ជា​លើក​ទី​១ហើយ​ដែល​ពាន​រង្វាន់​អ្នក​ទទួល​សិទ្ធិ​ផ្ដាច់​មុខ​ឆ្នើម​ប្រចាំ​ឆ្នាំ (Franchisee of the Year Award) ត្រូវ​បាន​បង្កើត​ឡើង​នៅ​ឆ្នាំ​២០១៦ ហើយ​ក្រុមហ៊ុន អ៊ី អេហ្វ ជី (អិចប្រេស ហ្វូដ គ្រុប) របស់​កម្ពុជា ដែល​បាន​ទទួល​សិទ្ធិ​ផ្តាច់​មុខ​ក្នុង​ការ​បើក​ភោជនីយដ្ឋាន ដឹ​ភីហ្សា​ខមផេនី (The Pizza Company) និង​ការ៉េម ស្វិនសិន (Swensen’s) នៅ​កម្ពុជា បាន​ឈ្នះ​ពាន​រង្វាន់​អន្តរជាតិ​ដំបូង​នេះ។

ពិធី​ប្រគល់​ពាន ធ្វើ​ឡើង​កាល​ពី​ថ្ងៃ​ទី​៣០ កញ្ញា ២០១៦ នៅ​ទីក្រុង​បាងកក ប្រទេស​ថៃ ខណៈ​ដែល​ក្រុមហ៊ុន​ប្រកួត​ប្រជែង​នៃ​ប្រទេស​ជាង​១០​ផ្សេង​ទៀត​នៅ​ពិភព​អារ៉ាប់ តំបន់​អាស៊ី​អាគ្នេយ៍​​ មិន​អាច​ប្រជែង​នឹង​ក្រុមហ៊ុន​កម្ពុជា​បាន។

ក្រុមហ៊ុន អ៊ី​ អេហ្វ ជី ដែល​ជា​អ្នក​ទទួល​សិទ្ធិ​ផ្តាច់​មុខ​ក្នុង​ការ​បើក​ភោជនីយដ្ឋាន ដឹ​ភីហ្សា​ខមផេនី (The Pizza Company) ហាង​ការ៉េម ស្វិនសិន (Swensen’s) និង​ម៉ាក​អាហារ​ល្បីៗ​មួយ​ចំនួន​ទៀត​នៅ​កម្ពុជា បាន​ក្លាយ​ជា​ម្ចាស់​ពាន​រង្វាន់​អ្នក​ទទួល​សិទ្ធិ​ផ្តាច់​មុខ​ឆ្នើម​ប្រចាំ​ឆ្នាំ​២០១៥ (Franchisee of the Year 2015 Award)។

ក្រុមហ៊ុន ម៉ាញនើហ្វូតគ្រូប (Minor Food Group) ដែល​ជា​ម្ចាស់​កម្មសិទ្ធិ​ម៉ាក ដឹ​ភីហ្សា​ខមផេនី ចំនួន​ជា​៣០៤​កន្លែង​លើ​ពិភព​លោក និង​ដែល​ជា​អ្នក​ផ្ដល់​សិទ្ធិ​ឱ្យ​ប្រើ​ម៉ាក និង​ពាណិជ្ជ​សញ្ញា​អាហារ​របស់​ខ្លួន បាន​បង្កើត​ពាន ហ្វ្រេនឆាយហ្ស៊ី (Franchisee Award) ជា​លើក​ដំបូង​ក្នុង​ឆ្នាំ​២០១៦។ មាន​តែ​ក្រុមហ៊ុនអ៊ី​ អេហ្វ ជី របស់​កម្ពុជា​ទេ ដែល​ទទួល​បាន​ពាន​រង្វាន់​អន្តរជាតិ​នេះ​មុន​គេ​បង្អស់​ក្នុង​ពិភព​លោក ដោយសារ​ភាព​ខ្លាំង​ជាច្រើន​ក្នុង​ប្រតិបត្តិ​ការ​អាជីវកម្ម​លើ​ហាង​ ដឹ​ភីហ្សា​ខមផេនី និង​ការ៉េម ស្វិនសិន។

ក្រុមហ៊ុន ម៉ាញនើហ្វូតគ្រូប បាន​ប្រគល់​ពាន​រង្វាន់​ដ៏​ថ្មី​សន្លាង​នេះ ឱ្យ​ក្រុមហ៊ុន អ៊ី អេហ្វ ជី របស់​កម្ពុជា កាល​ពី​ថ្ងៃ​ទី៣០ កញ្ញា ២០១៦ នៅ​ទីក្រុង​បាងកក ប្រទេស​ថៃ បន្ទាប់ពី​បាន​វាយ​តម្លៃ​យ៉ាង​ល្អិតល្អន់​លើ​ក្រុមហ៊ុន​ប្រកួត​ប្រជែង​មក​ពី​ជាង​១០​ប្រទេស​ផ្សេងៗ​គ្នា។ ក្រុមហ៊ុន​ទាំង​នោះ​មាន​មក​ពី​កម្ពុជា ឡាវ វៀតណាម​ មីយ៉ាន់ម៉ា អារ៉ាប៊ីសាអ៊ូឌីត អេមីរ៉េត​អារ៉ាប់​រួម បារ៉ែន អូម៉ង់ ជាដើម។

ការ​សម្រេច​ជ្រើស​រើស​យក​ក្រុមហ៊ុន អ៊ិច​ប្រេស​ហ្វូត​គ្រូប ឱ្យ​លើក​ពាន​រង្វាន់​អ្នក​ទទួល​សិទ្ធិ​ផ្ដាច់​មុខ​ឆ្នើម​ប្រចាំ​ឆ្នាំ​២០១៥ នា​ពេល​នេះ គឺ​ផ្អែក​លើ​លក្ខណៈ​វិនិច្ឆ័យ​ចំនួន​៤​ចម្បង​ៗ។ នេះ​បើ​យោង​តាម​លោក ទេព វិរៈ នាយក​គ្រប់គ្រង​ក្រុមហ៊ុន អ៊ី​ អេហ្វ ជី (​អិចប្រេស​ ហ្វូដ គ្រុប) ដែល​បាន​បញ្ជាក់​ថា ក្នុង​ចំណោម​គុណសម្បត្តិ​ទាំង​នោះ​ មាន​ដូចជា (១) ស្តង់ដារ​ប្រតិបត្តិ​ខ្ពស់​ជាង​គេ (ស្តង់ដារ​ផលិតផល សេវាកម្ម និង​អនាម័យ (២) កំណើន​ការ​លក់​រវាង​ហាង​និង​ហាង​បាន​ខ្ពស់​ជាង​គេ (៣) ទទួល​បាន​ប្រាក់​ចំណូល​ច្រើន​ជាង​គេ និង (៤) ការ​ពង្រីក​សាខា​ភោជនីយដ្ឋាន​បាន​ឈាន​មុខ​គេ។

លោក ទេព វិរៈ បាន​ដឹកនាំ​ក្រុមហ៊ុន​នេះ​អស់​រយៈ​ពេល​ជាង​១០​ឆ្នាំ​មក​ហើយ គឺ​ចាប់​តាំង​ពី​ការ​បង្កើត​ភោជនីយដ្ឋាន ដឹ​ភីហ្សា​ខមផេនី ដំបូង​នៅ​កម្ពុជា​ក្នុង​ឆ្នាំ​២០០៥។ លោក​ថ្លែង​ថា៖ "ខ្ញុំ​ពិតជា​មាន​សេចក្ដី​សោមនស្ស​ណាស់​ដែល​បាន​ទទួល​ពាន​រង្វាន់​អ្នក​ទទួល​សិទ្ធិ​ផ្ដាច់​មុខ​ឆ្នើម​ពី​ក្រុមហ៊ុន ម៉ាញនើហ្វូតគ្រូប មុន​គេ​ដូច្នេះ។ នេះ​ជា​មោទនភាព​របស់​ក្រុមហ៊ុន អ៊ី​ អេហ្វ ជី របស់​កម្ពុជា។ ខ្ញុំ​សូម​ថ្លែង​អំណរគុណ​យ៉ាង​ជ្រាលជ្រៅ​ចំពោះ​អ្នក​គ្រប់គ្រង និង​បុគ្គលិក​ទាំង​អស់​របស់​ក្រុមហ៊ុន​ដែល​បាន​ខិតខំ​ប្រឹង​ប្រែង​បំពេញ​ការងារ​ប្រកប​ដោយ​ការ​ទទួល​ខុស​ត្រូវ​ខ្ពស់​លើ​គ្រប់​ផ្នែក និង​ដែល​បាន​បំពេញ​ចិត្ត​អតិថិជន​បាន​យ៉ាង​ល្អ​ឥត​ខ្ចោះ​ក្នុង​ពេល​កន្លង​ទៅ។ យើង​ទាំង​អស់​គ្នា​នៅ​តែ​បន្ត​បេសកកម្ម​ធ្វើ​ឲ្យ​អតិថិជន​សប្បាយ​ចិត្ត​ We Smile, We Make Our Customer Happy"។

ក្រុមហ៊ុន អ៊ី​ អេហ្វ ជី (អិចប្រេស ហ្វូដ គ្រុប) បាន​ចុះ​បញ្ជី​ពាណិជ្ជកម្ម​នៅ​កម្ពុជា​កាល​ពី​ឆ្នាំ​២០០៤ ហើយ​មាន​៤២​កន្លែង​ហើយ​មក​ដល់​ពេល​បច្ចុប្បន្ន​នេះ។ ក្រុមហ៊ុន​នេះ​ជា​បុត្រ​សម្ព័ន្ធ​របស់​ក្រុមហ៊ុន អ​ អិម អេគ្រូប (RMA Group) នៅ​ប្រទេស​ថៃ។ ក្នុង​រយៈ​ពេល​១០​ឆ្នាំ​នៃ​ដំណើរ​ការ​របស់​ខ្លួន ក្រុមហ៊ុន អ៊ី​ អេហ្វ ជី (​អិចប្រេស​ ហ្វូដ គ្រុប) ដែល​ទទួល​បាន​សិទ្ធិ​ផ្តាច់​មុខ​លើ​ម៉ាក​អាហារ​ល្បីៗ​មួយ​ចំនួន​ទៀត ដូចជា ប៊ីប៊ីឃ្យូ ឈីកខិន (BBQ Chicken) កូស្តា​កាហ្វេ (Costa Coffee) ដេរី ឃ្វីន (Dairy Queen) និង គ្រីស្ពីគ្រីម (Krispy Kreme) បាន​បើក​ភោជនីយដ្ឋាន ដឹ​ភីហ្សា​ខមផេនី ចំនួន​២១​កន្លែង​ហើយ ទាំង​នៅ​រាជធានី​ភ្នំពេញ ទាំង​នៅ​ខេត្ត​បាត់ដំបង សៀមរាប ព្រះសីហនុ និង​កណ្ដាល៕

អត្ថបទ៖ ពាណិជ្ជកម្ម