ក្លឹបអគ្គិសនីកម្ពុជាចុះកុងត្រាកីឡាករថ្មី៤រូបដោយមិនអស់លុយមួយរៀល

2016-10-12 21:53:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបបាល់ទាត់អគ្គិសនីកម្ពុជាបានចុះកុងត្រាយកកីឡាករចំណូលថ្មី៤រូបដោយមិនមានតម្លៃខ្លួនដើម្បីជួយពង្រឹងក្លឹបក្នុងការប្រកួតពានរង្វាន់បាល់ទាត់លីគកម្ពុជាលំដាប់ទី២ឆ្នាំ២០១៦។

កីឡាករ សុក ចាន់រស្មី

លោក ប្រាក់ វុទ្ធី គ្រូបង្វឹកក្រុមបាល់ទាត់អគ្គិសនីកម្ពុជាបានឲ្យដឹងថា សម្រាប់ការចុះកុងត្រានាំយកកីឡាករថ្មីទាំង៤រូបនេះមិនមានតម្លៃខ្លួននោះទេ។ ដោយកីឡាករទាំងនេះស្ម័គ្រចិត្តដោយខ្លួនឯងផ្ទាល់ ប៉ុន្តែសម្រាប់ប្រាក់ខែវិញ ក្លឹបបានចរចាគ្នាជាមួយកីឡាករទាំង៤នាក់ដែលផ្អែកតាមបទពិសោធន៍ និងសមត្ថភាពរបស់ពួកគេ។

កីឡាករ ផានី អ៊ីរដ្ឋា

កីឡាករចំណូលថ្មីទាំង៤នាក់នោះសុទ្ធតែជាកីឡាករដែលមានបទពិសោធន៍ច្រើន និងធ្លាប់ជាប់ជម្រើសជាតិ ព្រមទាំងលេងនៅលីគកំពូលកម្ពុជាថែមទៀតផងគឺ សុក ចាន់រស្មី មកពីក្លឹបក្រសួងការពារជាតិ ផានី អ៊ីរដ្ឋា, សួន វាសនា និង មួន ណារ៉ា មកពីក្លឹបពីព្រះខ័នរាជស្វាយរៀង។ លោក ប្រាក់ វុទ្ធី បន្ថែមទៀតថា សម្រាប់ការនាំយកកីឡាករថ្មីៗនេះនៅមិនទាន់គ្រប់គោលការណ៍របស់ក្លឹបនោះទេ។ លោកសង្ឃឹមថា កីឡាករថ្មីៗទាំងនេះនឹងជួយក្រុមឲ្យមានលទ្ធផលល្អ និងជាប់ទៅលេងលីគកំពូលនៅរដូវការក្រោយ៕