iPhone អាចមានតម្លៃស្មើម៉ូតូមួយគ្រឿង បើផលិតនៅអាមេរិក

2016-11-29 02:58:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានាធិបតីទើបជាប់ឆ្នោតលោក ដូណាល់ ត្រាំ បានលើកឡើងនឹងកំណត់ពន្ធពិសេសមួយសម្រាប់ Apple ប្រសិនបើព្រមផ្ទេររោងចក្រមកផលិត iPhone នៅអាមេរិក។

ត្បិតថាមិនទាន់ដឹងច្បាស់ពីការកំណត់ពន្ធពិសេសនេះ ប៉ុន្តែតាមការវាយតម្លៃរបស់ Marketplace និង ការស៊ើបអង្កេតរបស់រោងចក្រ Foxconn បានប៉ាន់ស្មានថា Apple អាចនឹងលក់ iPhone ស្មើតម្លៃម៉ូតូមួយគ្រឿង។ ប្រសិនបើគ្រឿងបន្លាស់ទាំងអស់របស់ iPhone ផលិតឡើងនៅសហរដ្ឋអាមេរិក។ គេសន្និដ្ឋានថាការចំណាយផលិត iPhone មួយគ្រឿងអាចនឹងឡើងដល់ ៦០០ ដុល្លារ (បច្ចុប្បន្ន iPhone 7 មួយគ្រឿងចំណាយប្រមាណ ២៣០ ដុល្លារ ដើម្បីផលិត)។ នេះមានន័យថា Apple អាចនឹងកំណត់តម្លៃលក់រាយរបស់ iPhone នៅខ្ទង់ ២ ០០០ ដុល្លារ ដើម្បីបានផលចំណេញច្រើន។

ដោយឡែកបើក្រឡេកមើលលើការវិភាគមួយផ្សេងទៀតធ្វើឡើងដោយក្រុម MIT Technology Review បង្ហាញថាប្រសិនបើការដំឡើង iPhone ធ្វើឡើងនៅអាមេរិក ប៉ុន្តែគ្រឿងបន្លាស់នាំចូលពីប្រទេសក្រៅនោះការចំណាយផលិត iPhone មួយគ្រឿងអាចនឹងឡើង ៥%។ យ៉ាងណាក្ដីប្រសិនបើគ្រឿងបន្លាស់ផលិតនៅអាមេរិក (គ្រឿងបន្លាស់ផលិតដោយប្រើវត្ថុធាតុដើមទិញពីទីផ្សារសកល) នោះការចំណាយផលិត iPhone អាចនឹងឡើងពី ៣០-៤០ ដុល្លារ។ ការកើនឡើងនេះក៏អាចប៉ះពាល់ដល់តម្លៃលក់រាយបន្តិចបន្តួចដែរ។

ការរៀបរាប់ខាងលើគ្រាន់តែជាការវិភាគខុសៗគ្នារបស់អ្នកជំនាញពីតម្លៃ iPhone ប្រសិន Apple ដំឡើង ឬ ផលិត iPhone នៅអាមេរិក។ ប៉ុន្តែអ្នកជំនាញជាច្រើនយល់ឃើញថាភាគរយដែល Apple អាចផ្ទេរសង្វាក់ផលិតកម្មមកអាមេរិកគឺមានតិចណាស់ ដោយសារផលអវិជ្ជមានជាច្រើន៕

ប្រភព៖ Businessinsider ប្រែសម្រួល៖ សុខហេង