អ្នកពោធិ៍សាត់ នរណាមិនស្គាល់ចំការតាសុង មានក្រូចផ្អែមឆ្ងាញ់អស់ទាស់

2016-10-21 17:20:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថិតិក្នុងភូមិអូរព្រាល ឃុំសំរោង ស្រុកភ្នំក្រវាញ ខេត្តពោធិ៍សាត់ មានចំការមួយប្រហែលជា២០ហិតា ដាំសុទ្ធតែក្រូចពោធិ៍សាត់សុទ្ធ ដែលអ្នកស្រុកក្នុងតំបន់នេះសុទ្ធតែស្គាល់គ្រប់គ្នាថាជាចំការរបស់លោកតា សុង។

ចំការមួយនេះដែរ មានឈ្មោះល្បីខ្លាំងណាស់ ព្រោះក្រូចដែលនាំចេញពីចំការនេះ សុទ្ធតែប្រភេទលេខ១ ទាំងអស់ ពោលគឺនាំចេញទៅលក់នៅបាត់ដំបង និងរាជធានីភ្នំពេញជាដើម។ ដោយ១រដូវទៅ១រដូវ មានគេមកម៉ៅយកទាំងចំការតែម្ដង មិនចាំបាច់ទៅហត់បេះលក់ដោយខ្លួនឯងនោះទេ។

អ្នកស្រី សុង លីនីន កូនស្រីរបស់លោកតា សុង បានរៀបរាប់ថាក្នុងចំការនេះ សុទ្ធតែដាំក្រូចពូជល្អៗទាំងអស់ ដែលមានឈ្មួញមកកក់ទុក តាំងពីក្រូចចេញក្តិបមកម្ល៉េះ។ អ្វីដែលកាន់តែពិសេសទៀតនោះ ឈ្មួញដែលទិញក្រូចយកទៅលក់នោះ តែងតែនិយាយថា ក្រូចចំការនេះលក់បានថ្លៃល្អ ហើយមានទីផ្សារណាស់។ ដោយសារតែក្រូចលក់មិនចង់ទាន់នេះហើយ អ្នកស្រី លីនីន បានបញ្ជាក់ថាក្នុង១រដូវ ចំការអ្នកស្រីអាចចំណេញប្រាក់បានពី៣ម៉ឺនទៅ៤ម៉ឺនដុល្លារ ក្រោយពីកាត់កងទៅលើការចំណាយផ្សេងៗអស់ទៅ។

ចំពោះការចំណេញប្រាក់បានគួរសមនេះ អ្នកមើលចំការខាងលើបានបន្ដថាមកពីក្រួចនៅចំការនេះ ទទួលបានផលច្រើនមែនទែន ដោយគ្រាន់តែ១ដើម អាចមានផ្លែចាប់ពី៤០០ទៅ៨០០ផ្លែឯណោះ។ ចំណែកឯការមើលថែវិញ ហាក់មិនសូវជាត្រូវការការចំណាយច្រើនទេ ពោលគឺជីយកជីធម្មជាតិមកប្រើច្រើន ហើយកម្មករវិញ ចំការ២០ហិតានេះ ប្រើគ្នាតែជាង១០នាក់ប៉ុណ្ណោះ៕