ឥទ្ធិពលដុល្លារ ប្រហារស្នេហ៍ខ្ញុំ

2016-11-11 06:38:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាបទពិសោធន៍ក្នុងជីវិតមួយដែលឈឺចាប់ទោះប្រើពេលវេលារាប់ឆ្នាំដើម្បីបំភ្លេចម្នាក់នោះ តែហេតុអ្វីខ្ញុំធ្វើមិនបាន? ហេតុអីបានជាឱ្យខ្ញុំរង់ចាំធ្វើអី បើគង់តែយើងត្រូវបែកគ្នា ហេតុអីក៏ផ្ដល់ក្ដីសង្ឃឹមអោយខ្ញុំបើចុងក្រោយអ្នកនៅតែចាកចេញពីខ្ញុំ?

មកដល់ពេលនេះខ្ញុំមានអាយុ ៣០ ឆ្នាំហើយតែខ្ញុំនៅតែមិនទាន់យកប្រពន្ធ ដោយសារស្នេហាដំបូងរបស់ខ្ញុំបានធ្វើអោយខ្ញុំក្លាយជាមនុស្សម្នាក់ផ្សេងទៀត ខ្លាចនឹងមានស្នេហា កាលពីមុនឃើញមនុស្សប្រុសយំដោយសារស្នេហាខ្ញុំគិតថាហេតុអីក៏ទន់ជ្រាយម្ល៉េះ លុះដល់ធ្លាក់មកលើខ្លួនឯងទើបដឹងថាឈឺប៉ុណ្ណា ។

ខ្ញុំនិងនាងគឺជាបងប្អូនជីទួតមួយ។ យើងទាំងពីនាក់រស់នៅផ្ទះជិតគ្នាតាំងពីតូចៗនៅកៀនស្វាយ យើងទាំងពីរនាក់ស្រឡាញ់គ្នាណាស់តាំងពីនៅក្មេង ប៉ុន្តែគ្រាន់តែមិនដឹងថាវាជាអារម្មណ៍ស្នេហា អនុស្សាវរីយ៍រាប់មិនអស់តាំងពីនៅតូចរហូតដល់ពេញវ័យទើបធ្វើអោយយើងមានអារម្មណ៍ស្រឡាញ់គ្នាលើសពីបងប្អូន ហើយយើងស្រឡាញ់គ្នាក៏ចាស់ទុំមិនបានហាមឃាត់ដែរឪពុកម្ដាយរបស់នាងបានប្រាប់ថាឱ្យខ្ញុំខំរៀនរកការងារធ្វើមានប្រាក់ខែត្រឹមត្រូវគាត់នឹងអោយចូលស្ដីដណ្ដឹងតាមប្រពៃណី។

ខ្ញុំសប្បាយចិត្តណាស់ហើយវាគឺជាកម្លាំងចិត្តមួយដ៏ធំធេង ជំរុញអោយខ្ញុំតស៊ូព្យាយាមរហូតខ្ញុំបានរៀនចប់ថ្នាក់បរិញ្ញាបត្រ នៅទីបំផុតខ្ញុំក៏បានប្រឡងជាប់ជាមន្ត្រីក្រមខណ្ឌរដ្ឋមួយរូប និងបានធ្វើការនៅកន្លែងកម្សាន្តវេនយប់មួយទៀត ខ្ញុំខំប្រឹងប្រែងតស៊ូរហូតមកដល់ថ្ងៃនេះគឺដោយសារនារីម្នាក់ដែលខ្ញុំស្រឡាញ់ និងខំរកលុយដើម្បីចូលស្ដីដណ្ដឹងនាងតាមប្រពៃណី ។

មែននៅទីបំផុតខ្ញុំធ្វើការជាងពីរឆ្នាំខ្ញុំសន្សំលុយបានគ្រប់ចំនួនដើម្បីដណ្ដឹងយកនាងមកធ្វើជាគូរអនាគត ពេលភ្ជាប់ពាក្យរួចខ្ញុំក៏បានសម្រេចចិត្តយកនាងមកធ្វើការជាមួយ ដោយសារឃើញនាងធ្វើការរោងចក្រមួយខែបានតែ 60$ ទេ ពេលនោះនាងបានមករស់នៅភ្នំពេញជាមួយខ្ញុំនៅបន្ទប់ជួលជាមួយគ្នា ខំធ្វើការជាមួយគ្នាទាំងយប់ទាំងថ្ងៃ ដើម្បីសន្សំលុយឱ្យបានច្រើននៅពេល យើងរៀបការរួចមានលុយទុករកស៊ីខ្លះ។

និយាយទៅយើងទាំងពីរនាក់រស់នៅជាមួយគ្នាដូចប្ដីនិងប្រពន្ធទៅហើយ ទោះមានស៊ីអត់ស៊ីតែយើងរស់នៅជាមួយគ្នាពោរពេញដោយសុភមង្គលបំផុត ម៉ូតូកញ្ចាស់មួយខ្ញុំដឹកនាងរាល់ថ្ងៃ ហាលថ្ងៃហាលភ្លៀងជាមួយគ្នា តស៊ូពុះពារគ្រប់ឧបសគ្គ មិនថាមានរឿងអីក៏យើងមិនព្រមចុះចាញ់ដែរ ខ្ញុំស្រឡាញ់នាងខ្លាំង ខ្លាំងលើសពីជីវិតខ្លួនឯងទៅទៀត អ្វីដែលខ្ញុំចង់បានពីនាងគឺសូមកុំទៅណាចោលខ្ញុំ រស់នៅក្បែរខ្ញុំដល់ថ្ងៃស្លាប់គឺខ្ញុំអស់ចិត្តហើយ។

តែក្ដីសង្ឃឹមខ្ញុំហាក់បាត់បង់បន្តិចម្ដងៗ នៅពេលនាងមករស់នៅភ្នំពេញបានជិត១ឆ្នាំ នាងចាប់ផ្ដើមផ្លាស់ប្ដូរបន្តិចម្ដងៗ ចេះលែងខ្លួនសិចស៊ី ប្រើទូរស័ព្ទទំនើបៗ ចេះលួចនិយាយទូរស័ព្ទ ហើយពេលខ្លះនាងអោយខ្ញុំមកផ្ទះមុនមិនចាំបាច់អោយខ្ញុំចាំយកទៀតទេ ខ្ញុំចាប់ផ្ដើមឆ្ងល់ហេតុអីរយះពេលមួយឆ្នាំ នាងផ្លាស់ប្ដូរច្រើនម្ល៉េះ តែខ្ញុំក៏មិនបានគិតថានាងផិតក្បត់អីនោះដែរ ព្រោះជឿជាក់លើនាងថាមិនអាចក្បត់ខ្ញុំបានទេព្រោះយើងស្រឡាញ់គ្នាជាងប្រាំឆ្នាំហើយ។ ប៉ុន្តែនាងកាន់តែប្រែប្រួលខ្លាំងឡើងៗពីមួយថ្ងៃទៅមួយថ្ងៃ ថ្ងៃខ្លះនាងថែមទាំងមិនមកគេងផ្ទះក៏មានដែរ នៅពេលខ្ញុំសួរនាងប្រាប់ថាកុំគិតច្រើន អ្វីដែលនាងធ្វើគឺដើម្បីយើងទាំងពីរនាក់ ហើយលុយដែលនាងរកបានទាំងប៉ុន្មានគឺជាលុយធីបប៉ុណ្ណោះ។

នាងកាន់តែឆ្ងាយពីខ្ញុំបន្តិចម្ដងៗ បន្ទប់ធ្លាប់មានគ្នាពីរនាក់តែបែរជាមានខ្ញុំតែម្នាក់ ធ្លាប់ញ៉ាំបាយចានមួយពីរនាក់តែបែរជាមានខ្ញុំតែម្នាក់ តើទៅថ្ងៃមុខទៀតនឹងទៅជាយ៉ាងណា ខ្ញុំបានសួរនាង នាងនៅតែឆ្លើយចម្លើយដដែលគឺធ្វើដើម្បីគ្រួសារយើង ខ្ញុំបានប្រាប់នាងថាបើដើម្បីយើងទាំងពីរនាក់ ធ្វើអោយអូនឃ្លាតឆ្ងាយពីបង អូនមិនបាច់ធ្វើទេ បងចង់បានជីវិតដូចពីមុនវិញ ទោះមានស៊ីអត់ស៊ីយើងតស៊ូជាមួយគ្នាទៀតណា តែចម្លើយដែលខ្ញុំទទួលបាននោះគឺ អ្វីៗវាមិនអាចស្ថិតស្ថេររហូតទេ បងមើលសភាពបងរាល់ថ្ងៃចុះតើអាចចិញ្ចឹមខ្ញុំរស់បានស្រួលទេ? ចឹងមានតែខ្ញុំខំរកលុយខ្លួនឯងចឹងហើយ បងកុំបង្កបញ្ហាច្រើនពេកអី ខ្ញុំហត់ណាស់។

មនុស្សដែលស្រឡាញ់គ្នាស្ទើរលេបហេតុអីក៏ហ៊ាននិយាយបែបនេះដាក់ខ្ញុំ? ខ្ញុំគិតខុសហើយ នឹងបើខ្ញុំមិនយកនាងមកនៅភ្នំពេញទេនាងក៏មិនអាចទៅជាដូច្នេះបានដែរ ខ្ញុំគ្រាន់តែគិតថាខំធ្វើការរកលុយទាំងអស់គ្នា ដើម្បីជីវិតបានប្រសើរឡើង សន្សំលុយបានច្រើនពេលណា យើងនឹងរៀបការជាមួយគ្នា ឥទ្ធិពលលុយដុល្លារបានឆក់មនុស្សដែលខ្ញុំស្រឡាញ់ស្មើជីវិត ចេញពីខ្ញុំហើយ ហេតុអីចិត្តនាងសាហាវព្រៃផ្សៃយ៉ាងនេះ នាងគ្មាននឹកស្រណោះគ្រាហ៍ដែលតស៊ូលំបាកជាមួយគ្នាសូម្បីតែបន្តិច។

រូបតំណាង

ទោះបីជាបែបនេះក្ដីខ្ញុំនៅតែមិនអាចឈរមើលនាង ជិះឡានទំនើបៗជាមួយប្រុសអ្នកមានទាំងអស់នោះដែរ ខ្ញុំតែងទៅចាំនាងកន្លែងធ្វើការរាល់ថ្ងៃ តែនាងធ្វើដូចមិនស្គាល់គ្នា ញាក់មុខញាក់មាត់អោយខ្ញុំទៅផ្ទះ ឱខ្ញុំអើយហេតុអីថោកទាបម្ល៉េះគេបណ្ដើរប្រុសនឹងមុខហើយនៅមិនដឹងខ្លួនទៀត។ មិនយូរប៉ុន្មានខ្ញុំក៏ទទួលបានមេរៀនដ៏ឈឺចាប់បំផុតក្នុងជីវិតស្ទើរមិនអាចប្រឈមនឹងការពិតបាន គឺម្ដាយនាងបានផ្ដាច់ពាក្យជាមួយខ្ញុំ ដោយមិននិយាយហេតុផលច្រើនទេ គេប្រាប់ថាកូនស្រីគេមិនសាកសមជាមួយខ្ញុំទេ ប៉ុណ្ណឹងហើយខ្ញុំនៅមិនទាន់អស់ចិត្តទៀត ខ្ញុំបានទៅដល់ផ្ទះនាងនៅឯស្រុកដើម្បីសួររកហេតុផលអោយច្បាស់លាស់ គេបិទទ្វារមិនទទួលហើយថែមទាំងគំរាមហៅប៉ូលិស មកចាប់ទៀត ហេតុអីមនុស្សស្រឡាញ់គ្នារាប់ឆ្នាំសង្ឃឹមបានរៀបការតែបែរជាមកជួបរឿងអាក្រក់ៗមិននឹកស្មានដល់ទៅវិញ។

បែកពីខ្ញុំមិនបានបីខែផងគ្រួសារនាងដើរចែកធៀបការពេញភូមិ មិនដឹងថានាងលួចទាក់ទងជាមួយគេតាំងពីថ្ងៃណាហេតុអីក៏លឿនយ៉ាងនេះ សូម្បីពាក្យលាមួយម៉ាត់ក៏នាងមិនប្រាប់ខ្ញុំដែរ ធៀបការដែលនាងដើរចែកកូនកំឡោះមិនមែនជាខ្ញុំទេ ខ្ញុំខ្មាសគេ និង អាណិតខ្លួនឯងណាស់ ហេតុអីក៏ជីវិតខ្ញុំត្រូវញាំញីដោយសារមនុស្សស្រីម្នាក់ធ្វើអោយខ្ញុំស្ទើរក្លាយជាមនុស្សឆ្កួត។

ថ្ងៃដែលនាងរៀបការគឺជាថ្ងៃដែលខ្ញុំឈឺចាប់ខ្លាំងបំផុត ដូចគេយកកាំបិតមកចាក់ទាំងរស់ ព្រោះតែលុយនាងក្បត់ខ្ញុំ គ្មានស្ដាយស្រណោះ នាងធ្វើអោយមនុស្សប្រុសដ៏ក្លាហានម្នាក់ក្លាយជាមនុស្សទន់ជ្រាយ បើពេលនេះខ្ញុំក្លាយជាមនុស្សបាត់ការចងចាំមិនដឹងជាល្អយ៉ាងណាទេម្ល៉េះខ្ញុំមិនត្រូវឈឺចាប់ស្ទើរស្លាប់ស្ទើររស់បែបនេះដែរ។

ក្ដីសង្ឃឹមខ្ញុំត្រូវរលាយដូចផេះ ការតស៊ូជាច្រើនឆ្នាំប្រែគ្មានន័យ ចុងក្រោយទើបភ្ញាក់ខ្លួនព្រើតថា ជាមនុស្សល្ងង់បំផុត។ ពីបុរសម្នាក់ដែលនាងធ្វើអោយឈឺចង់ស្លាប់ សូមជូនពរអោយបុរសម្នាក់នោះ ស្រឡាញ់នាងស្រឡាញ់នាងស្មោះដូចដែលខ្ញុំស្រឡាញ់នាង បើថ្ងៃណាមួយគេបោះបង់ចោលកុំវិលមករកខ្ញុំអោយសោះ ព្រោះម្នាក់នេះតាំងចិត្តហើយចាប់ពីថ្ងៃនេះស្នេហាត្រូវខ្ញុំគ្រវាត់ចោលហើយ ព្រោះវាធ្វើអោយខ្ញុំឈឺស្ទើរស្លាប់ម្ដងរួចទៅហើយ ចុងក្រោយមានតែឪពុកម្ដាយខ្ញុំប៉ុណ្ណោះដែលស្រឡាញ់ខ្ញុំពិតប្រាកដ។

ស្នេហាធ្វើអោយខ្ញុំឈឺចាប់ ស្នេហាធ្វើអោយខ្ញុំស្ទើរក្លាយជាមនុស្សឆ្កួត ដូចនេះក្នុងមួយជីវិតនេះខ្ញុំលែងត្រូវការស្នេហាហើយ។

មានរឿងរ៉ាវចង់ចែករំលែកសូមផ្ញើទៅកាន់ e-mail: kong.visal@sabay.com

ឬទូរសព្ទទៅកាន់លេខ 015 209 699

អត្ថបទ៖ មនុស្សខូចចិត្ត