អាងកំពីងពួយទីលំហែកាយស្រូបខ្យល់បរិសុទ្ធ និងសំបូរម្ហូបធម្មជាតិ

2016-10-26 19:15:12
ចំនួនមតិ 0 | ចំនួនចែករំលែក 0

ចន្លោះមិនឃើញ

អាងកំពីងពួយជារមណីយដ្ឋានដ៏ស្រស់បំព្រងមានទីតាំងស្ថិតនៅចន្លោះភ្នំពីរ គឺភ្នំគល់ និង ភ្នំតាង៉ែន ក្នុងឃុំតាគ្រាម ស្រុកបាណន់ ខេត្តបាត់ដំបង មានចម្ងាយប្រមាណជា ៣៥ គីឡូម៉ែត្រ។ រមណីយដ្ឋាននេះបានទាក់ទាញភ្ញៀវទេសចរជាតិ និង អន្តរជាតិ ទៅសម្រាកលំហែកាយស្រូបខ្យល់អាកាសបរិសុទ្ធ ជិះទូក ទស្សនាភ្នំ និង ហែលទឹក។ ទន្ទឹមគ្នានេះ បឹងកំពីងពួយក៏សម្បូរម្ហូបឆ្ងាញ់និងធម្មជាតិ។

លោក ណារ៉ា អ្នកលក់ម្ហូបអាហារ នៅបឹងកំពីងពួយ បានរៀបរាប់ប្រាប់ក្រុមការងារ "ផ្លូវទៅស្រុក" ថា បឹងកំពីងពួយរមែងមានមនុស្សម្នាមកពីគ្រប់ទិសទីមកលេងតំបន់នេះច្រើន ហើយជាពិសេសនៅ ក្នុងរដូវវស្សាគឺមានទឹកច្រើន និង មានខ្យល់អាកាសត្រជាក់អាចធ្វើឲ្យភ្ញៀវមកលេងរសាត់អស់ទុក្ខកង្វល់តាមរយៈការលេងទឹក ជិះទូក និង ទស្សនាទេសភាពភ្នំ ជាដើម។

ក្រៅពីលំហែលំហើយអារម្មណ៍នឹងសម្រស់ធម្មជាតិអាងស្ដុកទឹកកំពីងពួយ ក៏អាចភ្លក់រសជាតិម្ហូបអាហារបែបស្រែ និង មិនមានជាតិគីមី ពីស្នាដៃចុងភៅអ្នកភូមិ។ នៅទីនេះម្ហូបដែលទាក់ទាញភ្ញៀវទេសចរបំផុតគឺមាន់ដុត និង ត្រីដុត ដែលមានតម្លៃសមរម្យ។ ណារ៉ា និយាយ។

ចង់ដឹងការរៀបរាប់ច្រើនទៀតពី ណារ៉ា សូមចុចទស្សនាវីដេអូខាងក្រោមនេះ៖

គួរបញ្ជាក់ថា ទំនប់អាងកំពីងពួយមានបណ្ដោយ ៧ ៥០០ ម៉ែត្រ និង ទទឹង ១ ៩០០ ម៉ែត្រ អាចផ្ទុកទឹកបានចំនួន ១១០លានម៉ែត្រគូប នៅក្នុងរដូវវស្សាដែលជាប្រភពទឹកដ៏សំខាន់សម្រាប់ស្រោចស្រពនៅក្នុងវិស័យកសិកម្ម។

ដើមឡើយអាងកំពីងពួយ គឺជាទីកន្លែងដែលមានមនុស្សស្លាប់ជាច្រើននៅក្នុងសម័យខ្មែរក្រហមចន្លោះ ១៩៧៦ ដល់ ឆ្នាំ ១៩៧៧ ដោយសារតែខ្មែរក្រហមបានបង្ខំឲ្យមនុស្សកសាងអាងកំពីងពួយនេះ ប៉ុន្តែ ឥឡូវវាប្រែក្លាយទៅជារមណីយដ្ឋានដ៏ទាក់ទាញ ហើយភ្ញៀវទេសចរបានទៅលេងច្រើនគឺនៅថ្ងៃសៅរ៍ អាទិត្យ និង ថ្ងៃបុណ្យទានធំៗ៕