ហ៊ីឡារី គ្លីនតុន និងស្វាមី បណ្ដើរឆ្កែឡើងភ្នំលេងរំភើយ ក្រោយចាញ់ឆ្នោត
- 2016-11-11 05:02:29
- ចំនួនមតិ 0 | ចំនួនចែករំលែក 0
ហ៊ីឡារី គ្លីនតុន និងស្វាមី បណ្ដើរឆ្កែឡើងភ្នំលេងរំភើយ ក្រោយចាញ់ឆ្នោត
ចន្លោះមិនឃើញ
បេក្ខភាពប្រធានាធិបតីអាមេរិក លោកស្រី ហ៊ីឡារី គ្លីនតុន ត្រូវបានគេប្រទះឃើញជាលើកដំបូង ចាប់តាំងពីបានបរាជ័យ ក្នុងការបោះឆ្នោតជ្រើសរើសប្រធានាធិបតីអាមេរិក កាលពីថ្ងៃអង្គារ កន្លងទៅនេះ។
យោងតាមប្រភពព័ត៌មាន បានឲ្យដឹងថា លោកស្រី គ្លីនតុន បានផ្លាស់ទៅនៅផ្ទះលោកស្រី នៅក្នុងទីក្រុង Chappaqua រដ្ឋ New York ចាប់តាំងពីទទួលស្គាល់ពីការបរាជ័យ នៅក្នុងទីក្រុង Manhattan នៅព្រឹកថ្ងៃពុធ កន្លងទៅនេះ។
ស្រ្តីជាអ្នកដំណើរម្នាក់ មានឈ្មោះថា Margot Gerster បានប្រទះឃើញ លោកស្រី គ្លីនតុន និងស្វាមី ដែលជាអតីតប្រធានាធិបតីអាមេរិក លោក បៀល គ្លីនតុន កំពុងដើរបណ្ដើរឆ្កែឡើងភ្នំ ហើយនាងក៏បានសុំលោកស្រី គ្លីនតុន ថតរូបជាមួយគ្នាតែម្ដង។ នៅក្នុងរូបថតមួយសន្លឹកនោះ លោកស្រី គ្លីនតុន បានញញឹមបិទមាត់មិនជិតឡើយ ហាក់បីដូចជាមិនមានរឿងអ្វីបានកើតឡើងអីចឹង។
ក្រោយមក Gerster បានបង្ហោះរូបនោះ ទៅលើបណ្ដាញសង្គមហ្វេសប៊ុក និងបានសរសេរថា «ខ្ញុំមានអារម្មណ៍ថាសោកស្ដាយណាស់ ចាប់តាំងពីថ្ងៃបោះឆ្នោតមក ហើយបានសម្រេចចិត្តជ្រើសរើសវិធីសាស្ត្រដ៏ល្អមួយដើម្បីសម្រាក ដោយនាំកូនស្រីរបស់ខ្ញុំមកឡើងភ្នំលេង នៅ Chappaqua។ ខណៈពេលយើងកំពុងចាកចេញ ខ្ញុំក៏បានលឺសូរសំឡេងមនុស្សដើរមករកខ្ញុំ ហើយខ្ញុំក៏បានឃើញ លោកស្រី គ្លីនតុន និង លោក បៀល ជាមួយ សត្វឆ្កែរបស់ពួកគេ កំពុងតែឡើងភ្នំដូចខ្ញុំដែរ»។
អ្នកស្រី Gerster បានឲ្យដឹងទៀតថា «ខ្ញុំបានអោបលោកស្រី និងនិយាយទៅកាន់លោកស្រីថា ពេលវេលាដែលពិសេស និងសប្បាយចិត្តបំផុត គឺបានបោះឆ្នោតឲ្យលោកស្រី។ ពេលនោះ លោកស្រីបានអោប និងអរគុណខ្ញុំ ហើយយើងបានបន្តនិយាយគ្នាលេង។ ក្រោយមកខ្ញុំក៏ឲ្យពួកគេ បន្តដំណើរទៅទៀត»៕