ផលិតករ អះអាងពីភាពជោគជ័យកម្មវិធីល្បី លំដាប់ថ្នាក់ពិភពលោក

2016-10-15 15:11:09
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក គង់ រចនា ផលិតករកម្មវិធី I Am a Singer Cambodia បានថ្លែងមកកាន់ Sabay ពីភាពជោគជ័យរបស់កម្មវិធីដែលបានទិញសិទ្ធិមកពីបរទេសផលិតឡើងវិញ ហើយនៅម៉ោង៨យប់នេះកម្មវិធីដែលលោកជាផលិតករ ឈានមកដល់វគ្គលើកពានហើយ។

(លោក គង់ រចនា ផលិតករកម្មវិធី I Am a Singer Cambodia )

ផលិតករខាងលើបានលើកឡើងថា លោកបានចូលរួមជាមួយក្រុមការងារផ្សេងទៀត នៅក្នុងការរៀបចំកម្មវិធីល្បីៗរបស់ស្ថានីយទូរទស្សន៍ហង្សមាស ហើយថ្មីៗនេះ លោកបានធ្វើជាផលិតករក្នុងកម្មវិធីការប្រឡងប្រជែងតារាចម្រៀងអាជីពមានប្រភពមកពីប្រទេសកូរ៉េ I Am a Singer ដោយលោកជាផលិតករផ្នែក Script និង ពិធីករ។

"ភាពជោគជ័យចម្បងនោះ គឺយើងអាចធ្វើការងារជាក្រុមហើយក្រុមការងារទាំងអស់សហការគ្នា និងយកចិត្តទុកដាក់មានទំនួលខុសត្រូវរៀងៗខ្លួន"។

លោកបន្តទៀតថា មិនមែនជារឿងងាយនោះទេទម្រាំតែកម្មវិធីមួយអាចដំណើរការបានរលូនក្រុមការងារទាំងអស់ត្រូវយកចិត្តទុក្ខដាក់ និងពិនិត្យឲ្យបានគ្រប់ជ្រុងជ្រោយ ជាពិសេសពេលទទួលរងការរិះគន់។ "ធម្មតាយើងធ្វើអីតែងតែមានការរិះគន់ និងសរសើរអញ្ចឹងហើយ ពេលជួបការរិះគន់ម្ដង ក្រុមការងារតែងតែប្រជុំរកដំណោះស្រាយអ្វីមួយដើម្បីឲ្យអ្នកទស្សនា គាត់យល់ច្បាស់ពីកម្មវិធី ហើយយើងតែងតែធ្វើវាពីមួយដំណាក់ទៅមួយដំណាក់ដើម្បីឲ្យពួកគាត់ស្រួលយល់" លោកបន្ថែម។

លោកនៅតែសង្កត់ធ្ងន់ថា ការងារជាក្រុម គឺជារឿងមួយយ៉ាងសំខាន់ដើម្បីសម្រេចអ្វីមួយ ហើយកម្មវិធី I Am a Singer Cambodia ដែលលោកជាផលិតករ Script និង ពិធីករ នៅវេលាម៉ោង ៨យប់នេះ នឹងឈានមកដល់វគ្គលើកពានហើយដែលមានវត្តមានតារាចម្រៀងអាជីព ៧រូប យក់ ដួងតារា ឈិត សុវណ្ណបញ្ញា ដួង វីរៈសិទ្ធ សួស វីហ្សា វី ឌីណែត នៅ ស៊ីនឿន និង ផន ស្រីខួច បានត្រៀមខ្លួនជាស្រេចក្នុងការប្រកួតប្រជែង៕