្មវិធី។

តារាចម្រៀងអាជីពទាំង៧រូបបានត្រៀមខ្លួនរួចជាស្រេច ដើម្បីបង្ហាញសមត្ថភាពដល់ទស្សនិកជន ក៏ដូចជាអ្នកគាំទ្រទូទាំងប្រទេស ដើម្បីទាញយកប្រជាប្រិយភាព និងការបោះឆ្នោតដើម្បីបន្តដំណើរទៅវគ្គផ្ដាច់ព្រ័ត្រ។ កុំភ្លេចតាមដានទស្សនាកម្មវិធី I Am a Singer Cambodia នៅវេលាម៉ោង៨ថ្ងៃសៅរ៍សប្ដាហ៍នេះ នៅលើកញ្ចក់ទូរទស្សន៍ហង្សមាស HDTV ទាំងអស់គ្នា៕