កុមារ និងយុវជនឃុំកំពង់កុង សាមគ្គីគ្នាសាងសង់ទីលានបាល់ទាត់ថ្មី

2016-10-23 16:59:16
ចំនួនមតិ 0 | ចំនួនចែករំលែក 0

ចន្លោះមិនឃើញ

វិស័យកីឡាបាល់ទាត់កម្ពុជាបច្ចុប្បន្នកំពុងរីកចម្រើនគួរឲ្យកត់សំគាល់ទាំងទម្រង់លេងរបស់កីឡាករ ទាំងសន្ទុះអ្នកគាំទ្រដ៏ច្រើនសន្ធឹកសន្ធាប់នៅពេលប្រកួតកម្រិតអន្តរជាតិរបស់កម្ពុជាម្ដងៗ។ក្រឡេកទៅមើលតាមនិគមជនបទស្រុកស្រែវិញ កីឡាបាល់ទាត់មានប្រជាប្រិយភាពខ្លាំងសម្រាប់យុវជនយុវជននិងកុមារតូចៗ។

នៅក្នុងឃុំកំពង់កុង ស្រុកកោះធំ ខេត្តកណ្ដាលឯណោះវិញ យុវជនស្រឡាញ់បាល់ទាត់មួយក្រុមបាននាំគ្នាសុំទីធ្លាដីទំនេរមួយកន្លែង ដែលជាកម្មសិទ្ធិរបស់វត្តជ្រុងរមាស ដើម្បីសាងសង់ជាទីលានបាល់ទាត់ ព្រោះខ្សត់ទីធ្លាសម្រាប់លេងបាល់ពេក។

ដោយសារមានការយល់ស្របពីសំណាក់គណៈកម្មការវត្តនិងព្រះគ្រូចៅអធិការ ក៏សម្រេចចេញលិខិតអនុញ្ញាតឲ្យសាងសង់នៅលើដីនោះដល់ពួកគេ ថែមទាំងមានការដឹងលឺពីឃុំសង្កាត់ផងដែរ។មិនត្រឹមតែប៉ុណ្ណោះទេ ព្រះគ្រូចៅអធិការវត្តថែមទាំងជួយចេញបច្ច័យរបស់ព្រះអង្គផ្ទាល់ជួលត្រាក់ទ័រមកឈូសឆាយដីនៅខាងមុខវត្តនោះឲ្យទៀត។

តំណាងឲ្យក្រុមយុវជន ហេង ឡុង ជាសិស្សថ្នាក់ទី៩ នៃវិទ្យាល័យហ៊ុនសែនកំពង់កុង បានប្រាប់ថាពួកគេសប្បាយចិត្តនៅពេលវត្តអនុញ្ញាតឲ្យសាងសង់ទីលានបាល់ទាត់នេះ។ ពិសេសទៀតនោះគឺព្រះចៅអធិការជួយបច្ច័យឈូសឆាយទីលានឲ្យរាបស្មើ។ នៅពេលឈូសឆាយទីលាននោះរួចរាល់ហើយ រយៈពេលមួយខែក្រោយទើបពួកគេរកជំនួយជាលុយបានគ្រប់ចំនួនដើម្បីទិញដែកមកធ្វើជាបង្គោលទីសងខាង។

ហេង ឡុង បានប្រាប់ទៀតថាពួកគេបានសរសេរលិខិតដើម្បីសុំជំនួយជាទឹកប្រាក់សម្រាប់ទិញដែកបង្គោលទីចំនួន ៥ច្បាប់ ជួនទៅសាលារៀននិងធនាគារដែលនៅក្នុងឃុំ។ ជាលទ្ធផលរយៈពេលមួយខែទើបពួកគេទទួលបានការឆ្លើយតបជាទឹកប្រាក់ត្រលប់មកវិញ ពីសាលារៀនចំនួន ៣ ក្នុងនោះមានសាលាឯកជនមួយ។ ទោះយ៉ាងណា លុយដែលជួយពីសាលារៀនទាំងនោះមិនទាន់គ្រប់ចំនួននៅឡើយទេ ទាល់តែពួកគេរៃលុយគ្នាបន្ថែម តាំងពីថ្នាក់ទី៧ ទី៨ ដល់ទី៩ ទាំងសិស្សប្រុស សិស្សស្រីដែលចូលចិត្តបាល់ទាត់ ទើបគ្រប់ចំនួនដើម្បីយកមកធ្វើបង្គោលទីដែកនោះ។

ការចំណាយទឹកប្រាក់សាងសង់ទីលានបាល់នេះ ហេង ឡុង បានបញ្ជាក់ថាឈូសឆាយដី អស់ទឹកប្រាក់ចំនួន ២៨ម៉ឺនរៀល ឯបង្គោលទីអស់ទឹកប្រាក់ចំនួន ៣៦ម៉ឺនរៀល ។ នៅពេលឃើញពួកគេដាំបង្គោលទីរួចហើយ ទើបធនាគារអេស៊ីលីដាបានផ្ដល់ទឹកប្រាក់ ៤០ដុល្លាបន្ថែមទៀត។ បន្ទាប់មកពួកគេយកលុយនោះទិញថ្នាំលាបបង្គោលទី ទិញធុងសំរាម និងចាក់ដីបំពេញកន្លែងដែលហូរដាច់ដោយសារទឹកភ្លៀង។

ថ្វីត្បិតតែទីលានបាល់ទាត់នោះមានបណ្ដោយ ៦០ម៉ែត្រ និងទទឹង ៣០ ម៉ែត្រ រាងតូចបន្តិចមិនត្រូវតាមទំហំស្តង់ដារក៏ដោយ ក៏យុវជនទាំងនោះរីករាយនឹងសមិទ្ធិផលដែលទទួលបាន កើតចេញពីកម្លាំងសាមគ្គីគ្នារបស់សិស្សានុសិស្សទាំងអស់នៅក្នុងឃុំរបស់ពួកគេ។ ហេង ឡុង សង្ឃឹមថា ទីលានបាល់ទាត់មួយនេះនឹងអាចទាក់ទាញយុវជន ព្រមទាំងកុមារជាច្រើនឲ្យលេងកីឡាបាល់ទាត់ ដើម្បីជៀសវាងការសេពគ្រឿងញៀន និងអំពើអបាយមុខផ្សេងៗ៕