គយគន់ទេសភាពផ្ទៃបឹងពីកំពូលភ្នំស្អាង នារដូវទឹកពេញមេ

2016-11-21 06:13:36
ចំនួនមតិ 0 | ចំនួនចែករំលែក 0

ចន្លោះមិនឃើញ

នាពេលចុងខែវស្សាទឹកពេញមេឡើងព្រៀប ភ្នំស្អាងប្រដូចទៅនឹងកូនកោះមួយដ៏ខៀវស្រងាត់ ។ កន្លែងដែលសង់កូនព្រះវិហារតូចមួយ និងអមដោយព្រះអាស្រមចំនួនពីរនៅលើកំពូលភ្នំស្អាងហាក់ដូចទៅនឹងប៉មមួយអាចឲ្យយើងឈរសម្លឹងទៅឃើញទេសភាពផ្ទៃទឹកដ៏ធំធេង ។

កុំតែទីនោះជាកន្លែងសក្ការគោរពបូជាពុំដូច្នោះទេ អ្នកដំណើរទេសចរណ៍នឹងស្រែកទៅកាន់ជើងមេឃល្វឹងល្វើយដាច់កន្ទុយភ្នែក ដើម្បីឲ្យរសាយទុក្ខកង្វល់ចេញពីក្នុងដួងចិត្តខ្លះ ។ ហើយស្រង់ស្រូបមកវិញនូវខ្យល់បរិសុទ្ធស្រស់ថ្លាដែលបក់មករហៀកៗ លាយឡំ និងក្លិនផ្កាភ្នំយ៉ាងក្រអូបប្រហើរ ។

នៅខាងជើងនៃកូនព្រះវិហារនោះ គឺព្រះអាស្រម ព្រះអង្គចេក ព្រះអង្គចម ចំណែក ព្រះអាស្រមនៅខាងត្បូង គឺមានដំកល់រូបបដិមាព្រះគោ និងព្រះកែវ សុទ្ធសឹងតែជាវត្ថុស័ក្ដិសិទ្ធិដែលប្រជាជនខ្មែរយើងតែងតែគោរពបូជា ។ វត្តស្អាងភ្នំក៏ធ្លាប់ល្បីល្បាញខាងបារមីទូកង ដែលកាលពីសម័យមុន ដូចជាទូកងឈ្មោះ ម៉ឺនក្រាញ និងទូកងឈ្មោះ ក្ដាមប្រៃ នេះបើតាមប្រសាសន៍របស់ចាស់ៗ ព្រឹទ្ធាចារ្យដែលនៅចាំថែរក្សានៅលើភ្នំនោះ ។ ប៉ុន្តែទូកង ទាំងនោះពុកផុយខូចខាតបាត់រូបរាងអស់ទៅហើយ ។

វត្តស្អាងភ្នំ ឬក ភ្នំស្អាង ស្ថិតនៅក្នុងទឹកដីឃុំស្អាងភ្នំ ស្រុកស្អាង ខេត្តកណ្ដាល ។ រមណីយដ្ឋានមួយនេះនៅមិនឆ្ងាយប៉ុន្មានពី រាជធានីភ្នំពេញ ទេ បើប៉ាន់ស្មានទៅខ្ទង់ប្រហែលជា ៣០ គីឡូម៉ែត្រប៉ុណ្ណោះ ។ ប្រសិនបើយើងកំពុងស្ថិតនៅលើកំពូលភ្នំស្អាង ហើយចោលភ្នែកទៅទិសខាងជើង យើងនឹងឃើញអគារខ្ពស់ខ្លះនៃទីក្រុងភ្នំពេញ ពិសេសយើងនឹងអាចមើលឃើញអគារវឌ្ឍនៈយ៉ាងប្រាកដ ។

សូម្បីតែភ្នំដា និងភ្នំជីសូរ ដែលស្ថិតនៅក្នុងខេត្តតាកែវ ក៏យើងអាចសម្លឹងមើលឃើញដូចគ្នា ដែលជាហេតុធ្វើឲ្យយើងមានអារម្មណ៍ថា ទីកន្លែងទាំងនោះហាក់ស្ថិតនៅជិតគ្នាបង្កើយនៅក្នុងរង្វង់ដៃយើងតែមួយ ។ ចំណែកទិដ្ឋភាពផ្ទះប្រជាជនដែលសង់នៅតាមជើងភ្នំ និងសួនបន្លែច្បារដំណាំរបស់ពួកគាត់ មានទាំងដើមដូងដើមត្នោតដែលដុះប្របមាត់ទឹក មើលទៅដូចទស្សនីយភាពនៅក្នុងផ្ទាំងគំនូរអ៊ីចឹង ។

នៅតាមជើងភ្នំវិញ ក៏មានកន្លែងសម្រាប់ភ្ញៀវទេសចរណ៍ឈប់សម្រាកលំហែ និងជួបជុំញ៉ាំអាហារផងដែរ ។ ហើយតម្លៃសេវាកម្ម ម្ហូបអាហារ និងភេសជ្ជៈ គឺប្រហាក់ប្រហែលទៅរមណីយដ្ឋានដទៃទៀតដែរ ។ ថ្ងៃអាទិត្យ ឬថ្ងៃបុណ្យឈប់សម្រាក គឺល្អបំផុតសម្រាប់ដំណើរកម្សាន្តទៅលេងស្អាងភ្នំ ពិសេសពេលខែទឹកពេញមេនេះតែម្ដង ៕