ផ្ទុះការតវ៉ាខ្លាំង តាមដងផ្លូវជាច្រើន ក្រោយ ដូណាល់ ត្រាំ ឈ្នះឆ្នោត
- 2016-11-10 02:05:45
- ចំនួនមតិ 0 | ចំនួនចែករំលែក 0
ផ្ទុះការតវ៉ាខ្លាំង តាមដងផ្លូវជាច្រើន ក្រោយ ដូណាល់ ត្រាំ ឈ្នះឆ្នោត
ចន្លោះមិនឃើញ
សិស្សនិស្សិតជាច្រើនបានបិទផ្លូវហាយវ៉េ នៅក្នុងទីក្រុង Austin រដ្ឋ Texas និងបានដុតបំផ្លាញទង់ជាតិ នៅលើមហាវិទ្យាល័យ American University នៅក្នុងរដ្ឋ Washington ហើយសិស្សបានដើរចេញពីថ្នាក់រៀននៃវិទ្យាល័យ និង សកលវិទ្យាល័យ នៅទូទាំងប្រទេស បន្ទាប់ពីបេក្ខភាពប្រធានាធិបតីអាមេរិក លោក ដូណាល់ ត្រាំ បានឈ្នះឆ្នោត។
សិស្សនិស្សិតរាប់រយនាក់ មកពីសកលវិទ្យាល័យ University of Texas បានដើរឆ្លងកាត់ទីប្រជុំជន ក្នុងទីក្រុង Austin ដោយបានស្រែកពាក្យស្លោកប្រឆាំងនឹង លោក ត្រាំ។ ចំណែកឯនៅក្នុងទីប្រជុំជន នៃទីក្រុង Los Angeles សិស្សវិទ្យាល័យជាច្រើន បានប្រមូលផ្ដុំគ្នា នៅឯសាលារាជធានី នៅរសៀលថ្ងៃពុធ។
អ្នកតវ៉ាម្នាក់ មានឈ្មោះថា Brooklyn White បានកាន់បដា ដែលសរសេរថា «Hate won't win»។ អ្នកតវ៉ា វ័យ១៨ឆ្នាំ រូបនេះ បានបោះឆ្នោតឲ្យ លោកស្រី ហ៊ីឡារី គ្លីនតុន និងមានការខកចិត្តយ៉ាងខ្លាំង។
ជាមួយគ្នានេះដែរ ការតវ៉ាប្រឆាំងស្រដៀងគ្នានេះ ក៏ត្រូវបានគេរាយការណ៍នៅឯវិទ្យាល័យ និងសកលវិទ្យាល័យដទៃទៀត នៅទូទាំងប្រទេស ផងដែរ។ សិស្សរាប់រយនាក់មកពីវិទ្យាល័យជាច្រើន ក្នុងទីក្រុង Des Moines រដ្ឋ Iowa បានដើរនៅតាមដងផ្លូវ ដើម្បីតវ៉ាប្រឆាំងនឹងលទ្ធផលបោះឆ្នោតនោះ។
មិនតែប៉ុណ្ណោះ នៅក្នុងទីក្រុង Phoenix រដ្ឋ Arizona មានសិស្សប្រមាណជា ២០០នាក់ មកពីវិទ្យាល័យ Carl Hayden High School បានដើរដង្ហែរក្បួនតវ៉ាប្រឆាំងនឹងលទ្ធផលបោះឆ្នោតដូចគ្នា។
លើសពីនេះទៅទៀត នៅឯវិទ្យាល័យ Berkeley High School ក្នុងរដ្ឋ California សិស្សប្រមាណជា ១ ៥០០នាក់ បានដើរចេញពីថ្នាក់រៀន ដោយខ្លះមានកាន់បដារិះគន់ លោក ត្រាំ និងដើរឆ្ពោះទៅកាន់ អគារនៃសកលវិទ្យាល័យ University of California ទៀតផង។ ក្នុងនោះដែរ ក៏មានការប្រមូលផ្ដុំគ្នា នៅឯបរិវេណ Pennsylvania Avenue ដែលស្ថិតក្បែរសេតវិមាន ផងដែរ។
អ្វីដែលរឹតតែភ្ញាក់ផ្អើលទៅទៀតនោះ គេបានប្រទះឃើញ តារាចម្រៀងស្រី សញ្ជាតិអាមេរិក Lady Gaga ដែលជាអ្នកគាំទ្រ លោកស្រី គ្លីនតុន បានឈរនៅលើរថយន្តមួយគ្រឿង ដោយក្នុងដៃមានកាន់បដា «Love trumps hate»៕
សូមទស្សនាវីដេអូខាងក្រោម៖