ដូង សុខគា បង្ហាញផែនការថ្មីនៅCTN ក្រោយបោះចោលកម្មវិធី២

2016-11-17 03:00:41
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីប្រកាសឈប់ធ្វើពិធីករ កម្មវិធី "សំណើចតាមភូមិ" និង "ផ្ទះលោកតា"ភ្លាម លោក ដួង សុខគា បានបង្ហើបប្រាប់Sabay ថា លោកគ្រោងនឹងបង្កើតកម្មវិធីថ្មីមួយដោយខ្លួនឯង ហើយផែនការនោះលោកគ្រោងយកទៅជួបពិភាក្សាថ្នាក់ដឹកនាំខាងលើឆាប់ៗខាងមុខនេះ។

កម្មវិធីដែល លោក ដួង សុខគា គ្រោងបង្កើតនោះ ជាកម្មវិធីមួយទាក់ទងនឹងវប្បធម៌ប្រពៃណី ដោយមានការបញ្ចូលកំប្លែងលេងសើចខ្លះៗតែ កាលលេងសើចមិនលើសលួស។"ខ្ញុំចូលចិត្តវប្បធម៌ អីចឹងខ្ញុំចង់អភិរក្ស តែខ្ញុំចង់ឲ្យមាន Creative ឥឡូវហ្នឹងកំពុងគិត តែមិនទាន់ដឹងថាថ្នាក់ដឹកនាំគាត់ ព្រមឬអត់ទេ" លោក ដួង សុខគា លើកឡើង។

ឆ្លងតាមបទពិសោធន៍ការងារកន្លងមក ការងាកមកផលិតកម្មវិធីដោយខ្លួនឯងនេះ មិនជាបញ្ហាចោទជាមួយលោក ដួង សុខគាឡើយ។ តារារូបនេះប្រាប់ថា កម្មវិធីកន្លងមកលោកបានជួយគំនិតថ្មីៗដល់ក្រុមការងារច្រើន ដូចនេះ មិនមែនជារឿងពិបាកនោះទេ។

លោក ដួង សុខគា បានចូលបម្រើការងារនៅទូរទស្សន៍CTN ក្នុងអំឡុងឆ្នាំ២០០៩ ជាបុគ្គលិកជាប់កុងត្រា។ ទោះបីជាលោក ដួង សុខគា លាឈប់ពីកម្មវិធី "សំណើចតាមភូមិ" និង "ផ្ទះលោកតា"បែបនេះក្ដី តារាមានកំណើតមកពីខេត្ត តាកែវរូបនេះនៅតែមានឈ្មោះជាបុគ្គលិកទូរទស្សន៍ខាងលើដដែល។ បច្ចុប្បន្នលោកនៅសល់ កម្មវិធីក្នុងដៃមួយទៀតគឺ "ប្ដីខ្ញុំខ្លាំង"។

ដួង សុខគា ទទួលស្គាល់ថា ការឈប់ពីកម្មវិធី"សំណើចតាមភូមិ" និង "ផ្ទះលោកតា" ដោយសារតែមានការអាក់អន់ចិត្ត ពីនាយ ពែកមី និង នាងខ្ញុង ក្នុងកម្មវិធីកាត់សក់មួយជាមួយគ្នា ។ ការបោះសម្ដី មិនគោរពចាស់ទុំរបស់តារាទាំងពីរខាងលើ លោកប្រាប់ថា មិនមែនតែលើកទី១នោះឡើយ។ លោកសូម មិនអធិប្បាយ បញ្ហាខាងលើ ឲ្យលើសពីនេះឡើយ។

ជាមួយគម្រោងការបង្កើតកម្មវិធីថ្មីដូចបានរៀបរាប់ខាងលើ មិនទាន់ដឹងថា ថ្នាក់គ្រប់គ្រងរបស់CTNព្រមព្រៀងរាល់សំណើរនោះទេ ប៉ុន្តែលោក ដួង សុខគា បញ្ជាក់ជាចុងក្រោយថា ខ្លួននឹងកាន់គម្រោងនោះទៅជួបពិភាក្សាជាមួយ ថ្នាក់ដឹកនាំឆាប់ៗនេះ ហើយថ្នាក់ដឹកនាំអូខេ លោកប្ដេជ្ញាថា នឹងព្យាយាមបង្កើតគំនិតថ្មីៗល្អៗឲ្យបានច្រើន៕

អត្ថបទ៖ ខុត សីហា