ស្ពានកោះធំ ក្លាយជាទីទេសចរអ្នកស្រុក ផ្សាភ្ជាប់បេះដូងអ្នកត្រើយខាងលិចទៅត្រើយខាងកើត

2016-11-25 02:31:26
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកស្រុកកោះធំចំណាយរយៈពេលជាង ៣ ឆ្នាំ ដើម្បីរង់ចាំមើលសមិទ្ធផលថ្មីមួយ ប្រសិទ្ធិឡើងនៅលើទឹកដីរបស់ពួកគេ។ ប៉ុន្តែពេលនេះក្ដីស្រមៃមួយនេះសម្រេចចេញជារូបរាងពិតហើយ ។

ស្ពានមិត្តភាពកម្ពុជា ចិន កោះធំ ជាស្ពានឆ្លងទន្លេថ្មីមួយទៀត ដែលទើបសង់រួចរាល់និងកំពុងបើកឲ្យប្រើប្រាស់បណ្ដោះអាសន្ន និងត្រៀមសម្ពោធដាក់ឲ្យប្រើប្រាស់ក្នុងពេលឆាប់ៗខាងមុខនេះ។

លោកច្រឹក ស្រ៊ង មន្រ្តីសាលាស្រុកកោះធំបានឲ្យដឹងថា ស្ពានថ្មីនេះមិនទាន់កំណត់ថ្ងៃសម្ពោធដាក់ឲ្យប្រើប្រាស់ផ្លូវការនៅឡើយទេ ប្រហែលត្រូវរង់ចាំសម្ពោធព្រមគ្នាជាមួយនឹងស្ពានឆ្លងជ្រៃធំ ដែលស្ថិតក្នុងស្រុកកោះធំជិតព្រំដែនប្រទេសវៀតណាម។

ខ្សែទន្លេបាសាក់ពុះចែកទឹកដីស្រុកកោះធំសឹងតែពីរចំណែកស្មើគ្នា ។ ចំនួនប្រជាជនត្រើយលិច និងត្រើយខាងកើតលើសខ្វះគ្នាបន្តួចតែប៉ុណ្ណោះ តែការប្រាស្រ័យទាក់ទងគ្នាទៅវិញទៅមកជួបការពិបាក កាលពីមិនទាន់មានស្ពាន។ សិស្សសាលាទៅរៀនមិនទាន់ម៉ោង ឈ្មួញដឹកទំនិញខាតសោហ៊ុយច្រើនព្រោះរឿងឆ្លងទូកដរ បើចំខែមានព្យុះភ្លៀង ឬខែកំប្លោកកកពេញទន្លេជាដើម។ អ្វីលំបាកជាងហ្នឹងទៀត ចំពោះអ្នកជំងឺត្រូវការសង្គ្រោះបន្ទាន់ និងស្ដ្រីមានផ្ទៃពោះគ្រប់ខែសម្រាល ចាំបាច់ត្រូវឆ្លងទូកដទៅត្រើយខាងលិចរកមន្ទីរពេទ្យស្រុកពេលយប់ បើមិនទាន់ពេលវេលាអាចនឹងប៉ះពាល់ដល់អាយុជីវិត។

យោងតាមគេហទំព័រ និងទំព័រហ្វេសប៊ុកសម្ដេចនាយករដ្ឋមន្ត្រីហ៊ុន សែន កាលពីថ្ងៃទី ០៨ ខែសីហា ២០១៦ នៅពេលដែលលោកអញ្ជើញជាអធិបតីដើម្បីចាក់បេតុងភ្ជាប់មុខតំណរស្ពានបានបញ្ជាក់ថា ស្ពានបេតុងកោះធំមានប្រវែង ៤១៥ ម៉ែត្រ ទទឹង ១៣.៥ ម៉ែត្រ។ បើបូកទាំងផ្លូវទៀត ស្ពាននេះមានប្រវែងសរុប ៨២៤ ម៉ែត្រ ដែលតភ្ជាប់កំណាត់ផ្លូវជាតិលេខ ២១ ត្រង់ភូមិព្រែកធន់ ឃុំព្រែកថ្មី ស្រុកកោះធំ ត្រើយខាងលិច ទៅត្រើយខាងកើតលើកំណាត់ផ្លូវជាតិលេខ ១១០ ត្រង់ភូមិព្រែកថ្មី ឃុំជ្រោយតាកែវ ស្រុកកោះធំ ខេត្តកណ្ដាល។

ស្ពានកោះធំសាងសង់ដោយក្រុមហ៊ុន China Road & Bridge Corporation។ អ្វីដែលប្លែកគឺការរចនាម៉ូតបង្កាន់ស្ពាន ងាយស្រួលដល់ច្រត់ផ្អែកខ្លួន សម្លឹងមើលទេសភាពដងទន្លេ ផ្ទៃកោះ ចំការច្បារចំណាំអ្នកស្រុក ស្របស្រុកកោះធំខ្សត់តំបន់ទេសចរណ៍ផង ដែលធ្វើឲ្យស្ពានកោះធំក្លាយទីកន្លែងពេញនិយម សម្រាប់ពលរដ្ឋមកលំហែកាយ ស្រូបយកខ្សល់អាកាសជំនោរទន្លេនាពេលលា្ងចរហូតដល់ពេលរាត្រី។

ស្ពានមិត្តភាពកម្ពុជា ចិន កោះធំ ត្រូវបានធ្វើពិធីបើកការដ្ឋានសាងសង់កាលពីថ្ងៃទី ២៥ ខែមីនា ឆ្នាំ២០១៣ ក្រោមអធិបតីភាពសម្ដេចអគ្គមហាសេនាបតីតេជោ ហ៊ុន សែន ដោយចំណាយថវិកាសាងសង់សរុប ១៩.៣៩ លានដុល្លារអាមេរិក ដែលជាថវិកាកម្ចីឥណទានពីរដ្ឋាភិបាលចិន។