បារមីអ្នកតាឃ្លាំងមឿង ធ្លាប់សណ្ឋិតទះកំផ្លៀងអ្នកនិយាយផ្ដេសផ្ដាស

2016-10-20 21:57:22
ចំនួនមតិ 0 | ចំនួនចែករំលែក 0

ចន្លោះមិនឃើញ

មួយរយៈចុងក្រោយនេះមានមនុស្សជាច្រើនមកពីគ្រប់ទិសទីតាំងខ្លួនជាលោកតាឃ្លាំងមឿងសណ្ឋិតចូលខ្លួន និង អង្គបារមីផ្សេងៗ ហើយនិយាយផ្ដេសផ្ដាសថា អ្នកតាមឿងជាប់សីមាគេហើយ ក៏ស្រាប់តែលោកតាឃ្លាំងមឿងពិតសណ្ឋិតអ្នកផ្សេង ហើយបានដើរទះកំផ្លៀងអ្នកតាំងខ្លួនថាជាតួអង្គសណ្ឋិត។

លោក ម៉ៅ សោភណ្ឌ អតីតប្រធានមន្ទីរវប្បធម៌ និង វិចិត្រសិល្បៈ ខេត្តពោធិ៍សាត់ និងជាអ្នកទទួលបន្ទុកថែរក្សាបូជនីយដ្ឋានអ្នកតាឃ្លាំងមឿងបានប្រាប់ក្រុមការងារ "ផ្លូវទៅស្រុក" ថា មួយរយៈនេះមានអ្នកតាំងខ្លួនជាអង្គបារមី និង តាំងខ្លួនថាជាតាមឿង តែនិយាយមិនដឹងរឿង ហើយខុសការពិតនៃប្រវត្តិលោកតាឃ្លាំងមឿងដែលគេចាត់ទុកថាជាវីរបុរសស្នេហាជាតិហ៊ានបូជាជីវិតលោតចូលរណ្ដៅសម្លាប់ខ្លួនដើម្បីកេណ្ឌទ័ពខ្មោចវាយបកសត្រូវ។

ក្នុងចំណោមអ្នកតាំងខ្លួនជាអង្គបារមី ប៉ុន្មានថ្ងៃមុននេះ មានអង្គបារមីមួយតាំងខ្លួនថាជាឥសីព្រះអគ្គីនេត្រ មកពីខេត្តរតនគីរី ហើយបាននិយាយខ្លាំងៗថា អ្នកតាមឿងជាប់សីមាគេហើយ។ ប្រកូកប្រកាសឲ្យគ្រប់គ្នាជួយតាមឿង តែមួយសន្ទុះក៏ឃើញមានអ្នកផ្សេងចូលសណ្ឋិតក៏ដើរមកតាំងៗហើយស្រែកសួរទៅ អ្នកតាំងខ្លួនជាឥសីព្រះអគ្គីនេត្រ ដោយបានចោតសួរត្រឡប់ទៅវិញថា "ស្អី! អញ្ញជាប់សីមា អាណា?។ ក្រោយមកទៀតអ្នកទទួលចូលសណ្ឋិតក្នុងរូប ក៏បានទះមួយកំផ្លៀង និង ចង្អុល និងទះកំផ្លៀងអ្នកផ្សេងដែលហែហមតាម ឥសីព្រះអគ្គីនេត្រ។ នេះជាការលើកឡើង របស់អតីតប្រធានមន្ទីរវប្បធម៌ លោក ម៉ៅ សោភណ្ឌ។

អ្នកថែរក្សាបូជនីយដ្ឋានអ្នកតាឃ្លាំងមឿង និង ជាអ្នកស្រាវជ្រាវរកឃើញទីតាំងលោកតា ឃ្លាំងមឿងក្រោយឆ្នាំ ១៩៧៩ ទីលោកតា ឃ្លាំង មឿង លោតសម្លាប់ខ្លួនកេណ្ឌទ័ពខ្មោចនេះ ក៏បានច្រានចោលពាក្យចចាមអារ៉ាមមួយចំនួនដែរថា បារមីអ្នកតាឃ្លាំងមឿងបានចេញពីបូជនីយដ្ឋានទៅនៅឯភ្នំក្រវាញ នោះគឺជារឿងមិនពិត។ ព្រោះថា បូជនីយដ្ឋានសព្វថ្ងៃនេះ នៅតែមានមនុស្សជាច្រើនបានមកបន់ស្រន់ហើយចេះតែសមប្រកបមកដល់ពេលបច្ចុប្បន្ន ទើបមានអ្នកចូលបច្ច័យជួយកសាងទីបូជនីយដ្ឋាននេះកាន់តែច្រើនឡើងៗ។ លោក ម៉ៅ សោភណ្ឌ មានប្រសាសន៍៕

ចង់ដឹងកាន់តែច្បាស់អំពីបញ្ហានេះ សូមចុចទស្សនាវីដេអូខាងក្រោមនេះ៖