បើ​ទោះ​ជា​មាន​ការ​ជឿ​ថា​ស្នេហា​គឺ​ជា​រឿង​រវាង​មនុស្ស​ពីរ​នាក់ ប៉ុន្តែ​វា​មិន​ដូច្នោះ​រហូត​ឡើយ ព្រោះ​ជួន​កាល​ស្នេហា​ក៏​ត្រូវ​មាន​ក៏​ត្រូវ​មាន​ចំណែក​ចូលរួម​ពី​គ្រួសារ ហើយ​បើ​គ្រួសារ​ខាង​ណា​មួយ​មិន​ព្រម​ទទួល​ស្គាល់​ហើយ វា​នឹង​ក្លាយ​ជា​រឿង​ផ្សេង។

ក្នុង​រង្វង់​សិល្បៈ គូ​ស្នេហ៍​តារា​ជា​ច្រើន​គូ​ក៏​ជួប​ប្រទះ​បញ្ហា​នេះ​ដូច​គ្នា​ បើ​ទោះ​ជា​ជីវិត​ពួក​គេ​មើល​ទៅ​​ស៊ីវិល័យ​និង​បើក​ចំហ​ជាង​សាមញ្ញជន​ទូទៅ​ក្ដី។ ថ្ងៃ​នេះ​យើង​មក​មើល​គូ​ស្នេហ៍​តារា​ថៃ​៦​គូ​ដែល​ក្រុម​គ្រួសារ​របស់​ពួក​គេ​មិន​ពេញ​ចិត្ត ប៉ុន្តែ​ពួក​គេ​នៅ​តែ​តស៊ូ​ជាមួយ​គ្នា​ ហើយ​គូ​ខ្លះ​បាន​ទទួល​ជោគជ័យ​យ៉ាង​ពេញ​ចិត្ត៖

១. Kwan Usamanee និង Golf Pichaya

Golf និង Kwan គឺ​ជា​គូ​ស្នេហ៍​ល្បី​ជាង​គេ​សម្រាប់​បញ្ហា​គ្រួសារ​មិន​ទទួល​ស្គាល់ រហូត​ដល់​ថ្នាក់​ត្រូវ​បែក​គ្នា​កាល​ពី​១០​ឆ្នាំ​មុន ដោយ​សារ​ម្ដាយ​ខាង​ស្រី​មិន​ពេញ​ចិត្ត​ខាង​ប្រុស ប៉ុន្តែ​ក៏​ត្រលប់​មក​ក្លាយ​ជា​គូ​ស្នេហ៍​ម្ដង​ទៀត​នៅ​ពេល​នេះ​តែ​ក៏​នៅ​ជួប​បញ្ហា​ស្មុគស្មាញ​បន្ត​ទៀត​ព្រោះ​​ម្ដាយ​និង​បង​ស្រី​របស់ Kwan នៅ​តែ​មិន​ពេញ​ចិត្ត Golf ដដែល។

២. Noey Neko Jump និង Rith Kachai

សម្រាប់​មួយ​គូ​នេះ គ្រួសារ​ខាង​ប្រុស​ហាក់​មិន​ពេញ​ចិត្ត Noey ឡើយ ព្រោះ​ក្រោយ​ក្លាយ​ជា​សង្សារ​នឹង​គ្នា​មិន​បាន​ប៉ុន្មាន ក៏​នាំ​គ្នា​សុំ​ឪពុក​ម្ដាយ​រៀបការ ប៉ុន្តែ​ត្រូវ​ឪពុក​ម្ដាយ​ខាង​ប្រុស​បដិសេធ។ យ៉ាង​ណា​ Rith ​ក៏​នៅ​តស៊ូ​ដល់​ទី​បំផុត និង​បាន​កុហក​គ្រួសារ​របស់​ខ្លួន​ថា​ Noey កំពុង​មាន​ផ្ទៃ​ពោះ តែ​ក៏​នៅ​មិន​បាន​សម្រេច ថែម​ទាំង​ត្រូវ​គ្រួសារ​គំរាម​ថា​បើ​នៅ​តែ​ទាក់ទង​គ្នា​ទៀត នឹង​ត្រូវ​កាត់​ឈ្មោះ​ចេញ​ពី​បញ្ជី​មរតក។

៣. Porche Saran និង Grace Chalita

តារា​សម្ដែង​ប្រុស Porche និង​មិត្ត​ស្រី​បាន​ចាប់​ផ្ដើម​ស្រឡាញ់​គ្នា​ដោយ​លួច​លាក់ តែ​ក្រោយ​មក​បង​ស្រី​របស់ Grace បាន​ចេញ​មុខ​គំរាម​ប្អូន​ស្រី​របស់​ខ្លួន​ថា​បើ​នៅ​តែ​ទាក់ទង​តារា​ប្រុស​នេះ​ទៀត ខ្លួន​នឹង​កាត់កាល់​ចោល​ភ្លាម។

៤. Dome Pakorn Lum និង Metal Sukkhao

នៅ​ពេល​ចេញ​មុខ​ប្រកាស​ពី​ទំនាក់ទំនង​ស្នេហា​ជាមួយ​គ្នា​ដំបូង Dome Pakorn មិន​ត្រូវ​បាន​ម្ដាយ​ខាង​មិត្ត​ស្រី​របស់​ខ្លួន​ទទួល​ស្គាល់​ឡើយ ដោយ​ហេតុ​ថា​តារា​ចម្រៀង​និង​សម្ដែង​រូប​នេះ​ធ្លាប់​មាន​រឿង​អាស្រូវ​ស្នេហា​ច្រើន​កន្លង​មក។ ទោះ​យ៉ាង​ណា​ពេល​នេះ Dome បាន​ទទួល​ភ្លើង​ខៀវ​ពី​គ្រួសារ​របស់​មិត្ត​ស្រី​ហើយ ក្រោយ​​ការ​ដក​ពិសោធន៍​ទឹក​ចិត្ត​ឲ្យ​ពួក​គាត់​ឃើញ។

៥. Nat Natasha និង Jeng Bigass

បើ​ទោះ​ជា​​ឪពុក​របស់​តារា​សម្ដែង​ស្រី Nat ហាក់​មិន​ពេញ​ចិត្ត Jeng ជា​មិត្ត​ប្រុស​របស់​នាង​ប៉ុន្មាន តែ​ពេល​នេះ​កំឡោះ Jeng ក៏​មិន​រា​ថយ​ឡើយ ដោយ​នៅ​តែ​បន្ត​ស្វែង​រក​ពិន្ទុ​សម្រាប់​ខ្លួន​និង​សង្ឃឹម​ថា​អាច​យក​ឈ្នះ​ចិត្ត​អនាគត​ឪពុក​ក្មេក​បាន​ពេញ​ទំហឹង។

៦. Kob Suvanant និង Brook Danuporn

គូ​ស្នេហ៍​មួយ​គូ​នេះ​ក៏​បាន​ឆ្លង​កាត់​ឧបសគ្គ​ជា​ច្រើន​ដែរ ដោយ​សារ​ម្ដាយ​របស់ Brook មិន​ពេញ​ចិត្ត​តារា​សម្ដែង Kob Suvanant ឡើយ​ព្រោះ​នាង​ជា​អ្នក​សិល្បៈ ហើយ​ថែម​ទាំង​មាន​ចរិត​ក្រអឺតក្រទម​មិន​គោរព​ចាស់​ទុំ​ទៀត ក៏​ប៉ុន្តែ​ក្រោយ Kob ក្រាប​​សូមទោស​សម្រាប់​រឿង​ដែល​ខ្លួន​ខុស​ឆ្គង​ទាំង​ប៉ុន្មាន ស្នេហា​របស់​ពួក​គេ​ក៏​អាច​ដំណើរ​ទៅ​មុខ​ទៀត​យ៉ាង​រលូន រហូត​ដល់​ចូល​រោង​ការ​ជាមួយ​គ្នា ៕

ចុចអាន៖ក្រឡេក​មើល​ផ្ទះ​ធំ​ស្កឹមស្កៃ​ដែល Kwan ទិញ​ឲ្យ​ម្ដាយ​ក្នុង​តម្លៃ​៣០លាន​បាត

ចុចអាន៖តារា​សម្ដែង​ល្បីថៃ​១០​រូប ​ដែល​មិន​ត្រឹម​តែ​ស្រស់​ស្អាត​តែ​អាច​ច្រៀង​​បាន​យ៉ាង​​ពីរោះ

ប្រែ​សម្រួល៖ វ៉ាន់ថន ប្រភព៖kaijeaw